பாகிஸ்தானில் இருக்கின்ற பயங்கரவாத முகாம்களை அழிக்காது இருநாட்டு உறவுகளில் ஒத்துழைப்பு ஏற்படாது : அந்தோணி _

பாகிஸ்தானில் 42 க்கும் மேற்பட்ட பயங்கரவாத முகாம்கள் செயல்படுவது இந்தியாவுக்கு மிகுந்த மனவருத்தம் அளிக்கிறது. இவற்றை அழிக்காமல் இந்திய பாகிஸ்தான் இடையிலான உறவில், நிரந்தர ஒத்துழைப்பு ஏற்படாது என்று இந்திய பாதுகாப்பு அமைச்சர் எஸ்.கே.அந்தோணி தெரிவித்தார்.

இது தொடர்பில் அவர் மேலும் தெரிவித்திருப்பதாவது, பாகிஸ்தான் அரசுடன் நட்புறவை பேணும் நோக்கில் விரைவில் முக்கிய பேச்சுவார்த்தையொன்று இடம்பெறவிருக்கின்றது. பேச்சுவார்த்தை இல்லாமல் ஏதும் செய்ய இயலாது. அண்டை நாடுகள் அனைத்துடனும் நல்லதொரு நட்புறவையே இந்தியா விரும்புகிறது. நண்பர்களை நாம் மாற்றிக் கொள்ளலாம். அண்டை நாட்டுக்காரர்களை மாற்றிட முடியாது.

அண்டை நாடுகளுடன் சேர்ந்து வாழ வேண்டியதன் யதார்த்தத்தை இந்தியா உணர்ந்துள்ளது. அவர்களுடன் பல்வேறு பிரச்சினைகள் இருந்தாலும் அவற்றை சரி செய்ய நட்புறவை பலப்படுத்தவே இந்தியா முயற்சிக்கிறது. சீனாவுடனான எல்லை பிரச்சினையில் நிரந்தர தீர்வு காண தொடர் முயற்சிகள் மேற்கொள்ளப்பட்டு வருகின்றன. சில காலமாக நிறுத்தப்பட்டுள்ள இந்திய சீனா இடையிலான இராணுவ ஒத்துழைப்பை மீண்டும் தொடர முயற்சித்து வருகிறோம். ஜூன் மாதத்தில் இந்திய இராணுவ அதிகாரிகள் சீனாவிற்கு சுற்றுப் பயணம் மேற்கொள்கின்றனர்.

அமெரிக்காவின் அனைத்து செயல்களையும் சரி என இந்தியா சொல்லாது. பயங்கரவாதத்தை அழிக்க பாகிஸ்தான் இராணுவத்திற்கு அமெரிக்கா வழங்கும் பெருமளவிலான ஆயுதங்கள், இந்தியாவுக்கு எதிராக பயன்படுத்தப்படுவதை கவனிக்க வேண்டும். இது குறித்து ஏற்கனவே அமெரிக்காவுக்கு தெரியப்படுத்தப்பட்டுள்ளது என்றார்.
அகணம்