ஆஸ்கர் விருதுக்குப் பணம் - ரஹ்மான் பற்றி இஸ்மாயில் தர்பார் கீழ்தர விமர்சனம்

https://2img.net/r/ihimizer/img803/7529/arrahman2.jpg

ஏ.ஆர்.ரஹ்மான் "ஸ்லம் டாக் மில்லியனர்" என்ற ஹாலிவுட் படத்துக்காக இரட்டை ஆஸ்கார் விருது வென்று இந்தியாவுக்குப் பெருமை சேர்த்தது அறிந்ததே. இதுபற்றி இந்தி பட இசை அமைப்பாளர்களில் ஒருவரான இஸ்மாயில் தர்பார் என்பவர் குறை கூறியிருந்தார். அண்மையில் இஸ்மாயில் நாக்பூரில் செய்தியாளர்களுக்கு பேட்டியளித்தபோது ஏ.ஆர்.ரஹ்மான் மீது சரமாரியாக பல்வேறு குற்றச்சாட்டுக்களை கூறினார்.
அந்தப் பேட்டியில் இஸ்மாயில் கூறுகையில், 2008-ம் ஆண்டு வெளியான "ஸ்லம்டாக் மில்லினர்" படத்துக்காக ஏ.ஆர்.ரஹ்மான் 2 விருதுகளை வாங்கியதில் சந்தேகமாக உள்ளது. விளம்பரத்துக்காக அவர் பணம் கொடுத்து இந்த விருதுகளை வாங்கியுள்ளார் என்றே நினைக்கிறேன். உண்மையிலேயே ஏ.ஆர்.ரஹ்மான் திறமை உள்ளவர் என்றால் ரோஜா அல்லது பம்பாய் படத்துக்கு ஆஸ்கார் விருது வாங்கி இருக்க வேண்டியதுதானே? அவர் பணம் கொடுத்துதான் விருது வாங்கினார் என்று எனக்குத் தெரியும், என்றார்.

உடனே அவரிடம் நிருபர்கள் ஏ.ஆர்.ரஹ்மான் மீது சுமத்தும் குற்றச்சாட்டுக்கு ஏதாவது ஆதாரம் உள்ளதா? எதை வைத்து இந்த குற்றச்சாட்டை சொல்கிறீர்கள்? என்று இஸ்மாயிலிடம் கேட்டனர்.

அதற்கு இஸ்மாயில் தர்பாரால் ஆதாரத்துடன் பதில் சொல்ல முடியவில்லை. இதையடுத்து இஸ்மாயிலுக்கு பல்வேறு துறையினரும் கடும் எதிர்ப்பு தெரிவித்துள்ளனர். ஏ.ஆர்.ரஹ்மான் மீது தேவை இல்லாமல் புழுதி வாரி தூற்றக்கூடாது என்று இந்தியப்பட உலகினர் பலரும் கருத்துக் கூறியுள்ளனர்.

இந்தியர்களுக்கு ஆஸ்கார் விருது மூலம் பெருமை தேடி தந்தவர் ரஹ்மான். அவரை பற்றி இப்படியெல்லாம் பேசக்கூடாது என்று மற்றொரு ஹிந்தி திரை இசை அமைப்பாளர் லலித் பண்டிட் கூறியுள்ளார்

இந்தக் குற்றச்சாட்டு தொடர்பாக ஏ.ஆர்.ரஹ்மானிடம் கேட்கப்பட்டது. உடனடியாக அவர் தன் மீதான குற்றச்சாட்டை கடுமையாக மறுத்தார். அவர் கூறுகையில், ஆஸ்கார் விருதுகளை யாரும் விலை கொடுத்து வாங்க முடியாது. 3 ஆயிரம் மக்களால் விருதுகள் தேர்வு நடக்கிறது. எப்படி பணம் கொடுத்து வாங்க முடியும், என்று கேட்டார்.
நன்றி இந்நேரம்