ஒரே மலேசியா, மூன்று வகையான பதிவு முறைகள்

by **சிவா** Sat Jun 11, 2011 8:09 am

சுபாங் ஜெயா சட்டமன்ற உறுப்பினர் ஹன்னா இயோவும் அவரது கணவரும் தங்களது புதல்வியின் இனத்தை “அனாக் மலேசியா” எனப் பதிவு செய்ய மேற்கொண்ட முயற்சி நமது தேசியப் பதிவு முறையில் உள்ள இறுக்கத்தை அம்பலப்படுத்தியுள்ளது.

அது மட்டுமல்ல. சபா, சரவாக், தீவகற்ப மலேசியா ஆகியவற்றில் உள்ள பதிவு அமைப்புக்கள் தேசியப் பதிவுத் துறையின் கீழ் வந்தாலும் அவற்றில் மூன்று வெவ்வேறு வகையான பதிவு விதி முறைகள் பின்பற்றப்படுவதையும் மலேசியாகினி கண்டு பிடித்துள்ளது.

சபா கலப்பு இனத்தை அங்கீகரிக்கிறது. ஆனால் அது சீன- சுதேசி பெற்றோர்களுக்கு மட்டுமே பொருந்தும்.

குழந்தைக்குத் தந்தையின் இனத்தைப் பதிவு செய்ய வேண்டும் என்பதை சரவாக் கட்டாயமாக்கியுள்ளது.

தீவகற்ப மலேசியாவில் குழந்தையின் பெற்றோர்கள், தந்தை அல்லது தாயின் இனத்தை தேர்வு செய்ய அனுமதிக்கிறது.

சபாவில் பெற்றோர்கள் தங்கள் குழந்தையை தாய் அல்லது தந்தையின் இனம் அல்லாமல் ‘கலப்பு இனம்’ எனத் தேர்வு செய்யலாம் என அந்த மாநில தேசியப் பதிவுத் துறையின் அதிகாரி ஒருவர் கூறினார்.

“தந்தை சீனராக இருந்து தாய் கடாஸானாக இருக்கும் வேளையில் அவர்களுடைய குழந்தை சீனராகவோ அல்லது கடாஸானாகவோ அல்லது சீன-சுதேசியாகவோ இருக்கலாம் என அவர் மலேசியாகினி தொடர்பு கொண்ட போது தெரிவித்தார்.

கடந்த காலத்தில் பதிவுகள் கையால் எழுதப்பட்ட போது ‘சீன-கடாஸான், ‘சீன-முருட்’ போன்ற பல வகையான “சொற்களைக் கூட பெற்றோர்கள் தேர்வு செய்ய அனுமதிக்கப்பட்டதாக அவர் விளக்கினார்.

ஆனால் பதிவு முறை கணினிமயமானதும் ‘சீன-சுதேசி’ மட்டும் ஏற்றுக் கொள்ளப்படுகிறது.

“பழைய சொற்கள் திரும்பப் பயன்படுத்தப்பட வேண்டும் என நாங்கள் கேட்டுக் கொண்டுள்ளோம். இன்னும் அங்கீகாரம் கிடைக்கவில்லை”, என்றும் அந்த அதிகாரி கூறினார்.

ஆனால் சுதேசி ஒருவருக்கும் சீனர் அல்லாத ஒருவருக்கும் இடையில் திருமணம் நடந்து அவர்களுக்குப் பிறக்கும் குழந்தை தந்தை அல்லது தாயின் இனத்தை பின்பற்ற வேண்டும். சுதேசி-சீன பெற்றோர்களுக்கு மட்டுமே கலப்பு இன தேர்வு வழங்கப்படுகிறது.

“‘இந்தியர்-சுதேசி’ அல்லது ‘மலாய்-சுதேசி’என்றோ பதிவு செய்ய முடியாது,” என அவர் மேலும் சொன்னார்.

சரவாக்கில் இன்னும் இறுக்கமானது

அதே வேளையில் சரவாக்கில் பதிவு முறை மிகவும் இறுக்கமாக உள்ளது. ஒரு குழந்தையின் இனம் தந்தையின் இனத்தை சார்ந்திருக்க வேண்டும் என்பது கட்டாயமாகும்.

“தந்தையின் இனத்தை பின்பற்றுவது கட்டாயம்,” என சரவாக் தேசியப் பதிவுத் துறையின் அதிகாரி ஒருவர் மலேசியாகினியிடம் கூறினார்.

தந்தை வெளிநாட்டவராக இருந்தால் அவரது குடியுரிமை குழந்தையின் “இனமாக” கருதப்படும்,” என்றார் அவர். “எடுத்துக்காட்டுக்கு தந்தை இத்தாலியராக இருந்தால் குழந்தையின் இனம் ‘இத்தாலியாக’ இருக்கும். தந்தை சிங்கப்பூரராக இருந்தால் குழந்தையின் இனம் ‘சிங்கப்பூர்’ எனக் குறிக்கப்படும்” என அந்த அதிகாரி விளக்கினார்.

ஆனால் சரவாக் பதிவு விதி முறை கூட்டரசு அரசியலமைப்பில் கூறப்பட்டுள்ள “சுதேசி” என்பதற்கான விளக்கத்துக்கு முரண்பட்டுள்ளதாகத் தோன்றுகிறது.

இரண்டு பெற்றோர்களும் சுதேசிகளாக இருந்தால் மட்டுமே சரவாக்கியர் ஒருவர் சுதேசியாகக் கருதப்பட முடியும் என 161எ(6)(பி) விதி கூறுகிறது.

சபாவைப் பொறுத்த வரையில் பெற்றோர்களில் ஒருவர் அல்லது பாட்டி அல்லது பாட்டனார் சுதேசியாக இருந்தால் போதும் சபாவைச் சேர்ந்த ஒருவர் சுதேசியாகக் கருதப்பட முடியும்.

ஆனால் அந்த மாநிலத்தில் இப்போது பின்பற்றப்படும் பதிவு முறை, அந்த விளக்கத்துக்குள் வருகின்றவர்கள் சுதேசியாக அல்லாமல் பதிவு செய்யப்படுவதற்கும் அனுமதி அளிக்கிறது.

மலேசியாஇன்று