சென்னையில் இருந்து புறப்பட்டது உல்லாச கப்பல்: குறைந்த கட்டணம் ரூ.6 ஆயிரம்

by ரபீக் Thu Jun 09, 2011 3:46 pm

இந்தியாவிலேயே முதல் முதலாக சென்னையை சேர்ந்த அமெட்ஷிப்பிங் நிறுவனம் உல்லாச கப்பல் சேவையை தொடங்கி உள்ளது. இந்த கப்பல் தொடக்க விழா சென்னை துறைமுகத்தில் உல்லாச கப்பலின் அரங்கில் நடந்தது.

மத்திய அமைச்சர் ஜி.கே.வாசன் கொடி அசைத்து கப்பல் சேவையை தொடங்கி வைத்தார். அப்போது பேசிய அவர்,

இந்த உல்லாச கப்பல் சேவையை தொடங்கியதன் மூலம் இந்தியாவுக்கே அமெட்ஷிப்பிங் நிறுவனம் பெருமை சேர்த்துள்ளது. கடல்சார் பயிற்சி பெறும் மாணவர்களுக்கு நவீன பயிற்சி அளிக்கும் வகையில் இந்த உல்லாச கப்பல் சேவையை அமெட் ஷிப்பிங் நிறுவனம் அறிமுகப்படுத்தி உள்ளது. மாணவர்களுக்கு பயிற்சி அளிப்பதுடன் வருவாய் ஈட்டும் வகையில் பொது மக்கள் பயணம் செய்யும் வகையிலும் உல்லாச கப்பலாக பயன்படுத்தப்பட உள்ளது என்றார்.

உல்லாச கப்பல் முதல் பயணம் 09.06.2011 அன்று காலை 11 மணி அளவில் தொடங்கியது. 450 பயணிகளுடன் புறப்பட்டு சென்றது. வருகிற 12 ந்தேதி வரை 1 நாள் உல்லாச பயணம் நடக்கிறது. இதற்கு குறைந்த கட்டணம் ரூ.6 ஆயிரம். அதிகபட்ச கட்டணம் ரூ.13 ஆயிரம் ஆகும்.

உல்லாச பயணிகளுக்கு தனி தங்கும் அறைகள் வழங்கப்படும். 3 வேளை உணவு மற்றும் தேனீர் வழங்கப்படும். கப்பலில் 2 படுக்கை, 4 படுக்கை, 3 படுக்கை வசதியுடன் கூடிய 267 அறைகள் உள்ளன. ரெயிலில் உள்ளதுபோல் படுக்கை வசதியும் உள்ளன. நடனவிருந்து கப்பலில் 4 ம் தளத்தில் ரெஸ்டாரண்டுடன் நடன நிகழ்ச்சியும் நடக்கிறது.

இதுதவிர மனமகிழ்மன்றங்கள், பார்கள், மசாஜ் கிளப்புகள், நீச்சல்குளம், உணவு விடுதிகள், கூட்ட அரங்குகள் உள்ளிட்ட அனைத்து வசதிகளும் 5 ஸ்டார் ஓட்டல் வசதியுடன் அமைக்கப்பட்டுள்ளன. உல்லாச பயணிகள் பயணத்தின்போது ஆடம்பர நகரில் சுற்றி வருவதுபோல் கப்பலின் அனைத்து தளங்களுக்கும் சென்று வரலாம்.

கேளிக்கை நிகழ்ச்சிகளில் ஆடிப்பாடி மகிழலாம். ஒரு இரவு உல்லாசப் பயணத்தில் குறிப்பிட்ட தூரம் கடலை சுற்றி வரலாம். 2 இரவுகள் உல்லாச பயணத்தில் விசாகப்பட்டினம் வரை சென்று வரலாம். 4 இரவுகள் பயணத்தில் இலங்கை திரிகோணமலை வரை சென்று திரும்பலாம். 9 இரவுகள் உல்லாச பயணத்தில் அந்தமான், புக்கட் ஆகிய இடங்களுக்கு சென்று வரலாம்.

நக்கீரன்