ரூ. 3 கோடியை நீதிமன்றத்தில் செலுத்துவதாக நடிகை ஸ்ரீதேவி உத்தரவாதம்

ரூ. 3 கோடியை நீதிமன்றத்தில் செலுத்துவதாக நடிகை ஸ்ரீதேவி உத்தரவாதம்




சென்னை, செப். 11: நடிகர் சல்மான்கான் நடிக்கும் ஹிந்தி படம் தொடர்பான வழக்கில் ரூ. 3 கோடியை நீதிமன்றத்தில் செலுத்துவதாக நடிகை ஸ்ரீதேவி தரப்பில் உத்தரவாதம் வழங்கப்பட்டுள்ளது.

பிரபுதேவா இயக்கத்தில் தமிழில் விஜய் நடித்து வெளியான திரைப்படம் "போக்கிரி'. ஹிந்தியில் இந்தப் படம் "வாண்டட்' என்ற பெயரில் ரீமேக் செய்யப்படுகிறது.

சல்மான்கான் நடிக்கும் இந்தப் படத்தை, பிரபுதேவா இயக்குகிறார். இந்தப் படத்தை நடிகை ஸ்ரீதேவி, அவரது கணவர் போனி கபூர், போனி கபூரின் தந்தை சுரேந்தர கபூர் ஆகியோர் இணைந்து தயாரிக்கின்றனர்.

இந்தப் படத்தை வெளியிட தடை கோரி ஜி.ஜி. போட்டோ லிமிடெட் என்ற நிறுவனம் சார்பில் உயர் நீதிமன்றத்தில் மனு தாக்கல் செய்யப்பட்டது.

மனு விவரம்:

"வாண்டட்' படத்துக்காக எங்கள் நிறுவனத்திடமிருந்து நடிகை ஸ்ரீதேவி உள்ளிட்டோர் ரூ. 8 கோடி கடன் பெற்றிருந்தனர். ஒப்பந்தப்படி, எங்கள் கடனை அடைத்துவிட்டுதான் அவர்கள் படத்தை ரிலீஸ் செய்ய வேண்டும். ஆனால், எங்கள் கடனை அடைக்காமலேயே படத்தை ரிலீஸ் செய்ய விளம்பரம் செய்யப்பட்டு வருகிறது.

எங்களது கடனை அடைக்கும் வரையில் படத்தை வெளியிடுவதற்குத் தடை விதிக்க வேண்டும் என்று மனுவில் கோரப்பட்டது.

இந்த மனுவை விசாரித்த நீதிமன்றம், நடிகை ஸ்ரீதேவி, போனி கபூர், சுரேந்தர கபூர் ஆகியோர் ரூ. 3.6 கோடியை வங்கியில் செலுத்த வேண்டும். ரூ. 5 கோடிக்கு சொத்து உத்தரவாதத்தை அளிக்க வேண்டும் என்று உத்தரவிட்டது.

இல்லையென்றால் செப்டம்பர் 16-ம் தேதிக்குப் பிறகு படத்தை வெளியிட தடை அமலுக்கு வரும் என்றும் உத்தரவில் குறிப்பிடப்பட்டது.

இந்த உத்தரவை எதிர்த்து ஸ்ரீதேவி உள்ளிட்டோர் உயர் நீதிமன்றத்தில் மேல்முறையீடு செய்தனர்.

நீதிபதி எம். சொக்கலிங்கம், நீதிபதி ஆர். சுப்பையா ஆகியோர் கொண்ட டிவிஷன் பெஞ்ச் முன்னிலையில் இந்த வழக்கு வெள்ளிக்கிழமை விசாரணைக்கு வந்தது.

மனுவை விசாரித்த பிறகு நீதிபதிகள் பிறப்பித்த உத்தரவு:

இந்த வழக்குத் தொடர்பாக, நடிகை ஸ்ரீதேவி ரூ. 3 கோடியை செப்டம்பர் 16-ம் தேதிக்குள் நீதிமன்றத்தில் செலுத்துவதாக உத்தரவாதம் அளித்துள்ளார்.

ஸ்ரீ தேவி படத் தயாரிப்பு நிறுவனம், ஜி.ஜி. போட்டோ லிமிடெட் ஆகியவற்றுக்கிடையே ஒப்பந்தம் போடப்பட்டதா? என்பது உள்ளிட்டவை குறித்து ஆவணங்களை ஆராய்ந்த பிறகே முடிவு செய்ய முடியும் என்று நீதிபதிகள் உத்தரவில் தெரிவித்துள்ளனர்.