சத்யசாய்பாபா ஆசிரமத்தில் இருந்து சென்ற காரில் ரூ.35 லட்சம்

சத்யசாய்பாபா ஆசிரமத்தில் இருந்து சென்ற காரில் ரூ.35 லட்சம், வாகன சோதனையில் சிக்கியது


சத்யசாய்பாபா ஆசிரமத்தில் இருந்து சென்ற காரில் கொண்டு செல்லப்பட்ட ரூ.35 லட்சம் பணத்தை போலீசார் பறிமுதல் செய்தனர்.

ரூ.35 லட்சம்

ஆந்திர மாநிலம் அனந்தப்பூர் மாவட்டத்தில் சிலமாந்தூர் போலீஸ் நிலைய சரகத்தில் கர்நாடக மாநில எல்லைப்பகுதியில் உள்ள ஓடிகொண்டா சோதனைச் சாவடியில் நேற்று முன்தினம் இரவு போலீசார் வாகன சோதனையில் ஈடுபட்டிருந்தனர். அந்த வழியாக வேகமாக வந்த கார் ஒன்றை போலீசார் மடக்கி சோதனை நடத்தினார்கள்.

அப்போது, காரின் உள்ளே ஒரு பையில் ரூ.35 லட்சம் இருந்தது தெரிய வந்தது. இதையடுத்து, அந்த கார் மற்றும் பணத்தை போலீசார் பறிமுதல் செய்தனர். கார் டிரைவர் ஹரீஸ் என்பவரை போலீசார் கைது செய்து விசாரணை நடத்தி வருகிறார்கள்.

கடத்தப்பட்டதா?

இதுகுறித்து அனந்தப்பூர் மாவட்ட போலீஸ் சூப்பிரண்டு ஷா நவாஸ் குவாசிம் கூறுகையில், "ஓடிகொண்டா சோதனைச் சாவடியில் ரூ.35 லட்சம் பணத்துடன் சென்ற கார் ஒன்று பிடிபட்டுள்ளது. அந்த கார் சத்யசாய் மத்திய அறக்கட்டளைக்கு சொந்தமானது. கார் டிரைவரை பிடித்து பணம் எங்கு கொண்டு செல்லப்படுகிறது என்று விசாரித்து வருகிறோம்'' என்று தெரிவித்தார்.

சோதனையில் பிடிபட்ட பணமானது, புட்டபர்த்தி பிரசாந்தி நிலையத்தில் உள்ள சத்யசாய்பாபாவின் தனிப்பட்ட அறையான யஜுர் மந்திரில் இருந்து பெங்களூருக்கு கொண்டு செல்லப்பட்டதாக தகவல்கள் வெளியாகி உள்ளன. இதுகுறித்து சிலமாந்தூர் போலீசார் வழக்குப்பதிவு செய்து விசாரணை நடத்தி வருகிறார்கள்.

பஸ்சில் பணம் பறிமுதல்

இந்த நிலையில், புட்டபர்த்தி அருகே உள்ள லோசேரியா கிராமம் அருகே நடைபெற்ற சோதனையின்போது, புட்டபர்த்தியில் இருந்து பெங்களூர் செல்லும் தனியார் பஸ் ஒன்றில் 2 பைகளில் இருந்த ஏராளமான பணம் கைப்பற்றப்பட்டது. அந்த பணமும் சத்யசாய்பாபா அறக்கட்டளைக்கு சொந்தமானது என்று தெரிய வந்துள்ளது. இதுதொடர்பாக 2 பேரை பிடித்து போலீசார் விசாரித்து வருகிறார்கள்.

சாய்பாபா அறை

சத்யசாய்பாபாவின் தனிப்பட்ட அறையான யஜுர் மந்திர், அவர் உடல்நலம் குன்றி ஆஸ்பத்திரிக்கு கொண்டு செல்லப்பட்ட மார்ச் 28-ந் தேதி முதல் பூட்டியே இருந்தது. இந்த நிலையில், சத்யசாய்பாபா கடந்த ஏப்ரல் 24-ந் தேதி மரணம் அடைந்தார்.

அவருடைய அறையில் ஏராளமான தங்கம், வைரம் மற்றும் வைடூரிய ஆபரணங்கள் இருப்பதாக தகவல் வெளியாகின. கடந்த வெள்ளிக்கிழமை நடைபெற்ற ஆய்வின்போது, அந்த அறையில் 98 கிலோ தங்கம், 307 கிலோ வெள்ளி மற்றும் ரூ.11.56 கோடி ஆகியவை இருப்பதாக கண்டறியப்பட்டுள்ளது.

இந்த நிலையில், காரில் கொண்டு செல்லப்பட்ட ரூ.35 லட்சம் பணம் சிக்கி உள்ளதால், சத்யசாய் அறக்கட்டளைக்கு சொந்தமான பணத்தை அபகரிக்க சிலர் திட்டம் தீட்டி இருக்கலாம் என்று பக்தர்கள் சந்தேகிக்கிறார்கள்.

தினதந்தி