11 ஆயிரம் பேர் கொண்ட ஆயுதப்படை : ராம்தேவ் ஆவேச பேச்சு

by **krishnaamma** Thu Jun 09, 2011 11:40 am

ஹரித்துவார் : கறுப்புப் பணம் மற்றும் லஞ்ச ஊழலுக்கு எதிரான
போராட்டத்துக்கு வலு சேர்க்கும் விதத்தில், 11,000 பேர் கொண்ட இளைஞர் படை
அமைக்கப்பட்டு, அவர்களுக்கு ஆயுதப் பயிற்சியும் அளிக்கப்படும்' என, யோகா
குரு ராம்தேவ் தெரிவித்துள்ளார்.
உத்தரகண்ட் மாநிலம், ஹரித்துவாரில், கடந்த நான்கு நாட்களுக்கு முன்
உண்ணாவிரதப் போராட்டத்தை துவங்கிய ராம்தேவ், கறுப்புப் பணம் மீட்பு
மற்றும் லஞ்ச ஊழலுக்கு எதிராக, நாட்டு நலன் கருதி, 11,000 பேர் கொண்ட
இளைஞர் படை அமைக்கப்பட்டு, அவர்களுக்கு ஆயுதப் பயிற்சியும் வழங்கப்படும்
என, ஆவேசமாக தெரிவித்துள்ளார்.
அவர் மேலும் கூறியதாவது: ஒவ்வொரு மாவட்டத்திலிருந்தும் பெண்கள்
உட்பட 20 இளைஞர்கள் தேர்ந்தெடுக்கப்பட்டு, அவர்களுக்கு எல்லாவிதமான
பயிற்சிகளும் வழங்கப்படும். இவர்கள், தங்கள் வாழ்க்கையை தியாகம்
செய்வதற்கும் தயாராக இருப்பார்கள். ஆனால், இந்தப்படை அமைதியான முறையில்
தான் போராடும்.நாட்டின் தற்போதைய தேவையைக் கருதி (ராம்லீலா மைதானத்தில்
நடந்த அராஜகம்) இளைஞர்களுக்கு ஆயுதப்பயிற்சி வழங்க வேண்டிய தேவை
ஏற்பட்டுள்ளது. எனது அடுத்த உண்ணாவிரதப் போராட்டம், டில்லி ராம்லீலா
மைதானத்தில் தான் நடைபெறும். இதில், ஒரு கோடிக்கும் மேற்பட்டோர்
பங்கேற்பர். அப்போதும், போலீஸ் அராஜகம் நடக்கும்பட்சத்தில், அதற்கு தகுந்த
பதிலடி தரப்படும்.இவ்வாறு ராம்தேவ் ஆவேசமாக பேசினார்.
ராம்தேவ் இவ்வாறு பேசியதற்கு, காங்கிரஸ் உட்பட பிற எதிர்க்கட்சிகள் கடும் கண்டனம் தெரிவித்துள்ளன.
உள்துறை அமைச்சர் சிதம்பரம் கூறுகையில், "அப்படி அவர் செயல்படட்டும், அதற்குப் பின் அரசு பார்த்துக் கொள்ளும்' என்றார்.
காங்., செய்தித் தொடர்பாளர் ஜெயந்தி நடராஜன் கூறியதாவது:ஊழலுக்கு
எதிராக ஆயுதப் போராட்டத்தில் இளைஞர்கள் ஈடுபடுத்தப்படுவர் என ராம்தேவ்
தெரிவித்திருப்பது, அரசியல் சாசனத்திற்கு எதிரானது; சட்டவிரோதமானது.
மக்களால் தேர்ந்தெடுக்கப்பட்ட அரசுக்கும் எதிரானது.லோக்சபா எதிர்க்கட்சித்
தலைவர் சுஷ்மா சுவராஜ், ராம்தேவை சந்தித்திருப்பது சரியல்ல. மத்திய
அரசுக்கு எதிரான ஆயுதப் போராட்டத்தில் பா.ஜ.,வும் பங்கேற்பதாக இதற்கு
அர்த்தம் கொள்ளலாமா? என, ஜெயந்தி நடராஜன் கேள்வி எழுப்பினார்.
அதுபோல், சமாஜ்வாடி கட்சியும், ராம்தேவின் ஆயுதப் போராட்டத்துக்கு
எதிர்ப்பு தெரிவித்துள்ளது. இந்த சூழலில், பா.ஜ., மூத்த தலைவரும், லோக்சபா
எதிர்க்கட்சித் தலைவருமான சுஷ்மா சுவராஜ், நேற்று ஹரித்துவாரில், ராம்தேவை
சந்தித்து பேசினார்.
அப்போது அவர் கூறுகையில், "டில்லி ராம்லீலா மைதானத்தில் நடந்த
சம்பவம் கண்டிக்கத்தக்கது. மனித உரிமைகளுக்கு எதிரானது. போலீஸ் தடியடியில்
காயமடைந்து, மருத்துவமனையில் சிகிச்சை பெற்று வருவோரைக் காணக் கூட,
பிரதமர் மற்றும் சோனியாவால் முடியவில்லை. சங்க பரிவார் மட்டுமின்றி
ஒட்டுமொத்த நாடே ராம்தேவை ஆதரிக்கிறது' என்றார்.
இதற்கிடையே, ஐந்தாவது நாளாக உண்ணாவிரதப் போராட்டம் நடத்தி வரும்
ராம்தேவின் உடல்நிலை மோசமடைந்து வருவதாக, டாக்டர்கள் தெரிவித்துள்ளனர்.
மேலும், காலை உணவையாவது ராம்தேவ் எடுத்துக் கொள்ள வேண்டும் என
அறிவுறுத்தியுள்ளனர்.