பிடித்தால்...படியுங்கள்..

**rameshnaga** · **rameshnaga** Fri Jun 10, 2011 11:32 am

First topic message reminder :

என் வீட்டுக் கோழியின் எதிரே..
அடுக்கடுக்காய் கேவி..
கொண்டை சிலுப்பி..
வீரநடை நடந்த --
எதிர் வீட்டு சேவலின் கனவில்..
என்ன வண்ணத்தில்
உடையணிந்து வரும்..
என் வீட்டுக் கோழி.?
******************
அம்மாதான் சொல்லிக் கொடுத்தாள்..
எனக்கு முதல் பொய்யை...
கூப்பிட்டால் நிலவு கீழே வந்து விடும்
தன் கைச் சோறு சாப்பிட என்று.
******************
விழுந்தும்..எழுந்தும்..வருகிறது அலைகள்..
கரையினை நோக்கி.
பயத்தில்...வடிந்து தணிகிறது..கரைகளில்..
வினாடிகளில் தனை மாற்றிக் கொள்ளும்
மனிதர்களைப் பார்க்க நேர்கையில்.
***********************
காலம் காலமாய் ...கடவுளின் கண்ணில் படும்படி..
தலை கீழாய்ப் பறக்கிறது வௌவால்
கோவில் வளாகங்களில்..
ஒரு நொடி கண் மூடித் தன் கனவுகள்
நிறைவேறப் பிரார்த்திக்கும்
மனிதனை வியந்த படி..
*********************
எல்லா வீடுகளிலும் தங்கி விடுகிறது..
சில கனவுகள்..
சில துளிக் கண்ணீர்..
சில பேசப்படாத காதல்..
சில தியாகம்..
இரவுகளிலும் அமைதியற்றதாகி விடுகிறது
இரகசியங்கள் சுமக்கும் வீடு.
****************************