பாம் தயாரிப்பு இணையத்தளத்தில் கேக் தயாரிப்பு சமையல் குறிப்பு-இங்கிலாந்து உளவுப் பிரிவு அதிரடி!

by முரளிராஜா Sat Jun 04, 2011 12:26 pm

லண்டன்: வெடிகுண்டுகள் தயாரிப்பது குறித்த முழு விவரங்கள் அடங்கிய அல்-கொய்தாவின் இணையத் தளத்தை ஹேக் செய்த இங்கிலாந்து உளவுப் பிரிவினரான எம்ஐ6, அதில் கேக் செய்வது எப்படி என்ற விவரங்கள் அடங்கிய பைல்களை அப்லோட் செய்துள்ளது.

தீவிரவாத இயக்கத்துக்கு ஆள் சேர்ப்பது ஆரம்பித்து, வெடிகுண்டுகள் தயாரிக்கப் பயன்படும் வேதிப் பொருட்கள், பேட்டரிகள், வயர்கள் விவரம், வெடிகுண்டுகளை வீட்டிலேயே தயாரிக்கும் முறைகள் ஆகிய விவரங்களுடன் இந்த இணையத்தளம் உருவாக்கப்பட்டிருந்தது.

இந்த இணையத் தளத்தை 2010ம் ஆண்டு ஜூன் மாதத்தில் ரிலீஸ் செய்யவும் அல்-கொய்தா திட்டமிட்டிருந்தது. இது குறித்து விவரம் அறிந்த இங்கிலாந்து உளவுப் பிரிவான எம்ஐ6, இதை ஹேக் செய்தது. பின்னர் அதில் வெடிகுண்டுகளுக்குப் பதில் கேக் செய்வது குறித்த சமையல் குறிப்புகள் அடங்கிய பைல்களை அப்லோட் செய்து, பாஸ்வேர்டையும் மாற்றிவிட்டது.

மேலும் இதில் சில கோட்களையும் எம்ஐ6 சேர்த்தது. அதை வைத்து இந்த இணையத்தளம் யாரால் எப்போது தொடர்பு கொள்ளப்படுகிறது, அதில் தீவிரவாதத்துக்கு உதவியான விவரங்களை சேர்ப்பவர்கள் யார் யார் என்ற விவரங்களை அறிந்து, அவர்களை அமெரிக்க, இங்கிலாந்து உளவுப் பிரிவினர் கண்காணிக்கவும் ஆரம்பித்தனர்.

அதன்மூலம், இந்த 67 பக்க வெடிகுண்டு இணையத்தளத்தை உருவாக்கியது வளைகுடாவைச் சேர்ந்த அன்வர் அல்-அவ்லாக்கி என்பதும் தெரியவந்துள்ளது.

இந்த விவரங்கள் இப்போது தான் வெளியில் வந்துள்ளன.
நன்றி தட்ஸ் தமிழ்