மேற்கிந்தியத்தீவுகளுக்கு எதிராக இன்று 3-வது ஆட்டம்

மேற்கிந்தியத்தீவுகளுக்கு எதிரான 3-வது ஒருநாள் கிரிக்கெட் ஆட்டம் ஆன்டிகுவாவில் சனிக்கிழமை நடைபெறுகிறது.
மொத்தம் 5 ஆட்டங்கள் கொண்ட ஒருநாள் போட்டித் தொடரில் ஏற்கெனவே முதல் இரண்டு ஆட்டங்களில் வென்றுள்ள இந்திய அணி, இந்த ஆட்டத்திலும் வென்று தொடரைக் கைப்பற்றும் நோக்கத்தில் களம் இறங்குகிறது. இந்திய நேரப்படி மாலை 6.30 மணிக்கு ஆட்டம் தொடங்குகிறது. டென் கிரிக்கெட் சேனலில் நேரடியாக ஒளிபரப்பாகிறது.

மேற்கிந்தியத்தீவுகள் அணியில் மாற்றம்: தொடர்ந்து இரண்டு ஆட்டங்களில் தோல்வியடைந்துள்ள மேற்கிந்தியத்தீவுகள் அணியில் பேட்ஸ்மேன் பிராவோ, வேகப்பந்து வீச்சாளர் ரவி ராம்பால் ஆகியோருக்கு ஓய்வு அளிக்கப்பட்டுள்ளது. அவர்களுக்கு பதிலாக டான்சா ஹெய்ட், கெமர் ரோச் ஆகியோர் அணியில் இடம் பெற்றுள்ளனர். ஹெய்ட் இந்திய அணிக்கு எதிரான 20 ஓவர் போட்டியில் விளையாடினார் என்பது குறிப்பிடத்தக்கது.

கெய்லுக்கு இடமில்லை: தொடர்ந்து இரு தோல்விகளைக் கண்டுள்ளதால் அதிரடி தொடக்க ஆட்டக்காரர் கிறிஸ் கெய்லுக்கு அணியில் மீண்டும் இடம் கிடைக்கலாம் என்ற செய்திக்கு மேற்கிந்தியத்தீவுகள் அணி நிர்வாகம் முற்றுப்புள்ளி வைத்து விட்டது. இந்தியாவுக்கு 3-வது ஓருநாள் ஆட்டத்தில் பங்கேற்கும் அணியில் அவர் சேர்த்துக் கொள்ளப்படவில்லை. இந்திய அணியைப் பொறுத்தவரை எவ்வித மாற்றமும் செய்யப்படவில்லை. முதல் இரண்டு
ஆட்டங்களில் பங்கேற்ற அணியே இந்த ஆட்டத்திலும் களம் இறங்கவுள்ளது. இந்திய அணியில் முன்னணி வீரர்கள் யாரும் இல்லாத நிலையிலும், சுரேஷ் ரெய்னா தலைமையில் விளையாடி வரும் இளம் வீரர்கள் தொடர்ந்து இரண்டு ஆட்டங்களில் வெற்றி பெற்ற உற்சாகத்தில் உள்ளனர். இந்த ஆட்டத்திலும் வென்று தொடரைக் கைப்பற்ற வேண்டுமென்ற முனைப்பில் அவர்கள் களம் இறங்குவார்கள் என்பதில் சந்தேகமில்லை. இந்திய ரசிகர்களின் எதிர்பார்ப்பும் அதுதான்.

இந்திய அணி: சுரேஷ் ரெய்னா (கேப்டன்), ஷிகர் தவாண், பார்த்திவ் படேல், விராட் கோலி, ரோஹித் சர்மா, எஸ். பத்ரிநாத், யூசுப் பதான், ஹர்பஜன் சிங், அமித் மிஸ்ரா, பிரவீண் குமார், முனாஃப் படேல், இஷாந்த் சர்மா.

மேற்கிந்தியத்தீவுகள் அணி: டேரன் சமி (கேப்டன்), கார்ல்டன் பெüச், தேவேந்திர பிஷு, எட்வர்ஸ், டான்சா ஹெய்ட், அந்தோனி மார்ட்டீன், பொல்லார்டு, ஆன்ரே ரஸல், மார்லன் சாமுவேல்ஸ், சர்வான், சிம்மன்ஸ்.

நன்றி தினமணி