ஏர் இந்தியா, கலைஞர் டீ.வி.யுடன் டீல் பண்ணலாமே!

Viruvirupu, Tuesday 07 June 2011, 08:32 GMT


• “விமானங்கள் ரெடியாகிவிட்டன. பணத்தை ரெடி பண்ணவும்” என்று போயிங்கிடம் இருந்து கடிதம் வந்துவிட்டது!

மும்பை, இந்தியா: விமானப் போக்குவரத்து அமைச்சுக்கு ஒரு பெருத்த சந்தேகம் எழுந்துள்ளது. ஏர் இந்தியாவுக்காக ஆர்டர் கொடுத்திருந்த விமானங்களை வாங்குவதா? அல்லது, தலைப்பாகையோடு போகட்டும் என்று தலைமுழுகி விடுவதா என்பதே அந்தச் சந்தேகம்!

அதுவும் இது சாதாரண விமானங்களுமல்ல, ஆர்டர் ஒன்றோ இரண்டோவுமல்ல.

இவை ஒன்றும் புத்தம்புதிய ஆர்டர்கள் அல்ல. 2 வருடங்களுக்கு முன்பே, தமது ‘அழகிய கனாக்காலத்தில்’ ஏர் இந்தியா கொடுத்திருந்த ஆர்டர்தான்! விமானங்கள் எவையென்றால், லேட்டஸ்ட் போயிங் 787 ட்ரீம்லைனர்கள்! அப்போது கொடுக்கப்பட்ட ஆர்டர் மொத்தம் 27 விமானங்கள். மொத்த விலை 55,000 கோடி ருபா.

முன்பணம் செலுத்தி ஆர்டர் கொடுக்கப்பட்டபோது, விமானங்கள் 2 வருடத்தின்பின் டெலிவரி செய்யப்படும் எனக் கூறியிருந்தது போயிங். அந்த 2 வருடங்களும் வேகமாக ஓடி, இதோ வந்துவிட்டன.

சில தினங்களுக்குமுன், “விமானங்கள் ரெடியாகிவிட்டன. எப்போது, எங்கே அனுப்பி வைப்பது?” என்று போயிங்கிடம் இருந்து கடிதம் வந்தவுடன்தான், விமானப்போக்குவரத்து அமைச்சு மிரண்டுபோனது. காரணம் ஏர் இந்தியாவின் இன்றைய நிலைமை அப்படி!

கையிலுள்ள விமானங்களுக்கே எரிபொருள் அடிக்கப் பணமில்லாத நிலையில், சில விமானங்களைத் தரையில் நிறுத்தி வைத்திருக்கின்றது ஏர் இந்தியா. அதைவிடப் பெரிய சோகம் ஒன்றும் உண்டு. கடந்த வாரம், தனது ஊழியர்களுக்கு சம்பளம் கொடுப்பதற்கே, பேங்கில் கடன் வாங்கியிருக்கின்றது தேசிய விமான சேவை!

இந்த லட்சணத்தில், மேலும் ஐம்பத்தையாயிரம் கோடி ருபா புரட்டுவதென்னால், விமானப் போக்குவரத்து அமைச்சுக்கு தலை கிறுகிறுக்காமல் என்ன செய்யும்?

இப்போது, விமானப் போக்குவரத்தின் அதிகாரிகள், வேறு வெளிநாட்டு விமான நிறுவனங்கள் எதற்காவது இந்த விமான ஆர்டர்களை மாற்ற முடியுமா என முயற்சிக்கத் தொடங்கியுள்ளார்கள். அப்படியான ‘பட்சி’ ஏதும் சிக்காவிட்டால், கட்டிய முன்பணமும் கோவிந்தா, மேற்கொண்டு சில கோடிகள் அபராதமும் செலுத்த வேண்டியிருக்கும்.

என்ன செய்வது எனத் தலையை உடைத்துக் கொண்டிருக்கிறது ஏர் இந்தியா.

ஏர் இந்தியா, இதற்கெல்லாம் போய் தலையை உடைத்துக் கொள்ளாமல், பேசாமல் கலைஞர் டீ.வி.யிடம் கடன் கேட்டுப் பார்க்கலாமே? இப்போதெல்லாம், அவர்கள்தானே ஆயிரம் கோடிகளில், கடன் கொடுத்து வாங்குவதாகக் கணக்குக் காட்டுகிறார்கள்!

நன்றி viruviruppu