ராம்லீலா மைதானத்தில் ராவண லீலை : மோடி முதல் மாயாவதி வரை முதல்வர்கள் கண்டனம்

மஞ்சுபாஷிணி · மஞ்சுபாஷிணி Mon Jun 06, 2011 10:06 am

ஆமதாபாத் : ராம்தேவின் உண்ணாவிரதத்தை முறியடிப்பதற்காக, அவர் மீதும், அவரது ஆதரவாளர்கள் மீதும், போலீசார் மேற்கொண்ட நடவடிக்கைக்கு, பெரும்பாலான மாநில முதல்வர்கள், கடும் கண்டனம் தெரிவித்துள்ளனர்.

குஜராத் முதல்வர் நரேந்திர மோடி: அமைதியாக உண்ணாவிரதம் இருந்த ராம்தேவ் மீதும், அவரது ஆதரவாளர்கள் மீதும், போலீசார் மேற்கொண்ட நடவடிக்கை, இந்திய வரலாற்றில் மிக மோசமான சம்பவமாக பதிவாகி விட்டது. அப்பாவி மக்கள் மீது, டில்லி போலீசார் தாக்குதல் நடத்தியதற்காக, நாட்டு மக்களுக்கு, பிரதமர் மன்மோகன் சிங் பதிலளிக்க வேண்டும். வழக்கம் போல், இச்சம்பவம் குறித்து எதுவும் தெரியாது என, அவர் மழுப்ப முடியாது. தூங்கிக் கொண்டிருந்த அப்பாவி மக்கள் மீது, போலீசார் தடியடி நடத்தியது, கடும் கண்டனத்துக்குரியது. ராம்தேவுக்கு எதிராக, அரசு எடுத்த நடவடிக்கை, எமர்ஜென்சி காலத்தில் நடந்த சம்பவங்களை நினைவுபடுத்தியது. டில்லி ராம்லீலா மைதானத்தில், தற்போது, ராவண லீலை நடந்திருக்கிறது.
உத்தரகண்ட் முதல்வர் ரமேஷ் பொக்கிரியால்: அமைதியான முறையில் உண்ணாவிரத போராட்டம் நடத்திய ராம்தேவ், என்ன தவறு செய்தார். எதற்காக, அவரது போராட்டம் முறியடிக்கப்பட்டது. மத்திய அரசு, எதற்காக அவரைப் பார்த்து பயப்படுகிறது. உத்தரகண்ட் மாநிலத்தில், ராம்தேவ் உண்ணாவிரதம் இருக்க விரும்பினால், அவருக்கு தேவையான அனைத்து பாதுகாப்பு ஏற்பாடுகளையும், மாநில அரசு கவனித்துக் கொள்ளும்.
ஒடிசா முதல்வர் நவீன் பட்நாயக்: அமைதியாக உண்ணாவிரதம் இருந்த ராம்தேவ் மீதும், அவரது ஆதரவாளர்கள் மீதும், போலீசார் மேற்கொண்ட நடவடிக்கை, கடும் அதிர்ச்சியை அளிக்கிறது. இது, மிகவும் கொடூரமான நடவடிக்கை. ஜனநாயகத்துக்கு விரோதமானது.
உ.பி., முதல்வர் மாயாவதி: ராம்தேவின் உண்ணாவிரத போராட்டத்தை போலீசார் ஒடுக்கியது, மனித தன்மையற்ற செயல். ஜனநாயக நடைமுறைக்கு விரோதமானது. போலீசாரின் நடவடிக்கையை, பகுஜன் சமாஜ் கட்சி, கடுமையாக கண்டிக்கிறது. இப்பிரச்னையை முக்கிய பிரச்னையாக கருதி, இதுகுறித்து விசாரணை நடத்த, சுப்ரீம் கோர்ட் நடவடிக்கை எடுக்க வேண்டும்.
கர்நாடக முதல்வர் எடியூரப்பா: அமைதியான முறையில் உண்ணாவிரதம் இருந்தவர்கள் மீதும், தூங்கிக் கொண்டிருந்தவர்கள் மீதும், போலீசார் கொடூரமான முறையில் தாக்குதல் நடத்தியுள்ளனர். இது கண்டனத்துக்குரியது. ராம்லீலா மைதானத்தில் நடந்த சம்பவங்கள், எமர்ஜென்சி காலத்தில் நடந்த சம்பவங்களை நினைவுபடுத்தும் வகையில் இருந்தது.
பீகார் முதல்வர் நிதிஷ் குமார்: பாபா ராம்தேவின் உண்ணாவிரதத்தை முறியடிப்பதற்கு, ஐ.மு., கூட்டணி அரசு மேற்கொண்ட நடவடிக்கை, மிருகத்தனமானது. இதற்கு, மத்திய அரசு பதிலளிக்க வேண்டும். மத்திய அரசின் நடவடிக்கை, ஜனநாயக நடைமுறைக்கு களங்கத்தை ஏற்படுத்தி விட்டது.
உ.பி., முன்னாள் முதல்வரும், சமாஜ்வாடி கட்சித் தலைவருமான முலாயம் சிங் யாதவ்: ராம்தேவின் உண்ணாவிரத போராட்டத்தை முறியடிக்க, மத்திய அரசு, முரட்டுத்தனமான நடவடிக்கை எடுத்துள்ளது. அவர் உண்ணாவிரதம் இருந்தால், மத்திய அரசுக்கு என்ன வந்தது. ஏன் இத்தனை கோபப்பட வேண்டும். ராம்தேவ் உண்ணாவிரதத்தை முறியடிக்க, அரசு மேற்கொண்ட நடவடிக்கையை, மதச் சார்பற்ற ஜனதா தளம், இந்திய தேசிய லோக்தளம், சிரோமணி அகாலி தளம் உள்ளிட்ட கட்சிகளும் கண்டித்துள்ளன.
"ராம்தேவ் மீது எடுக்கப்பட்ட போலீஸ் நடவடிக்கை சட்ட விரோதமானது' என, தெலுங்கு தேசத் தலைவர் சந்திரபாபு நாயுடு கூறினார்.

நன்றி தினமலர்