பகீர்’ குற்றச்சாட்டில் இந்திய ராணுவம்

மீரட், இந்தியா: ஐ.நா.வின் அமைதிப்படையில் பணிபுரிந்த காலத்தில் பாலியல் பலாத்காரக் குற்றங்களில் ஈடுபட்டதாக, இந்திய ராணுவத்தின் 12 ஆபீசர்கள், மற்றும் 39 ஜவான்கள் விசாரணைக்கு உட்படுத்தப்பட்டுள்ளனர். இவர்கள் கொங்கோ நாட்டில் பணிபுரிந்த காலத்திலேயே பாலியல் குற்றங்களில் ஈடுபட்டதாகக் குற்றம்சாட்டப்பட்டுள்ளனர்.

கொங்கோவில் உள்நாட்டுப் பெண்கள்மீது இவர்கள் பாலியல் பலாத்காரம் செய்தனரா என்ற விசாரணை ஒரு பக்கமாக நடைபெறுகின்றது. கொங்கோவில் பிறந்த சில குழந்தைகளின் அப்பாவாக இவர்கள் இருக்கலாமா என, டி.என்.ஏ. சோதனைகள் மறுபக்கமாக நடைபெறுகின்றன.

ஐ.நா. அமைதிப்படையில், குறிப்பிட்ட இந்தியப் படைப்பிரிவு பணியாற்றிய காலத்தில் (2008), அங்கு பிறந்த சில குழந்தைகள் இந்திய முகச்சாயலில் இருப்பதாக ஐ.நா. தலைமையகத்தால் அறிவிக்கப்பட்டது. அதையடுத்து, அங்கு பணிபுரிந்த இந்திய ராணுவத்தின் மேற்கு கமாண்ட் படைப்பிரிவு, இந்தியாவுக்குத் திருப்பி அனுப்பப்பட்டது.

தற்போது, இந்திய ராணுவத்தின் மேற்கு கமாண்ட் படைப்பிரிவின் 12 ஆபீசர்கள், மற்றும் 39 ஜவான்கள் மீதான விசாரணை, உத்தரப் பிரதேசத்திலுள்ள மீரட் ராணுவத் தலைமையகத்தில் ஆரம்பமாகியுள்ளது. இந்திய ராணுவத்தின் ஒரு பிரிகேடியர், இரண்டு கேணல்கள் விசாரணைகளை மேற்கொள்கின்றனர்.

குற்றச்சாட்டில் சிக்கியுள்ள, இந்திய ராணுவத்தின் மேற்கு கமாண்ட் படைப்பிரிவினர், சண்டிமந்திர் ராணுவத் தளத்தைச் சேர்ந்தவர்கள்.

இதற்குமுன் 2008ல், இந்திய ராணுவத்தின் மூன்று அதிகாரிகள் பாலியல் குற்றங்களுக்காகத் தண்டனை பெற்றுள்ளனர். அவர்கள் ஐ.நா. அமைதிப்படை பணியிலிருந்த காலத்தில், தென்னாபிரிக்காவில் பாலியல் பலாத்காரக் குற்றங்களைப் புரிந்தது நிரூபிக்கப்பட்டிருந்தது.

2007ம் ஆண்டில் மற்றொரு வில்லங்கமான குற்றச்சாட்டில், இந்திய ராணுவத்தினர் சிக்கியிருந்தனர்.

கொங்கோ நாட்டில், தீவிரவாதிகளுக்கு உணவும் கொடுத்து, ராணுவ நகர்வுகள் பற்றிய தகவல்களையும் முன்கூட்டியே கொடுத்தனர் என்பதே இந்திய ராணுவத்தினர் மீது ஐ.நா.வால் வைக்கப்பட்ட குற்றச்சாட்டு.

ராணுவத்தினர், கொடுத்த உணவுக்கும், உளவுத் தகவல்களுக்கும் ‘பண்டமாற்றாக’, தீவிரவாதிகளிடம் இருந்து தங்கத்தைப் பெற்றுக்கொண்டனர் என நிரூபிக்கப்பட்டு, தண்டனை பெற்றனர்!


விறுவிறுப்பு