கடவுள் கேட்ட பாஸ்போர்ட்.

ஒருநாள் -
இரவினில் எனை எழுப்பி -
"இறைவன் " பாஸ் போர்ட் வாங்கும் முறை கேட்டார்.
எல்லா உலகிலும் இருப்பவர்க்கு -
எதற்கடா பாஸ்போர்ட்? என எண்ணி
"என்ன அவசரம்? ஏன் ஸ்வாமி? " -என்றேன்.
கடவுள் என்னைப் பார்க்காமல்
சற்றே திரும்பிப் பதில் சொன்னார்.
"அடடா! எந்த யுகத்திலோ இருந்தேன் நான்!
இந்த யுகத்திலும் எரித்தீர்கள்!
ஒருமுறை சீதையின் அருள் நெஞ்சில்
அறியாமல் நான் தீ வைத்தேன்!
இன்றோ-என் ஒவ்வொரு அணுவிலும் ..அனுதினமும்..
இந்தியன் வைக்கிறான் இரத்தத் தீ.
"அல்லாஹ்" என்றும் என் நண்பர்.
அவருடன் எனக்கேன் வீண் சண்டை.
"யேசு"-வின் அன்பும் எனக்குண்டு.
அவர் பெயரைச் சொன்னால் "ஈசன்" வரும்.
இருக்கும் இடத்தைப் பிரித்தீர்கள்!
இறைவன் என்னையும் சிதைத்தீர்கள்.
இங்கே-நான் இருந்தால்தானே இத்தனையும்.?
இன்னொரு தேசம் போய்விட்டால் ...
இந்தச் சண்டைகள் நின்றுவிடும்.
இனியொரு முறை நான் பிறப்பெடுத்தால்
இன்னொரு தேசத்தில்தான் பிறப்பேன்..
இந்தியா -தான் என் இருப்பிடம் என்றால்
என் தாயின் கருவிலேயே கலைந்து போவேன்"-என்றார்.
அடடா-
"இந்திய அரசியல் பெரும் சுழலில்-
இறைவன் நிலையே இது என்றால்..
அடிமை மனிதர் நமக்கெல்லாம்
இதுவே போதும்"- எனும் திருப்தி
என் ஆழ் மனம் முழுதும் நிறைந்துவிட
பாஸ் போர்ட் வாங்கும் முறை சொன்னேன்.
சீக்கிரமாய் வாங்கும் வழிமுறை பற்றி
சில பல வழிகளும் நான் சொன்னேன்!
"நன்றி!" என்று அவர் சொன்ன வார்த்தைக்கு..
"உம் படைப்பின் பெருமை பார்த்தீரா?"-என்ற
என் வார்த்தைகள் காதில் விழு முன்
கலைந்தே போனார் ஒரு நொடியில்
இனி காணக் கிடைக்காத ஒரு பொருளாய்.

இறைவனுக்கே இந்நிலையா

மத துவேஷமும் மதச்சண்டையுமாய் நசியும் நாடு சீர் பெறும் நாள் எப்போது?

அருமை ரமேஷ்.. அன்பு வாழ்த்துகள்.

நன்றி! மஞ்சுபாஷினி.

நன்றி!