5000 ஆசிரியர்கள் என்ன "கிழிக்கிறார்கள்" தெரியுமா?

by **கே. பாலா** Sun Jun 19, 2011 7:23 am

சென்னை: ஒன்று மற்றும் ஆறாம் வகுப்பு சமச்சீர் கல்வி பாடப்புத்தகத்தில் இடம்பெற்றுள்ள சில பக்கங்களை கிழித்து, அடித்து, மறைத்து அழிக்கும் பணியில் 5000 ஆசிரியர்கள் முழு மூச்சாக ஈடுபட்டுள்ளனர்.

உச்ச நீதிமன்ற தீர்ப்புக்கு பின்னர் இரு வகுப்புகளுக்கு (1 மற்றும் 6) மட்டும் சமச்சீர் புத்தகம் வழங்க அரசு உத்தரவிட்டதால், நேற்று காலையில் சீல் அகற்றப்பட்டது. இந்த புத்தகங்களில் தமிழ், சமூக அறிவியல் பாடங் களில் முந்தைய திமுக ஆட்சியில் கொண்டு வரப்பட்ட திட்டங்கள், திமுக கொடி வண்ணத்தில் உள்ள படங்கள், குறிப்பிட்ட சிலரின் கவிதைகள், செம்மொழி மாநாட்டு இலச்சினை படம் ஆகியவற்றை நீக்க வேண்டும் என்று அனைத்து முதன்மை கல்வி அலுவலர்களுக்கு பள்ளிக் கல்வித் துறை உத்தரவிட்டுள்ளது. இப்பகுதிகளை முழுமையாக நீக்குவதுடன், சில பகுதிகளை ஸ்டிக்கர் ஒட்டி மறைத்து, சில வரிகளை மார்க்கர் மூலம் அழித்த பின் னரே மாணவர்களுக்கு வழங்க வேண்டும் என்றும் அறிவுறுத்தப்பட்டுள்ளது.
அதன்படி ஒன்றாம் வகுப்பு தமிழ் பாடப்புத்தகத்தில் 69, 70, 79, 80, ஆங்கில பாடப்புத்தகத்தில் 53, 54, ஆகிய பக்கங்கள் கிழிக்கப்படுகின்றன. 6ம் வகுப்பு தமிழ் புத்தகத்தில் 56ம் பக்கத்தில் கவிஞர் அப்துல்ரகுமான் எ ழுதிய தாகம் என்ற புதுக்கவிதையை ஸ்ட்டிக்கர் ஒட்டி மறைக்கப்படுகிறது. 129ம் பக்கத்தில் தைத்தமிழ் புத்தாண்டே வருக என்ற பாடத்தில் 129, 130 ஆகிய பக்கங்களை முழுமையாக அகற்றி விடுகின்றனர்.
இப்பணியில் தமிழகம் முழுவதும் சுமார் 5 ஆயிரம் ஆசிரியர்கள் ஈடுபடுத்தப்பட்டுள்ளனர். இப்பணியை மேற்கொள்ள தேவையான ஸ்கேல், மார்க்கர், பச்சை நிற ஸ்டிக்கர் ஆகியவற்றை அரசே வழங்கியுள்ளது. கடந்த சில நாட்களாக நடந்து வரும் இப்பணி இன்னும் முடியவில்லை. கடந்த ஆண்டைபோல சுமார் 1.5 கோடி புத்தகங்கள் அச்சடிக்கப்பட்டிருந்ததால், முழுமையாக கிழிக்க முடியவில்லை. எனவே நாளையும் இப்பணி தொடரும் என்று ஆசிரியர்கள் தெரிவித்தனர்.

தினகரன்