பஞ்சமி நிலங்களை மீட்க விழிப்புணர்வு பேரணி : முன்னாள் ஐ.ஏ.எஸ்., அதிகாரி சிவகாமி அறிவிப்பு

அரக்கோணம் : தமிழகம் முழுவதும் உள்ள 12 லட்சம் ஏக்கர் பஞ்சமி நிலங்களை மீட்க, மாநில அளவிலான விழிப்புணர்வு பேரணி நடத்தப்படும் என்று முன்னாள் ஐ.ஏ.எஸ்., அதிகாரியும், சமூக சமத்துவப் படை நிறுவனருமான சிவகாமி அறிவித்துள்ளார்.

பஞ்சமி நிலங்களை மீட்பது குறித்து விழிப்புணர்வு ஏற்படுத்தும் வகையில் மோட்டார் சைக்கிள் பேரணி, சமூக சமத்துவப் படை சார்பில் அரக்கோணத்தில் நேற்று நடந்தது. அரக்கோணம் எஸ்.ஆர்., கேட் அருகே நேற்று காலை 10 மணிக்கு துவங்கிய பேரணி, திருமால்பூர், கீழ்ப்பாக்கம் உட்பட 50 கிராமங்கள் வழியாகச் சென்று, மாலை 6 மணிக்கு மீண்டும் எஸ்.ஆர்., கேட்டில் முடிவடைந்தது.
பேரணியை, முன்னாள் ஐ.ஏ.எஸ்., அதிகாரியும், சமூக சமத்துவப் படை நிறுவனருமான சிவகாமி துவக்கி வைத்தார். பின்னர் நிருபர்களிடம் அவர் கூறுகையில், "தமிழகத்தில் பஞ்சமி நிலங்களை மீட்க நேரடி நடவடிக்கை எடுக்கும் பொருட்டு, உழவுப் போராட்டம் நடத்த உள்ளோம். அதற்காக மக்களை தயார்படுத்தும் வகையில், கிராமம் கிராமமாக மோட்டார் சைக்கிள் மூலம் விழிப்புணர்வு பேரணி நடைபெறுகிறது.
மாநிலத்தில் 12 லட்சம் ஏக்கர் பஞ்சமி நிலம் உள்ளது. அரக்கோணம் தாலுகாவில் மட்டும் 120 கிராமங்களில், ஆயிரம் ஏக்கர் பஞ்சமி நிலம் உள்ளதாக கண்டுபிடிக்கப்பட்டுள்ளது. கடந்த தி.மு.க., ஆட்சியில் பஞ்சமி நில மீட்பு ஆணையம் அமைக்கப்பட்டது. ஆனால், அதன் செயல்பாடுகள் தற்போது நிறுத்தி வைக்கப்பட்டுள்ளன. இந்நிலையில், கவர்னர் உரையில் பஞ்சமி நிலம் குறித்து எவ்வித அறிவிப்பும் இல்லாதது ஏமாற்றத்தை அளிக்கிறது.
பஞ்சமி நிலங்களை மீட்கும் முயற்சிகளுக்கு, முதல்வர் ஜெயலலிதா உறுதுணையாக இருக்க வேண்டும். பஞ்சமி நிலங்களுக்கு பதிலாக சில கல்வி நிறுவனங்கள் மாற்று இடம் தருவதாகக் கூறுகின்றனர். இது, சட்ட விதிகளுக்கு புறம்பானது. பஞ்சமி நிலத்துக்கென தனி கலர் பத்திரம் வழங்க வேண்டும். இது போன்ற பல்வேறு அம்சங்களை வலியுறுத்தி ஜூன் 13ம் தேதி, காஞ்சிபுரம் சட்டசபை தொகுதியில் மோட்டார் சைக்கிள் பேரணி நடத்தப்படும். மேலும், தமிழகம் முழுவதும் பல மாவட்டங்களில் பேரணி நடத்தப்படும்' என்றார்.
பேரணியில், சமூக சமத்துவப் படையின் மாநில பொதுச் செயலர் கோவிந்தசாமி, மாநில பொருளாளர் மோகன்ராஜ், மாவட்ட செயலர் ஜெயக்குமார் உட்பட 75க்கும் மேற்பட்டோர் கலந்து கொண்டனர்.

நன்றி தினமலர்

இவங்க போராடுறது சரி.அது என்னப்பா பஞ்சமி நிலம்?
அத சொல்லுங்கப்பா முதல்ல.