விலைமதிப்பற்ற வைரம் என்பதை நிரூபித்து விட்டீர்கள் - ஜெயலலிதாவின் குட்டிக்கதை

ஸ்ரீரங்கத்தில் நேற்று நடந்த அரசு விழாவில் பேசிய ஜெயலலிதா, கடந்த தேர்தலில் பெற்ற வெற்றி குறித்து மக்களுக்கு பாராட்டு தெரிவிக்கும் விதத்தில் ருசிகரமான ஒரு குட்டிக்கதையை கூறி விளக்கினார்.

அதன் விவரம் வருமாறு:-

குரு - சீடன்

ஒரு சீடன் தன் குருவிடம் மனிதனின் மதிப்பு எவ்வளவு? என்பதை நீங்கள் தெளிவுப்படுத்த வேண்டும் என்று கேட்டான். அதற்கு குரு தன்னிடம் உள்ள ஒரு வைர கல்லை கொடுத்து இதை கடைவீதிக்கு எடுத்து சென்று பல வியாபாரிகளிடம் காண்பித்து இதன் மதிப்பு என்ன? என்று அறிந்து வா என்றார். எக்காரணத்தை கொண்டும் வைரக்கல்லை விற்கக்கூடாது என்றும் அறிவுறுத்தி அனுப்பினார்.

சீடன் கடைவீதிக்கு சென்று ஒரு ஆரஞ்சு பழ வியாபாரியிடம் வைரக்கல்லை காட்டி, இதனை நான் விற்க விரும்புகிறேன். நீங்கள் என்ன விலை கொடுப்பீர்கள் என்றார். அதற்கு அந்த வியாபாரி 2 ஆரஞ்சு பழம் கொடுக்கிறேன் என்றார். பின்னர் உருளைக்கிழங்கு வியாபாரியிடம் வைரக்கல்லை காண்பித்து இதற்கு என்ன விலை கொடுக்கிறீர்கள் என்று கேட்டார். அதற்கு அவர், 4 கிலோ உருளைக்கிழங்குகள் தருகிறேன் என்றார்.

இதேபோல் மளிகை கடை வியாபாரியிடம் சென்று கேட்டான். அவர் கொஞ்சம் அரிசி மற்றும் பருப்பு தருவதாக கூறினார். தங்க நகை வியாபாரியோ, ஆயிரம் ரூபாய் கொடுப்பதாக கூறினார். கடைசியாக பெரிய வைர நகை வியாபாரியிடம் சென்று அந்த வைரத்தை சீடன் காண்பித்தார். அந்த வைரத்தை பரிசோதித்த அவர், இது நல்ல வைரம் இதற்கு எவ்வளவு வேண்டுமானாலும் தரலாம் என்றார்.

சீடனுக்கு ஒரே குழப்பமாக இருந்தது. தன் குருவிடம் சென்று நடந்த எல்லாநிகழ்ச்சியையும் எடுத்து கூறினார். அதற்கு குரு புன்னகைத்து மனிதன் தன்னை ஆரஞ்சு பழத்துக்கும் விற்கலாம். உருளை கிழங்குக்கும் விற்கலாம். அரிசி, பருப்புக்கும் விற்று கொள்ளலாம். ஆயிரம் ரூபாய்க்கும் விற்று கொள்ளலாம். ஆனால் மனிதன் கிடைத்ததற்கரிய வைரம் என்று கூறினார் குரு.

நிரூபித்துவிட்டீர்கள்

இதை நீங்கள் இந்த தேர்தல் மூலம் நிரூபித்து இருக்கிறீர்கள். இதன் மூலம் மக்களின் சக்தியையும், விலை மதிப்பற்ற தன்மையையும் இந்த நாட்டுக்கு பறைசாற்றி இருக்கிறீர்கள். உங்கள் மதிப்பை குறைத்து எடைபோட்டவர்களை அப்புறப்படுத்தி இருக்கிறீர்கள்.

இவ்வாறு ஜெயலலிதா கூறினார்.

தினதந்தி