கற்பழிப்பு முயற்சியின் போது சிறுமிக்கு கத்திக்குத்து. இரண்டு கண்களையும் இழந்தார்

உத்தரபிரதேச மாநிலத்தில் கற்பழிப்பு முயற்சியின் போது சிறுமிக்கு கத்திக்குத்து: இரண்டு கண்களையும் இழந்தார்


கன்னோசி, ஜுன்.20- உத்தரபிரதேச மாநிலத்தில் சிறுமியை கற்பழிக்க முயற்சித்த இரண்டு வாலிபர்கள், அந்த சிறுமி அலறியதால் கத்தியால் குத்தினர். அதில், சிறுமியின் கண்களில் படுகாயம் ஏற்பட்டது. மற்றொரு இடத்தில், துப்பாக்கி முனையில் இளம்பெண் கற்பழிக்கப்பட்டார்.

போலீஸ் நிலையத்தில்

உத்தரபிரதேச மாநிலத்தில் தலித் இனத்தை சேர்ந்தவர்களுக்கு எதிரான வன்முறை அதிகரித்து வருகிறது. ஏற்கனவே, சில வாரங்களுக்கு முன் தலித் இனத்தை சேர்ந்த 14 வயது சிறுமி, போலீஸ் நிலையத்திலேயே கற்பழித்து கொல்லப்பட்டார். இதன் தொடர்ச்சியாக, அந்த போலீஸ் நிலையத்தில் பணியாற்றிய 11 போலீசார் சஸ்பெண்டு செய்யப்பட்டனர்.

இந்த நிலையில், கன்னோசி மாவட்டம் கட்வா புஜுர்க் கிராமத்தில் மற்றொரு அதிர்ச்சியான சம்பவம் நடந்துள்ளது. அந்த கிராமத்தை சேர்ந்த 14 வயது தலித் சிறுமி ஒருவரை அதே கிராமத்தை சேர்ந்த திலீப், நிரஞ்சன் யாதவ் ஆகிய இரண்டு வாலிபர்கள் வழிமறித்து கற்பழிக்க முயற்சி செய்தனர். ஆனால், அந்த சிறுமி அலற தொடங்கினார்.

கண்களில் கத்திக்குத்து

அதைத்தொடர்ந்து, கையில் வைத்திருந்த கத்தியால் அந்த சிறுமியின் முகத்தில் அந்த வாலிபர்கள் மாறி மாறி குத்தினார்கள். அதில், சிறுமியின் இடது கண்ணில் பலத்த காயம் ஏற்பட்டது. வலது கண்ணிலும் கத்தி பாய்ந்தது. அதன்பிறகு, அங்கிருந்து ஓடிவிட்டனர். இதுகுறித்து, சிறுமியின் குடும்பத்தினர் போலீசில் புகார் செய்தபோது, அங்கிருந்த சப்-இன்ஸ்பெக்டர் சிவசங்கர் சிங், சிறுமியின் வாக்குமூலத்தை பதிவு செய்ய மறுத்து விட்டார்.

மாநில அளவில் இந்த விவகாரம் எதிரொலித்ததும், உயர் அதிகாரிகள் தலையிட்டு சப்-இன்ஸ்பெக்டர் சிவசங்கர், போலீஸ்காரர் பக்ருதீன் ஆகியோரை சஸ்பெண்டு செய்தனர். கற்பழிக்க முயற்சி செய்த நிரஞ்சன் கைது செய்யப்பட்டார். தலைமறைவாக உள்ள திலீப்பை தேடி வருகின்றனர்.

80 சதவீத பாதிப்பு

மேலும், பாதிக்கப்பட்ட சிறுமியை உயர் சிகிச்சைக்காக கான்பூருக்கு அனுப்பி வைத்தனர். அவரை பரிசோதித்த டாக்டர்கள் இடதுகண்ணில் 80 சதவீத பாதிப்பு ஏற்பட்டுள்ளதால் பார்வை திரும்ப வாய்ப்பு இல்லை என தெரிவித்துள்ளனர். வலது கண்ணிலும் கடுமையாக பாதிப்பு ஏற்பட்டுள்ளதாக கூறியுள்ளனர்.

இந்த சம்பவம் குறித்து கன்னோசி போலீஸ் சூப்பிரண்டு ராஜேந்திரசிங் நேரடியாக விசாரணை நடத்தி வருகிறார். துணை கலெக்டர் மனோஜ் சிங்காலும் சம்பவம் குறித்து விசாரித்தார். பாதிக்கப்பட்ட சிறுமிக்கு முதல்-மந்திரி பொது நிவாரண நிதியில் இருந்து நிதியுதவி பெற்று தருவதாகவும் உறுதி அளித்துள்ளார்.

மற்றொரு சம்பவம்

இதுபோல, பாஸ்தி மாவட்டத்தில் உள்ள ரானிபுர் என்ற கிராமத்திலும் தலித் இனத்தை சேர்ந்த ஒரு இளம்பெண் கற்பழிக்கப்பட்டார். அந்த கிராமத்தில் வசிக்கும் 18 வயது இளம் பெண்ணை சத்திசிங் என்பவர் வழி மறித்தார். அந்த பெண் கூச்சலிட்டதால் துப்பாக்கியால் அந்த பெண்ணை சத்திசிங் மிரட்டினார்.

அதன்பிறகு, துப்பாக்கி முனையில் அந்த பெண்ணை கதற கதற கற்பழித்தார். நேற்று முன்தினம் இரவில் இந்த சம்பவம் நடைபெற்றது. இதையடுத்து, சத்திசிங்கை போலீசார் தீவிரமாக தேடி வருகின்றனர்.

காங்கிரஸ் கண்டனம்

இதற்கிடையே, உத்தரபிரதேசத்தில் மாயாவதி ஆட்சியில் தலித் இன பெண்கள் அடுத்தடுத்து கற்பழிக்கப்பட்டு வருவதற்கு காங்கிரஸ் கட்சி கடும் கண்டனம் தெரிவித்துள்ளது. கட்சியின் மாநில தலைவர் ரீடா பகுகுணா, கட்சியின் மேலிட பொறுப்பாளர் திக் விஜய்சிங் ஆகியோர், `இந்த சம்பவங்களுக்காக மாயாவதி வெட்கப்பட வேண்டும். பெண் முதல்-மந்திரியின் ஆட்சியில் அதிகமாக எதிர்பார்த்தோம். ஆனால், பாதிக்கப்பட்ட பெண்களுக்கு ஆறுதல் கூட சொல்லாமல் போலீசாரின் தவறுகளை மூடி மறைக்க முயற்சிக்கிறார்' என தெரிவித்தனர்.

அதே நேரத்தில் தாழ்த்தப்பட்டோருக்கான தேசிய ஆணையம், குழந்தைகள் உரிமை பாதுகாப்பு தேசிய ஆணையம் ஆகியவையும் இந்த சம்பவங்களுக்கு கண்டனம் தெரிவித்ததோடு மாநில அதிகாரிகளிடம் அறிக்கை கேட்டுள்ளன

தினதந்தி