போனில் ராகுல்.. “குட்பாய் தி.மு.க.”

Viruvirupu, Friday 17 June 2011, 13:39


புதுடில்லி, இந்தியா: “தி.மு.க.வின் ஆதரவை வேண்டாம் என்று நாமாக உதறினால், என்ன நடக்கும்?” இந்தக் கேள்வி போன் மூலம் கேட்கப்பட்டதில், சில தமிழக காங்கிரஸ்காரர்கள் திகைத்துப்போய் இருக்கிறார்கள். காரணம், இந்தக் கேள்வியை அவர்களிடம் கேட்ட நபர், ராகுல் காந்தி!

நேற்றைய தினம் (வியாழக்கிழமை) குறைந்தபட்சம் 4 தமிழக காங்கிரஸ் முக்கியஸ்தர்களிடம் ராகுல் காந்தி தொலைபேசியில் பேசியிருக்கிறார் என்கிறது, எமக்குக் கிடைத்த தகவல். அவர்களிடம்தான் மேலேயுள்ள கேள்வி கேட்கப்பட்டிருக்கின்றது.

நம்முடன் பேசிய காங்கிரஸ் முக்கியஸ்தர் ஒருவர் சிறிது தயக்கத்துக்குப்பின், ராகுல் காந்தி இதுபற்றிக் கேட்ட விஷயத்தை ஒப்புக்கொண்டார். தான் அறிந்தவரை வேறு மூன்று தமிழக காங்கிரஸ்காரர்களிடமும் ராகுல் காந்தி இதே கேள்வியைக் கேட்டிருப்பதாகவும் கூறினார்.

இதில் பெரிய வேடிக்கை என்னவென்றால், அவர் குறிப்பிட்ட மற்றைய மூவரில் ஒருவர், தீவிர தி.மு.க. அபிமானி என்று அறியப்பட்டவர். கடந்த காலத்தில், பலதடவைகள் வெளிப்படையாகவே தி.மு.க.வுக்கு வக்காலத்து வாங்கியவர்.

அவரிடமும் தி.மு.க.வைக் கழட்டி விடுவது பற்றிக் கேட்டதிலிருந்து, காங்கிரஸ் தலைமை இந்த ஆப்ஷன் பற்றி சீரியசாகத்தான் யோசிக்கத் தொடங்கியிருக்கின்றது என்று ஊகிக்கலாம். ஆனால், தற்போது என்ன அவசரம்?

கூட்டணி அமைக்க வேண்டிய அளவுக்கு, தமிழகத்தில் தேர்தல் ஏதும் தற்போதைக்கு இல்லை. அப்படியிருந்தும், ஏன் இதைப்பற்றி யோசிக்கின்றது காங்கிரஸ் தலைமை? அதுவும், தி.மு.க.வே விலகிச் செல்லும்வரை காத்திராமல், தாங்களாகவே தி.மு.க.வை உதறுவது பற்றி ஏன் அபிப்பிராயம் கேட்கப்படுகின்றது?

டில்லி வட்டாரங்களில், அதற்கு ஒரு பதில் சொல்கிறார்கள்.

ஏற்கனவே எதிர்ப்புப் போராட்டங்கள், உண்ணாவிரதங்கள் என்று காங்கிரஸ் கட்சிக்கு பெயர் கெட்டுப்போயிருப்பதாக உளவு அறிக்கை கூறுகின்றனதாம்.அரசுக்கு எதிரான மனோபாவம் மக்களிடையே அதிகரித்து வருகின்றது எனவும் அந்த அறிக்கையில் குறிப்பிடப்பட்டுள்ளதாம்.

இந்த நிலையில், தி.மு.க.வின் ஊழல் வழக்குகள் பற்றிய விபரங்கள் இந்தியா முழுவதிலும், டீ.வி. சீரியல்போல சக்கை போடு போடுகின்றன. ஸ்பெக்ட்ரம் ஊழல் பற்றி தினமும் புதிது புதிதாக ஏதாவது ஒரு கதை, வட இந்தியப் பத்திரிகைகளில் பிரபலமாக்கப்படுகின்றது.

முன்பெல்லாம், தென்னிந்திய மாநிலச் செய்திகளை, டில்லிப் பத்திரிகைகளில் 5ம் பக்கத்துக்குப் பிறகுதான் ஒரு ஓரமாகத்தான் பார்க்கமுடியும். ஆனால் இப்போது, வாரத்தில் மூன்று நாட்களாவது தி.மு.க. தலைப்புச் செய்திகளில் இடம்பெறுகின்றது. நன்றி, ராசா, கனிமொழி, மற்றும் குழுவினர்.

இப்போது புதிதாக, தயாநிதி மாறன் தலைப்புச் செய்திகளில் போட்டிக்கு வந்திருக்கிறார். அதுவும் ஊழல் விவகாரம்தான்.

என்னதான் தி.மு.க. தனிக்கட்சி என்றாலும், ஊழல் வழக்கு காங்கிரஸ் அரசையும் பாதிக்கிறது என்கிறதாம் உளவு அறிக்கை. இதையடுத்தே, தி.மு.க.வை கழட்டிவிட்டால் என்ன என்ற விவாதம் காங்கிரஸ் மேல்மட்டத்தில் சீரியசாகத் தொடங்கிவிட்டதாம் என விபரித்தார் டில்லியிலுள்ள எமது தொடர்பாளர்.

தி.மு.க.வை கழட்டிவிடும் விஷயத்தில் ராகுல் காந்திதான் அதி தீவிரமாக இருக்கிறார் என்கிறார்கள்.

சோனியா காந்தியும், பிரதமரும் இன்னமும் கொஞ்சம் விட்டுப் பிடிக்கலாமே என்ற மனநிலையில் இருக்கிறார்களாம். ப.சிதம்பரத்துக்கும் தி.மு.க. கூட்டணியை உடனடியாக முறிப்பதில் அவ்வளவு இஷ்டமில்லை என்கிறார்கள்.

ஆனால், தி.மு.க. விவகாரத்தை ராகுல் காந்தி தனது கையில் எடுத்திருப்பதாகவே தென்படுகின்றது. அவர் நடவடிக்கை எடுக்கத் தொடங்கினால், நிச்சயம் தி.மு.க.வுக்குச் சாதகமாக இருக்கப்போவதில்லை.

ஒருவேளை காங்கிரஸே முன்வந்து தி.மு.க.வை உதறினால், அதை கலைஞர் எப்படி எடுத்துக் கொள்வார்?

தமிழகத்தில் ஆட்சி போய்விட்டது. மகள் ஜெயிலுக்கு போய்விட்டார். ஊழலில் மானம் போய்விட்டது. டில்லியில் மரியாதை போய்விட்டது.. இவ்வளவும் போய்விட்டது, காங்கிரஸ் கூட்டணியும் போனால், குறைந்தா போய்விடும்?

“போனால் போகட்டும் போடா”

• “விறுவிறுப்பு.காம

இவன் அவனைக் கவிழ்க்கிறான், அவன் இவனைக் கவிழ்க்கிறான். ஆனால் இரண்டுமே கூட்டணிக் கட்சிகள்! மானங்கெட்ட அரசியலில், இவர்கள் கேடுகெட்ட அரசியல்வாதிகள்!

இந்தச் செய்திக்கு பாலாவின் இந்தக் கார்ட்டூன் பொருத்தமாக இருக்கும்!

காலை வாருவது இவங்களுக்கு என்ன புதிதா?
கார்ட்டூன் சூப்பர்..

அரசியல்ல இதெல்லாம் சாதாரணமப்பா!!!!!!!!!!!!