முத்தரப்பு தொடர்: இலங்கை வெற்றி

கொழும்பு:முத்தரப்பு தொடரின் லீக் போட்டியில், பேட்டிங் மற்றும் பவுலிங்கில் சொதப்பிய இந்திய அணி, இலங்கையிடம் 139 ரன்கள் வித்தியாசத்தில் தோல்வி அடைந்தது. இலங்கை அணியின் வெற்றிக்கு ஜெயசூர்யா, மாத்திவ்ஸ் பக்கபலமாக இருந்தனர்.இந்தியா, இலங்கை, நியூசிலாந்து அணிகள் பங்கேற்கும் முத்தரப்பு ஒரு நாள் கிரிக்கெட் தொடர் இலங்கையில் நடக்கிறது. முதல் இரண்டு லீக் போட்டிகளின் முடிவில் தலா ஒரு வெற்றியை பெற்ற இந்தியா, இலங்கை அணிகள் ஏற்கனவே பைனலுக்கு தகுதி பெற்றன. நியூசிலாந்து அணி வெளியேறியது.

இதனையடுத்து நேற்று நடந்த முக்கியத்துவம் இல்லாத மூன்றாவது லீக் போட்டியில் இந்தியா, இலங்கை அணிகள் மோதின. டாஸ் ஜெயித்த இலங்கை கேப்டன் சங்ககரா, பேட்டிங் தேர்வு செய்தார்.அதிரடி துவக்கம்: இலங்கை அணிக்கு தில்ஷன், ஜெயசூர்யா அதிரடி துவக்கம் தந்தனர். நெஹ்ரா வீசிய முதல் ஓவரில் 11 ரன் எடுக்கப் பட்டது. இந்த ஜோடி முதல் விக்கெட்டுக்கு 57 ரன்கள் சேர்த்திருந்த போது, தில்ஷன் (23) அவுட்டானார். பின்னர் களமிறங்கிய ஜெயவர்தனா (17), கேப்டன் சங்ககரா (5) நீண்ட நேரம் நிலைக்க வில்லை. ஜெயசூர்யா அசத்தல்: பொறுப்பான ஆட்டத்தை வெளிப்படுத்திய ஜெயசூர்யா, அரை சதம் கடந்தார். அதிரடியாக ரன் குவித்த இவர், சதம் அடிக்கும் வாய்ப்பை நூலிழையில் தவறவிட்டார்.

13 பவுண்டரிகளுடன் 98 ரன்கள் சேர்த்தார் ஜெயசூர்யா. கண்டம்பி அரை சதம்: பின்னர் கண்டம்பி, கபுகேதரா ஜோடி பொறுப்புடன் ஆடி ரன் சேர்த்தது. 36 ரன்கள் சேர்த்து, ரன் அவுட்டானார் கபுகேதரா. மறுமுனையில் கண்டம்பி, ஒரு நாள் அரங்கில் 3 வது அரை சதம் கடந்தார். இந்திய பந்து வீச்சை நாலாபுறமும் சிதறடித்த இவர் மின்னல் வேகத்தில் ரன் குவிக்க, 50 ஓவர் முடிவில் இலங்கை அணி, 6 விக்கெட் இழப்புக்கு 307 ரன்கள் எடுத்தது. 73 பந்துகளில் 91 ரன்கள் (11 பவுண்டரி) குவித்த கண்டம்பி அவுட்டாகாமல் இருந்தார். மாத்திவ்ஸ் மிரட்டல்: சவாலான இலக்கை விரட்டிய இந்திய அணி, ஏஞ்சலோ மாத்திவ்ஸ் வேகத்தில் நிலைகுலைந்தது. தினேஷ் கார்த்திக் (16), சச்சின் (27), யுவராஜ் (16), ரெய்னா (0), கேப்டன் தோனி (8), யூசுப் பதான் (1) உள்ளிட்ட "டாப் ஆர்டர்' பேட்ஸ் மேன் கள் ஏமாற்றம் அளித்தனர். டிராவிட் (47)ஆறுதல் அளித்தார். டெயிலெண்டர்களும் ஏமாற்ற, இந்திய அணி, 37.2 ஓவர்களில் அனைத்து விக்கெட்டுகளையும் இழந்து 168 ரன்கள் மட்டுமே எடுத்து தோல்வி அடைந்தது. இலங்கை தரப்பில் மாத்திவ்ஸ் 6 விக்கெட் வீழ்த்தினார். இவரே ஆட்ட நாயகன் விருதை வென்றார்.

2வது இடம்: நேற்றைய தோல்வி மூலம் ஒருநாள் போட்டிக்கான ரேங்கிங் பட்டியலில் "நம்பர்-1' இடத்தை இழந்தது இந்திய அணி.

மீண்டும் அசத்தல்: மீண்டும் பார்முக்கு திரும்பியுள்ளார் இலங்கையின் துவக்க வீரர் ஜெயசூர்யா. கடைசியாக விளையாடிய 8 ஒரு நாள் போட் டிகளில் ஒரு அரை சதம் கூட அடிக்காத இவர், நேற்று 98 ரன் எடுத்து அசத்தினார். சர்வதேச அரங்கில் ஜெயசூர்யா அடிக்கும் 68 வது அரைசதம் இது. தவிர, இந்தியாவுக்கு எதிராக 14 வது அரை சதம்.. இலங்கை தரப்பில் மாத்யூஸ் 6 விக்கெட்டுகளை வீழ்த்தினார்.