“பேரைச் சொல்லவா?” தமிழக போலீஸ் நடுக்கம்!

முதல்வர் ஜெயலலிதா, தனது கட்சிக்காரர்கள் போலீசாருடன் எந்த டீலிங்கும்
வைத்துக் கொள்ளக்கூடாது என்று திட்டவட்டமாகத் தெரிவித்துள்ளது நன்றாகவே
வேலை செய்கின்றது. அ.தி.மு.க.காரர்கள் அடக்கி வாசித்துக் கொண்டிருக்கிறார்கள். புதிய ஆட்சி வந்த ஒரு மாதத்தில், தமிழக அளவில் பெரிதாக எந்த முறைப்பாடும் இல்லை.
ஆனால், தமிழக போலீஸின் ‘பழைய விசுவாசம்’, அவ்வளவு சீக்கிரமாக விடைபெற்றுக் கொள்ளவில்லை.அமைச்சர்கள் பெயரைச் சொன்னாலே போலீஸ் நடுங்கியது என்றார்கள். அதன்பின் எம்.எல்.ஏ., என்றால் பயம். மாவட்டம் என்றால் பயம். வட்டத்துக்கும் பயம்.வட்டத்தின் உறவினர் வட்டத்துக்குக்கூட பயம்.
புதிய ஆட்சி வந்தபின், அது பழைய கதையா? இல்லை என்கிறார்கள்.
முன்னாள் காங்கிரஸ் எம்.எல்.ஏ. ஒருவரின் பெயரைச் சொன்னவுடன், போலீஸ்
மீண்டும் சலூட் அடிக்கும் நிலைக்கு நேற்று (ஞாயிற்றுக் கிழமை) சென்றிருக்கிறது!
பாண்டிச்சேரியிலிருந்து சென்னைக்குச் சென்ற தமிழக அரசின் ஏ.சி. பஸ், ஈ.சி.ஆர் ரோடில் சென்றுகொண்டிருந்தபோது, குறுக்கே வந்தது ஒரு ஸ்காப்பியா கார்.
பஸ் சடன் பிரேக் போட்டு நிறுத்தப்பட்டதில் சில, பயணிகளுக்குக் காயம்.
குறுக்கே வந்த காரைச் செலுத்தி வந்தவரிடம், அவர் வந்ததுதான் தவறு என்று
பயணிகள் சொல்லப்போக, அவரது வாயிலிருந்து மிரட்டலாக வந்தது-
எம்.எல்.ஏ.யின் பெயர்.

இதற்குமேல் தகராறு பண்ண முடியாது என்று, ஒருவழியாக பஸ் புறப்பட்டு
சென்னையை நோக்கிச் சென்றுகொண்டிருந்தது. திடீரென, தெலுங்குப் படக்
காட்சிபோல, போலீஸ் ஜீப் ஒன்று பஸ்ஸைத் துரத்தத் தொடங்கியது. பஸ்
நிறுத்தப்பட்டது. வந்த ஜீப் திருவான்மியூர் போலீஸ் ஸ்டேஷனைச் சேர்ந்தது.
அதற்குள் திருவான்மியூர் எஸ்ஐ.யுடன் வந்து சேர்ந்தார், ஸ்காப்பியா காரைச்
செலுத்திவந்த நபர்.மீண்டும் பயணிகள் மிரட்டப்பட்டனர். இம்முறை, ஸ்காப்பியா காரைச் செலுத்திவந்தவருடன் சேர்ந்து போலீஸ்காரர்களும் மிரட்டிவிட்டுச் சென்றார்கள்.

இதிலுள்ள மிகப்பெரிய சோகம் என்ன தெரியுமா? மிரட்டிய நபர் முன்னாள்
எம்.எல்.ஏ.கூட இல்லை. முன்னாள் காங்கிரஸ் எம்.எல்.ஏ. விடியல் சேகரின் கார்
டிரைவர்!

தமிழகத்தில் காங்கிரஸ் ஆட்சியும் இல்லை. அதன் கூட்டாளியான தி.மு.க.
ஆட்சியும் இல்லை. அப்படியிருக்கும்போது, முன்னாள் எம்.எல்.ஏ.யின் கார்
டிரைவருக்கே திருவான்மியூர் போலீஸில் இவ்வளவு செல்வாக்கு இருந்தால்,
கடந்த ஆட்சியில் எம்.எல்ஏ. வீட்டு ஆட்டுக்குட்டி, எவ்வளவு செல்வாக்குடன் இருந்திருக்கும்?

நன்றி:விறுவிறுப்பு

அது சரி....

ஐயோ என்னகே பயமா இருக்கு

முன்னால் எம்.எல்.ஏ விடியல் சேகருக்கு அவர் சார்ந்திருக்கும் கட்சி மற்றும் கூட்டணியை தவிர்த்தும் காங்கேயம் தொகுதி மக்களிடம் நல்ல பெயர் உள்ளது மக்களுடன் எளிமையாக பழக கூடியவர்.விடியல் என்பது அவர் நடத்தி வரும் பொதுநல இயக்கம் ஆகும்.இந்த செயல் சற்று ஆதிர்ச்சியாக உள்ளது...