ஐ.ஏ.எஸ்., தேர்வில் 20 ஆயிரம் பேர் பங்கேற்பு

சென்னை: ஐ.ஏ.எஸ்., - ஐ.பி.எஸ்., உள்ளிட்ட உயர் பதவிகளுக்கான முதல்நிலை தேர்வு, நாடு முழுவதும் நேற்று நடந்தது. தமிழகத்திலிருந்து 20 ஆயிரத்திற்கும் மேற்பட்டோர் இத்தேர்வை எழுதினர்.

மத்திய அரசு பணியாளர் தேர்வாணையம்(யு.பி.எஸ்.சி.,) சார்பில், ஐ.ஏ.எஸ்., - ஐ.பி.எஸ்., - ஐ.எப்.எஸ்., உள்ளிட்ட உயர் பதவிகளுக்கான தேர்வுகள் ஆண்டுதோறும் நடத்தப்படுகிறது. இந்த ஆண்டுக்கான, சிவில் சர்வீஸ் பதவிகளுக்கான முதல்நிலை தேர்வு, நாடு முழுவதும் 45 நகரங்களில் நேற்று நடந்தது. இதில், மூன்று லட்சத்து 25 ஆயிரத்திற்கும் மேற்பட்டோர் பங்கேற்றனர். தமிழகத்தில், சென்னை, சைதாப்பேட்டை அரசு மேல்நிலைப் பள்ளி, எழும்பூர் மாநில பெண்கள் மேல்நிலைப் பள்ளி உள்ளிட்ட 20 மையங்கள், மதுரையில் மூன்று மையங்கள், ஆகியவற்றில் 20 ஆயிரத்துக்கும் மேற்பட்டோர் இத்தேர்வை எழுதினர்.

இத்தேர்வில் வெற்றிபெறுவோர், வரும் அக்டோபரில் நடக்கும் முதன்மை தேர்வுக்கு தகுதிபெறுவர்.முதல்நிலை தேர்வில் இதுவரை, பொதுஅறிவு மற்றும் விருப்பப் பாடம் ஆகிய இரண்டு வினாத் தாள்கள் இடம்பெற்று வந்தன. இந்த ஆண்டு, விருப்பப் பாடத்திற்கு பதிலாக, ஆங்கிலம், கணிதம், "ரீசனிங்' உள்ளிட்ட பாடங்கள் அடங்கிய, "சி-சாட்' எனும் சிறப்பு, "ஆப்டிடியூட்' தேர்வுமுறை புதிதாக அறிமுகப்படுத்தப் பட்டுள்ளது குறிப்பிடத்தக்கது.

"பொது அறிவு வினாத்தாளில், சுற்றுச்சூழல், புவியியல் தொடர்பான கேள்விகள் அதிகம் கேட்கப்பட்டிருந்தன. "சி-சாட்' வினாத்தாளில், ஆங்கிலம் தொடர்பான கேள்விகள் அதிகம் கேட்கப்பட்டதால், கிராமப்புற மாணவர்கள் இத்தேர்வை எழுத சற்று சிரமப்பட்டனர்' என, சென்னை, அண்ணாநகர், சங்கர் ஐ.ஏ.எஸ்., அகடமியின் நிர்வாகி சங்கர் தெரிவித்தார்.

மேலும், மதுரையில் மத்திய தேர்வாணையம் சார்பில், நேற்று ஐ.ஏ.எஸ்., - ஐ.பி.எஸ்., முதற்கட்ட தேர்வு, 12 மையங்களில் நடந்தது. இதில், மொத்தம் 5,030 பேர் பங்கேற்றனர். தேர்வை கண்காணிக்க, கலெக்டர் சகாயம், டி.ஆர்.ஓ., முருகேஷ் தலைமையில் சப்-கலெக்டர்களை கொண்ட 5 தனிப்படைகள் அமைக்கப்பட்டன.

தினமலர்

மாணவர்களிடம் ஏற்பட்டுள்ள இந்த முன்னேற்றம், வரவேற்கத்தக்கது. தமிழக மாணவர்கள் ஐ ஏ எஸ், ஐபிஎஸ் தேர்வில், முதலிடம் பிடிக்க வாழ்த்துகிறேன்.....