விவேக சிந்தாமணி - நல்ல தமிழ் அறிவோம்

சதாசிவம் · சதாசிவம் Sat Jun 11, 2011 2:44 pm

அழியும் ஆறு
"மூப்பில்லாக் குமரி வாழ்க்கை முனை இல்லா அரசன் வீரம்
காப்பில்லா விளைந்த பூமி கரையிலாது இருந்த ஏரி
கோப்பிலான் கொண்ட கோலம் குருஇலான் கொண்ட ஞானம்
ஆப்பில்லா சகடு போலே அழியுமென்று உரைக்கலாமே "

பருவமடையாத பெண்ணின் வாழ்க்கை, விவேகம் இல்லாத அரசனின் வீரம்
காவல்காரன் இல்லாமல் விளைந்து நிற்கும் பூமி, கரை இல்லாத ஏரி
வசதி இல்லாதவன் செய்யும் ஆடம்பரம்‌, குரு இல்லாமல் கற்கும் அறிவு
அச்சாணி இல்லாத சக்கரம் போல், ஒரு சில நாட்கள் சுழலுமே தவிர நிலையாக நில்லாமல் அழிந்து போகும் ஆறு விஷயங்கள் ஆகும்

பயன் இல்லாத ஏழு
"ஆபத்துக்கு உதவாத பிள்ளை அரும்பசிக்கு உதவாத அன்னம்
தாகத்தைத் தீராத் தண்ணீர் தரித்திரம் அறியாப் பெண்டிர்
கோபத்தை அடக்கா வேந்தன் குருமொழி கொள்ளாச் சீடன்
பாபத்தைத் தீராத் தீர்த்தம் பயனில்லை ஏழும் தானே"

"துன்பம் வரும் போது உதவாத பிள்ளை , நல்ல பசியை தீர்க்காத உணவு
தாகத்தை தீர்க்காத தண்ணீர், கணவனின் வறுமை அறிந்து செலவு செய்யாத பெண்கள்
கோபத்தை அடக்காத தலைவன், குருவின் சொல் கேளாத மாணவன்
பாவத்தை தீர்க்காத தீர்த்தம் ஆகியவைகள் பயன் இல்லாத ஏழு விஷயங்கள்"

உதவாத எட்டு
"தன்னுடன் பிறவாத் தம்பி தனைப் பெறாத் தாயார் தந்தை
அன்னியர் இடத்துத் செல்வம் அரும் பொருள் வேசி ஆசை
மன்னிய ஏட்டின் கல்வி மறுமனையாட்டி மறு வாழ்க்கை
இன்னவாம் கருமம் எட்டும் இடுக்கத்துக்கு உதவாதன்றே"

"நம் கூட பிறக்காத தம்பி, நம்மை பெறாத தாயார் தந்தை
அடுத்தவனின் செல்வம், அரும் பொருள், வேசி மேல் வைக்கும் ஆசை
தகாத நூல்களால் வரும் அறிவு, அடுத்தவனின் மனைவியுடன் வாழும் வாழ்க்கை
ஆகிய எட்டும் ஆபத்துக்கு உதவாத எட்டு விஷயங்கள்"

விவேக சிந்தாமணி - நல்ல தமிழ் அறிவோம்

விவேக சிந்தாமணி - நல்ல தமிழ் அறிவோம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக