கோயிலில் அரைகுறை ஆடைகளுடன் நுழைய வெளிநாட்டினருக்கு தடை!

**krishnaamma** · **krishnaamma** Tue Jun 07, 2011 1:02 pm

பனாஜி: கோவாவில் உள்ள பிரசித்தி பெற்ற கோவிலுக்குள் நுழைவதற்கு, வெளிநாட்டினருக்கு தடை விதிக்கப்பட்டுள்ளது. கோவாவில், பனாஜி அருகே உள்ளது மார்டால் என்ற இடம். இங்குள்ள மகாலச நாராயணி கோயில், மிகவும் பிரபலமானது. கோவாவுக்கு சுற்றுலா வரும் வெளிநாட்டினர், அரைகுறை உடையணிந்த நிலையில், இந்த கோவிலுக்கு வருவதாக புகார் எழுந்தது. இதையடுத்து, வெளிநாட்டினருக்கு இங்கு தடை விதிக்கப்பட்டுள்ளது.

நாராயணி கோவிலின் நிர்வாக அதிகாரி வினோத் காமத் கூறியதாவது: நாங்கள் வெளிநாட்டினருக்கு எதிரானவர்கள் அல்ல. அவர்கள், அரை குறையான உடையணிந்து வருவது தான், கவலையை ஏற்படுத்துகிறது. சில, வெளிநாட்டு சுற்றுலாப் பயணிகள், மலர் மாலைகளை அணிந்து வருகின்றனர். கோயிலில் இருந்து செல்லும்போது, தாங்கள் அணிந்திருந்த மாலைகளை, சாமி சிலைகளுக்கு அருகே, வீசி விட்டுச் சென்று விடுகின்றனர். இது தொடர்பாக, பக்தர்கள் தரப்பிலிருந்து, புகார் வந்தது. இதனால் தான், வெளிநாட்டினருக்கு தடை விதித்துள்ளோம். இவ்வாறு வினோத் காமத் கூறினார். இந்த கோவிலுக்கு அருகில் உள்ள கிராமத்தில், மங்குயேசி மற்றும் ராம்நதி கோயில் உள்ளது. இக்கோவிலும் பிரபலமானது தான். இங்கு வரும் சுற்றுலாப் பயணிகள் குறித்தும் புகார் வந்ததை அடுத்து, கோவிலுக்கு வரும் பக்தர்களுக்கு, கடுமையான உடை கட்டுப்பாடு விதிக்கப்பட்டுள்ளது. இது குறித்து, கோவிலின் அதிகாரி ஜெயந்த் மந்துர்கர் கூறியதாவது: அரைகுறை உடையணிந்து வரும் சுற்றுலாப் பயணிகளால், கோவிலுக்கு வரும் மற்ற பக்தர்கள் அதிருப்தி அடைகின்றனர். அரைகுறை உடையுடன் வரக் கூடாது என கூறினால், வெளிநாட்டு சுற்றுலாப் பயணிகள் அதை ஏற்றுக் கொண்டு, நாங்கள் தரும் சால்வைகளை அணிந்து கொண்டு, வழிபாடு நடத்திச் செல்கின்றனர். ஆனால், இந்தியாவின் பிற மாநிலங்களில் இருந்து வரும் சுற்றுலாப் பயணிகள், கோயில் ஊழியர்களுடன் வாக்குவாதத்தில் ஈடுபடுகின்றனர். இதன் காரணமாகவே, உடை கட்டுப்பாடு விதிக்கப்பட்டுள்ளது. இதனால், சுற்றுலாப் பயணிகள் வரத்து குறைவதற்கு வாய்ப்பு இல்லை. இவ்வாறு மந்துர்கர் கூறினார்.