காவல்துறையினர் வீட்டில் கொள்ளை - திருச்சியில் துணிகரம்!

by **ரா.ரமேஷ்குமார்** Thu Jun 02, 2011 10:14 am

திருச்சியில், காவல்துறையினர் குடியிருப்பிலேயே கொள்ளையர்கள், தங்க நகைகளையும், பணத்தையும் கொள்ளையடித்துச் சென்றுள்ள சம்பவம் பெரும் பரபரப்பை ஏற்படுத்தி உள்ளது.திருச்சி ஈ. புதூர் காவலர் குடியிருப்பிலுள்ள இரண்டு வீடுகளில் கடந்த திங்கட்கிழமை அன்று இரவு 30 சவரன் நகை கொள்ளை அடிக்கப்பட்டுள்ளது.

சிறப்பு துணை ஆய்வாளர் ஆரோக்கியராஜ் தம் குடும்பத்தினருடன் வேளாங்கன்னி கோயிலுக்குப் பிரார்த்தனை நிறைவேற்றுவதற்காக சென்றிருந்தார். கொள்ளையர்கள் பூட்டிக்கிடந்த அவரது வீட்டை உடைத்து 20 சவரன் நகைகளைக் கொள்ளை அடித்துச் சென்றுள்ளனர்.

அதே காவலர் குடியிருப்பில் உள்ள தலைமை காவலர் ஜெயசேகரின் வீட்டிலும் கொள்ளையர்கள் புகுந்து, பீரோவை உடைத்து 10 பவுன் நகைகளைக் கொள்ளையடித்துச் சென்றுள்ளனர்.

தங்கள் குடியிருப்பிலேயே கொள்ளை நிகழ்ந்துள்ளது காவலர்கள் மத்தியில் அதிர்ச்சியை ஏற்படுத்தியுள்ளது. ஈ. புதூர் காவல்துறையினர் இதுகுறித்து விசாரணை நடத்தி, தனித்தனியாக இரண்டு வழக்குகள் பதிவு செய்து, கொள்ளையர்களைத் தீவிரமாக தேடி வருகின்றனர்.
நன்றி