ஏழாவது நாளாக உண்ணாவிரதம் பாபா ராம்தேவ், ஆஸ்பத்திரிக்கு கொண்டு செல்லப்பட்டார்

7-வது நாளாக உண்ணாவிரதத்தில் ஈடுபட்ட பாபா ராம்தேவின் உடல்நிலை மிகவும் மோசம் அடைந்ததால், அவர் ஆஸ்பத்திரிக்கு கொண்டு செல்லப்பட்டு தீவிர சிகிச்சை பிரிவில் அனுமதிக்கப்பட்டார்.

7-வது நாளாக நீடிப்பு

ஊழல் மற்றும் கறுப்பு பணத்துக்கு எதிராக 46 வயதான யோகா குரு பாபா ராம்தேவ், உத்தரகாண்ட் மாநிலம் ஹரித்துவாரில் உள்ள தனது பதாஞ்சலி யோகா பீட ஆசிரமத்தில் காலவரையற்ற உண்ணாவிரத போராட்டத்தை தொடங்கினார். அவருடன் 183 தொண்டர்களும் உண்ணாவிரதத்தில் ஈடுபட்டனர்.

தொடர் உண்ணாவிரத்தின் காரணமாக பாபா ராம்தேவின் உடல் நலம் பாதிக்கப்பட்டு எடை குறைந்தது. நேற்று முன்தினம் மாவட்ட கலெக்டர் மீனாட்சி சுந்தரம் நேரில் சந்தித்து உண்ணாவிரதத்தை கைவிடுமாறு கேட்டுக் கொண்ட போதிலும் அவர் போராட்டத்தை கைவிட மறுத்து விட்டார். பின்னர் கலெக்டர் கேட்டுக் கொண்டதன் பேரில் பழச்சாறு மற்றும் தேன் மட்டும் அருந்தினார்.

இந்த நிலையில் நேற்று 7-வது நாளாக ராம்தேவின் உண்ணாவிரத போராட்டம் நீடித்தது.

உடல்நிலை மோசம் அடைந்தது

நேற்று காலை டாக்டர்கள் பாபா ராம்தேவின் உடல்நிலையை பரிசோதித்தனர். அப்போது அவரது ரத்த அழுத்தம் 104-70 என்ற அளவில் குறைவாக இருந்தது. நாடித்துடிப்பும் வினாடிக்கு 58 என்ற அளவில் மிகவும் குறைந்து இருந்தது. அத்துடன் உடலில் நீர்ச்சத்தும் குறைந்தது.

இது மிகவும் கவலை அளிக்கக்கூடிய வகையில் இருந்ததால் பாபா ராம்தேவை ஆஸ்பத்திரியில் சேர்த்து சிகிச்சை அளிக்குமாறு அவரது உடல்நிலையை பரிசோதித்த தலைமை மருத்துவ அதிகாரி யோகேஷ் சந்திர சர்மா யோசனை தெரிவித்தார். பழச்சாறு சாப்பிட்ட பிறகும் ராம்தேவின் உடல்நிலையில் குறிப்பிடத்தக்க முன்னேற்றம் ஏற்படவில்லை என்றும், குளுக்கோஸ் சாப்பிடுமாறு கேட்டுக் கொண்டும் அவர் மறுத்து விட்டார் என்றும் யோகேஷ் சந்திர சர்மா கூறினார்.

ஆஸ்பத்திரியில் அனுமதி

இதுபற்றிய தகவல் கிடைத்ததும் உத்தரகாண்ட் முதல்-மந்திரி ரமேஷ் போக்ரியால், பாபா ராம்தேவை ஆஸ்பத்திரியில் சேர்த்து உரிய சிகிச்சை அளிக்க ஏற்பாடு செய்யுமாறு ஹரித்துவார் மாவட்ட கலெக்டர் மீனாட்சி சுந்தரத்துக்கு உத்தரவிட்டார்.

இதைத் தொடர்ந்து, பாபா ராம்தேவை, பதாஞ்சலி யோகா பீட ஆசிரமத்தில் இருந்து, பலத்த போலீஸ் பாதுகாப்புடன், 25 கிலோ மீட்டர் தொலைவில் டேராடூன் நகரில் உள்ள இமாலயன் மருத்துவ விஞ்ஞான கழக ஆஸ்பத்திரிக்கு கொண்டு சென்றனர். அவரை ஆம்புலன்சு வாகனத்தில் ஏற்றிய போது போது, தொண்டர்கள் அதற்கு எதிர்ப்பு தெரிவித்து போலீசாருடன் வாக்குவாதத்தில் ஈடுபட்டனர். சிலர் மோதலிலும் ஈடுபட்டனர். இதனால் சிறிது குழப்பம் ஏற்பட்டது. அவர்களை ஆசிரம நிர்வாகிகள் சமாதானப்படுத்தினார்கள்.

தீவிர சிகிச்சை

இமாலயன் மருத்துவ விஞ்ஞான கழக ஆஸ்பத்திரியின் தீவிர சிகிச்சை பிரிவில் ராம்தேவ் அனுமதிக்கப்பட்டு உள்ளார். அவருக்கு டாக்டர்கள் தீவிர சிகிச்சை அளித்து வருகிறார்கள். அவருக்கு குளுக்கோசும் ஏற்றப்பட்டது.

ராம்தேவின் உடல்நிலையில் முன்னேற்றம் ஏற்பட்டு இருப்பதாகவும், அவரது கல்லீரலின் செயல்பாட்டில் லேசாக பாதிப்பு இருப்பதாகவும், சிறுநீரகம் நன்றாக இயங்குவதாகவும், அவர் பேசுவதாகவும் எந்த பிரச்சினையும் இல்லை என்றும் ஆஸ்பத்திரியின் மருத்துவ சூப்பிரண்டு எல்.எஸ்.ஜெதானி தெரிவித்தார்.

வாழும் கலை அமைப்பின் தலைவர் ஸ்ரீ ரவிசங்கர் தீவிர சிகிச்சை பிரிவில் பாபா ராம்தேவை சந்தித்து பேசினார். பின்னர் அவர் நிருபர்களிடம் பேசுகையில்; ஆஸ்பத்திரியில் சேர்க்கப்பட்ட பிறகு பாபா ராம்தேவின் உடல்நிலையில் முன்னேற்றம் ஏற்பட்டு இருப்பதாகவும், உண்ணாவிரத போராட்டத்தை கைவிடுமாறு அவரிடம் கேட்டுக் கொண்டதாகவும் கூறினார்.

தன்னுடன் உண்ணாவிரத போராட்டத்தில் ஈடுபட்டுள்ள தொண்டர்களை குறிப்பாக முதியோர், பெண்கள், குழந்தைகளை தண்ணீர், தேன், எலுமிச்சை சாறு அருந்தும்படி கேட்டுக்கொள்ளுமாறு பாபா ராம்தேவ் தன்னிடம் கூறியதாகவும் அவர் தெரிவித்தார்.

ஜனாதிபதி கவலை

டேராடூனில் உள்ள இந்திய ராணுவ அகாடமியில் ராணுவ வீரர்களின் அணிவகுப்பு நடைபெறுகிறது. இந்த நிகழ்ச்சியில் கலந்து கொள்வதற்காக அங்கு சென்றுள்ள ஜனாதிபதி பிரதீபா பட்டீல் பாபா ராம்தேவின் உடல்நிலை குறித்து கவலை தெரிவித்து உள்ளார். அவரது உடல்நிலை குறித்த விவரங்களை தெரிவிக்குமாறு மாவட்ட நிர்வாகத்தை அவர் கேட்டுக் கொண்டு உள்ளார்.

இதேபோல் முதல்-மந்திரி ரமேஷ் போக்ரியாலும், பாபா ராம்தேவின் உடல்நிலை குறித்து மிகுந்த கவலை தெரிவித்து இருக்கிறார். அவரது உண்ணாவிரத போராட்டத்தை முடிவுக்கு கொண்டு வர மத்திய அரசு உடனடியாக நடவடிக்கை எடுக்க வேண்டும் என்றும் அவர் கேட்டுக் கொண்டு உள்ளார்.

தொண்டர்கள் யாகம்

பாபா ராம்தேவ் விரைவில் குணம் அடைய வேண்டி ஹரித்துவாரில் அவரது தொண்டர்கள் யாகம் நடத்தினார்கள். மேலும் அவரது ஆதரவாளர்கள் பலர் ஹரித்துவார்-டெல்லி நெடுஞ்சாலையில் ஆர்ப்பாட்டத்திலும் ஈடுபட்டனர்.

தினதந்தி