குறட்டையை விரட்ட..!

**சிவா** · **சிவா** Mon 20 Jun 2011 - 2:51

சுவாசப்பாதையில் ஏற்படுகின்ற அடைப்பு காரணமாக குறட்டை (Snore) உண்டாகிறது. உறங்கும்போது காற்று சுவாசக் குழலுக்குள் செல்வதற்கு தடை ஏற்படுவதால், நுரையீரல்கள் அந்தத் தடையை மீறிக் கொண்டு, மிகுந்த பலத்துடன் காற்றை உள்ளிழுக்கின்றன. அப்போது மெல்லிய 'மேல் அண்ணம்' (Soft palate) அதிர்வதால் குறட்டைச் சத்தம் கேட்கிறது.

சுவாசப்பாதையில் இவ்வாறு தடை ஏற்படுவதற்குப் பல காரணங்கள் உண்டு. பெரிதும் வீங்கிய டான்சில்கள், அடினாய்டு வீக்கம், மூக்கின்அமைப்புக் குறைபாடு, மூக்கில் ஒவ்வாமை, அதீத குடிபோதை, மிகையாகப் புகை பிடிப்பது, கொழுத்த உடல் ஆகியவை குறட்டைக்கு வரவேற்பு தருபவை. இவற்றுக்குரிய சிகிச்சையை மேற்கொண்டாலே குறட்டை குணமாகிவிடும்.

மீண்டும் குறட்டை வராமலிருக்க உடல் எடையை சீராகப் பராமரிக்க வேண்டும். உடலை பருக்க விடக் கூடாது. இரவில் மது அருந்தக் கூடாது. தூக்க மாத்திரைகளைச் சாப்பிடக்கூடாது. தூங்கும்போது கட்டில் கால்களுக்கு அடியில் செங்கற்களை வைத்து கட்டிலின் தலைப் பகுதியை மட்டும் சற்று உயர்த்திக் கொள்ள வேண்டும். பெரிய தலையணையை உபயோகிக்கக் கூடாது. சிறிய தலையணை போதும்.

இத்தனை வழிகளும் சரிப்பட வில்லையா? கவலைப்பட வேண்டாம். காது-மூக்கு-தொண்டை நிபுணரிடம் ஆலோசித்து, 'UPPP' ஆபரேசனை (Uvulo Palato Pharyngo Plasty) செய்து கொள்ளுங்கள். குறட்டைப் பிரச்சினை தீரும்.

டாக்டர் கணேசன்