விமானம் பறப்பதற்கு முன்பு...

நாம் இன்றைக்கு பார்க்கும் விமானம் முழுமையான வடிவம் பெறுவதற்கு முன்பு, பல விஞ்ஞானிகள் பல கண்டுபிடிப்புகளின் முடிவுகளால் கொஞ்சம் கொஞ்சமாக மேம்படுத்தப்பட்டது. பலரின் கண்டுபிடிப்பு இதில் அடங்கியிருக்கிறது.

அபுல் காசிம் அப்பாஸ் பின் பிர்னாஸ் என்ற அரேபியர் பறப்பது குறித்து நிறைய சோதனைகள் செய்தார். கி.பி. 875-ம் ஆண்டில் பருந்தின் சிறகுகளைத் தன் உடலில் ஒட்டிக் கொண்டு, ஒரு கோபுர உச்சியிலிருந்து குதித்தார். கொஞ்ச தூரம் பறந்து பிறகு கீழே விழுந்தார்.

பின்னர் ஈரானியர் ஒருவர் இதேபோல் முயற்சி செய்தபோது படுகாயம் அடைந்து உயிரிழந்தார். ஒரு இங்கிலாந்துகாரர் இதே போல் பறக்க முயற்சித்தபோது கால்கள் முறிந்தது.

சில கண்டுபிடிப்பாளர்கள் பலூன்களை பயன்படுத்தித்தான் பறக்க முடியும் என்று நம்பினர். ஆனால் ஓட்டோ லிலின்தால் என்பவர், காற்றைவிட எடை மிகுந்த கருவியால்தான் பறக்க முடியும் என எண்ணினார். பழங்கால கிளைடரை உருவாக்கி, 1890-ம் ஆண்டில் பறந்து சோதனை செய்தார். இதில் 750 அடிதூரம் பறந்தார். முறையாக பறப்பதற்கு கட்டுப்பாட்டுச் சாதனங்கள் மிக அவசியம் என்று கண்டுபிடித்தார். இவரும் 1896-ம் ஆண்டில் சோதனை முயற்சியில் உயிரிழந்தார்.

லிலின்தாலின் கிளைடர்கள் மற்றும் அவருடைய மரணத்தை அறிந்த ரைட் சகோதரர்கள், பறத்தல் முயற்சிகள் பற்றிய அனைத்து தகவல்களையும் சேகரித்தார்கள். முன்னோடிகளின் யோசனைகளை மெருகேற்றித் தங்கள் சொந்த யோசனைகளையும் சேர்த்து `ப்ளேயர்' என்ற பறக்கும் சாதனத்தை உருவாக்கினார்கள். ப்ளேயர் பறக்கும் சோதனையில் வெற்றி கிடைத்த செய்தி உலகெங்கும் பரவியது.

1905-ம் ஆண்டில் அவர்கள் வடிவமைத்த ப்ளேயர் தொடர்ந்து அரைமணி நேரம் பறந்தது. மணிக்கு 50 கி.மீ. வேகத்தில் பறந்த செய்தியை கேட்டு உலகமே வியந்தது.

அதன்பின்னர், பறக்கும் கருவியை மேம்படுத்தி, இருவரும் அமெரிக்காவிலும், ஐரோப்பாவிலும் நிறையவே பறந்து காட்டினார்கள். இதன் மூலம் மனிதனின் பறக்கும் எண்ணம் வெற்றிகரமாக நிறைவேறியது. பறக்கும் முயற்சியில் உயிரை விட்ட எத்தனையோ பேரின் முயற்சியும் இதற்கு முக்கிய காரணம்!

தினதந்தி