மாதத் தவணையில் நோக்கியா போன்கள்

by dinesh_22 Thu Sep 10, 2009 4:28 pm

தொடர்ந்து வேகமாக வளர்ந்து வரும் மொபைல் போன் விற்பனைச் சந்தையில் தன் முதல் இடத்தைப் பல வழிகளில் தக்க வைக்க நோக்கியா முயற்சிகளை எடுத்து வருகிறது. அவற்றில் ஒன்றாக இந்தியாவின் இரு மாநிலங்களில் ஆந்திரம் மற்றும் கர்நாடக மாநிலங்களில் கிராமங்களில் அங்கு இயங்கும் நிதி நிறுவனங்களுடன் ஒப்பந்தம் மேற்கொண்டு தவணை முறையில் மொபைல் போன்களை வழங்க முன்வந்தது. 2,500 கிராமங்களில் இத்திட்டம் அறிமுகமான போது 27,500 விண்ணப்பங்கள் பெறப்பட்டன. இதனைத் தொடர்ந்து மேலும் 12 மாநிலங்களில் இந்த திட்டம் அறிமுகப்படுத்தப்பட இருக்கிறது.

மழை பொய்த்தலால் வர்த்தகம் பாதித்துள்ள நிலையிலும் இந்தியாவில் மொபைல் போன் விற்பனை மட்டும் குறையவே இல்லை. எனவே இன்னும் அதிகமான மக்களை மொபைல் வாங்கிடச் செய்திடும் முயற்சியில் வாரத்திற்கு ரூ.100 வீதம் 25 வாரங்கள் பணம் செலுத்தும் வகையில் மொபைல் போன்களை வழங்கி வருகிறோம் என்று நோக்கியா இந்தியா நிர்வாக அதிகாரி சிவகுமார் கூறுகிறார்.

ஏறத்தாழ 43 கோடி பேர் பயன்படுத்தும் மொபைல் மார்க்கட்டில் 60% போன்கள் நோக்கியாவுடையதே. உலக அளவில் மொபைல் விற்பனையில் இந்தியா இரண்டாவது இடத்தைப் பெற்றுள்ளது.

அண்மையில் தேசிய பொருளாதார ஆய்வு மையத்துடன் நோக்கியா இணைந்து மேற்கொண்ட கணக்கெடுப்பில், இந்திய பொருளாதார வளர்ச்சியில் தனிப் பெருந்துறையாகத் தகவல் தொழில் நுட்ப துறை உருவாகும் என்று கண்டுபிடிக்கப் பட்டுள்ளது. 2014–15 ஆம் ஆண்டில் இந்தியப் பொருளாதார வளர்ச்சியில் இத்துறை 15.4% பங்கினைக் கொண்டிருக்கும் (ரூ. 8,65,031 கோடி) என்று கணக்கிடப்பட்டுள்ளது.

உலக அளவில் ஒரு கோடியே பத்து லட்சம் வாடிக்கையாளர் களைக் கொண்டுள்ள நோக்கியா நிறுவனத்திற்கு சென்னையில் உள்ள அதன் தொழிற்சாலை மிகப் பெரிய அளவில் உற்பத்தி செய்திடும் தொழிற்சாலையாகும். இங்கு 25 கோடி டாலர் முதலீடு செய்யப்பட்டுள்ளது. 8,000 பேர் பணி புரிகின்றனர். இங்கு தயாரிக்கப்படும் போன்களில் பாதி இங்கிருந்து 59 நாடுகளுக்கு ஏற்றுமதி செய்யப்படுகின்றன.