நடத்தையில் சந்தேகத்தால் விபரீதம்: அழகுநிலைய பெண் கொடூர கொலை

by **சிவா** Thu Jun 16, 2011 9:22 am

திருச்சியில் நடத்தையில் ஏற்பட்ட சந்தேகத்தால் அழகு நிலைய பெண் கொடூரமான முறையில் கொலை செய்யப்பட்டார். இது தொடர்பாக கணவரை போலீசார் கைது செய்தனர்.

அழகு நிலைய பெண்

திருச்சி பாபு ரோட்டை சேர்ந்தவர் ரவி என்கிற ரவிச்சந்திரன். இவரது மனைவி லதா (வயது 36). இவர்களுக்கு 11 ஆண்டுகளுக்கு முன்பு திருமணம் நடைபெற்றது. இவர்களுக்கு சாலினி (10) என்ற மகளும், அஜெய் (4) என்ற மகனும் உள்ளனர்.

லதா திருச்சி பீமநகரில் ஒரு அழகுநிலையம் நடத்தி வந்தார். இதனால் தினமும் பணி முடிந்து இரவில் தாமதமாக வருவது வழக்கம். இதனை ரவிச்சந்திரன் தட்டிக்கேட்டார். அழகு நிலையத்தில் பணிகளை சீக்கிரம் முடித்து விட்டு வீட்டுக்கு வருமாறு அறிவுத்தினார். இதனால் அவர்களுக்கு இடையே பிரச்சினை இருந்து வந்தது.

இந்த நிலையில் பாபு ரோட்டில் உள்ள வீட்டை மாற்றி திருச்சி ஜான் தோப்பு பாரதியார் தெருவிற்கு நேற்று முன்தினம் இடம்பெயர்ந்தனர்.

குடிபோதையில் தாக்குதல்

புதிய வீட்டில் நேற்று காலை பால்காய்ச்சும் நிகழ்ச்சி நடைபெறுவதாக இருந்தது. இதற்காக லதா தனது தாய் சாந்தாவிடமும் தெரிவிப்பதாக நேற்று முன்தினம் இரவு அருகில் உள்ள தாய் வீட்டிற்கு சென்றிருந்தார். வீட்டில் ரவிச்சந்திரன் மற்றும் அவரது குழந்தைகள் படுத்து தூங்கிக்கொண்டிருந்தனர். இந்த நேரத்தில் குடிபோதையில் படுத்திருந்த ரவிச்சந்திரன் தனது மனைவி இல்லாததை கண்டு சந்தேகமடைந்தார்.

வீட்டில் இருந்து திரும்பி வந்த லதாவிடம், இது குறித்து ரவிச்சந்திரன் சந்தேகத்துடன் கேட்டார். இதனால் மீண்டும் அவர்களுக்கிடையே தகராறு ஏற்பட்டது. இதில் வீட்டின் உள்கதவை பூட்டிவிட்டு லதாவை வீட்டில் உள்ள டேபிள் பேன் மீது ரவிச்சந்திரன் தள்ளினார். இதில் முகத்தில் படுகாயமடைந்த அவர் ரத்த வெள்ளத்தில் மயங்கி விழுந்தார்.

கொடூர கொலை

மேலும் ஆத்திரம் தீராத ரவிச்சந்திரன் அருகில் கிடந்த ஸ்குருடிரைவரை எடுத்து லதாவின் கழுத்தில் ஓங்கி குத்தினார். இதில் ஸ்குரூடிரைவர் அவரது கழுத்தின் மறுபக்கம் ரத்தம் வடிந்த நிலையில் வெளியே வந்தது. மேலும் கழுத்தில் இருந்து ரத்தம் பீறிட்டு வழிந்தது. அப்போது லதா உயிருக்கு போராடினார்.

இதனால் அவள் எப்படியும் பிழைத்துவிடுவாள் என்று எண்ணி ஜன்னல் கண்ணாடிகளை உடைத்து கண்ணாடியால் அவரது கழுத்தை அறுத்தார். இதில் லதா பரிதாபமாக இறந்தார். அவர் இறந்ததும் அங்கிருந்து ரவிச்சந்திரன் தப்பியோடினார்.

கணவர் கைது

இந்த நிலையில் வீட்டில் லதா ரத்த வெள்ளத்தில் இறந்து கிடப்பதை நேற்று அதிகாலை 4.30 மணி அளவில் அவரது சகோதரர் விஜய்ஆனந்த் மற்றும் அருகில் உள்ளவர்கள் பார்த்தனர். தகவல் அறிந்த போலீசார் சம்பவ இடத்திற்கு விரைந்து சென்றனர்.

மேலும் பிணத்தை கைப்பற்றி பிரேத பரிசோதனைக்காக திருச்சி அரசு ஆஸ்பத்திரிக்கு அனுப்பி வைத்தனர். போலீசார் விசாரணையில் மேற்கண்ட தகவல்களும், மனைவியின் நடத்தையில் சந்தேகத்தால் அவரை கொடூரமான முறையில் கொலை செய்ததும் தெரியவந்தது.

இதையடுத்து தப்பியோடிய ரவிச்சந்திரனை போலீசார் கைது செய்தனர்.

தினதந்தி