ஆறாவது முறையும் MLA ஆனவர் (நோயின் கவலையால்) தற்கொலை

ஆறு முறை சட்டமன்ற உறுப்பினராகத் தேர்ந்தெடுக்கப்பட்ட முஸ்தபா பின் குவாஸிம் என்பவர் சட்டமன்ற உறுப்பினர் விடுதியின் 4ஆவது மாடியில் இருந்து குதித்து தற்கொலை செய்து கொண்டார்.

மார்க்சிஸ்டு கம்யூனிஸ்டு கட்சியின் சார்பில் ஆறு முறை சட்டமன்ற உறுப்பினராகவும் ஒரு முறை ராஜ்ய சபா உறுப்பினராகவும் முஸ்தபா தேர்ந்தெடுக்கப்பட்டிருந்தார். ராஜ்ய சபாவின் துணைத் தலைவராகவும் அவர் இருந்தார்.

எம்.எல்.ஏ. விடுதியின் நான்காவது மாடியில் 411ஆவது அறையில் தங்கி இருந்த முஸ்தபா, 4ஆவது மாடியில் இருந்து குதித்தபோது, தகரக் கூரை ஒன்றின் மீது விழுந்தார். அந்த இடத்திலேயே இறந்துவிட்டார் என காவல்துறை கூறுகிறது.

தற்கொலை செய்து கொண்ட எம்.எல்.ஏ.வின் உடல் அருகிலிருந்து கடிதம் ஒன்று கண்டெடுக்கப்பட்டதாகவும் கிட்னி பிரச்சனை உள்பட பல்வேறு நோய்களில் தாம் கஷ்டப்படுவதாக அந்தக் கடிதத்தில் எழுதி இருந்ததாகவும் காவல்துறை கூறியுள்ளது.

இந்த சம்பவத்தைக் கேள்விப்பட்டவுடன் மேற்க வங்க முதல்வர் மமதா பானர்ஜி, வணிகத்துறை அமைச்சர் பார்தா சாட்டர்ஜியுடன் எம்.எல்.ஏ. விடுதிக்கும் மருத்துவமனைக்கும் நேரில் சென்று பார்வையிட்டார்.

பின்னர் செய்தியாளர்களிடம் பேசிய பானர்ஜி, குவாஸிம் தன்னுடைய நோய் பற்றி என்னிடம் கூறியிருந்தால், அவரது மருத்துவச் செலவுக்கு உதவி செய்திருப்பேன். ஆனால் அவர் புதிய சட்டமன்றத்தில் தன்னை அறிமுகப்படுத்திக் கொள்வதற்கு முன்பாகவே மரணித்துவிட்டார் என்று கூறினார்.

அவரது உடலை மருத்துவப் பரிசோதனை மற்றும் நடைமுறைகளை விரைந்து முடித்துவிட்டு திங்கள் கிழமைக்குள் அவரது குடும்பத்திடம் ஒப்படைக்கவும் மமதா பானர்ஜி உத்தரவிட்டார்.