12வது முறை எம்.எல்.ஏ.,வாககருணாநிதி இன்று பதவி ஏற்பு

by மகா பிரபு Mon May 30, 2011 9:43 am

தி.மு.க., தலைவர் கருணாநிதி, முன்னாள் அமைச்சர் துரைமுருகன் ஆகியோர் இன்று காலை 11 மணிக்கு, புதிய எம்.எல்.ஏ.,க்களாக பதவி ஏற்கின்றனர்.நடந்து முடிந்த சட்டசபை தேர்தலில், அ.தி.மு.க., அமோக வெற்றி பெற்று, கடந்த 16ம் தேதி முதல்வர் ஜெயலலிதா தலைமையில் புதிய அமைச்சரவை அமைக்கப்பட்டது.

தமிழகத்தின் 14வது சட்டசபைக்கு தேர்ந்தெடுக்கப்பட்ட எம்.எல்.ஏ.,க்களின் பதவி ஏற்பு விழா, கடந்த 23ம் தேதி நடந்தது. அதில், முதல்வர் ஜெயலலிதா, எதிர்க்கட்சித் தலைவர் விஜயகாந்த், தி.மு.க., சட்டசபை தலைவர் ஸ்டாலின் மற்றும் அ.தி.மு.க., தி.மு.க., கூட்டணிக் கட்சிகளின் எம்.எல்.ஏ.,க்கள் 229 பேர் பதவி ஏற்றனர்.பதவி ஏற்பு நிகழ்ச்சி அன்று, முன்னாள் முதல்வர் கருணாநிதியும் முன்னாள் அமைச்சர் துரைமுருகனும் டில்லிக்கு சென்றதால், பதவி ஏற்கவில்லை.

தற்போதைய விளையாட்டுத்துறை அமைச்சர் சிவபதியும், திருச்சி கிழக்கு அ.தி.மு.க., எம்.எல்.ஏ., மனோகரனும் பதவி ஏற்பு நிகழ்ச்சியில் கலந்து கொள்ளவில்லை. அவர்கள் இருவரும் கடந்த வெள்ளிக்கிழமை பதவி ஏற்றனர்.கருணாநிதி, துரைமுருகன் ஆகியோர் இன்று காலை 11 மணிக்கு, சபாநாயகர் ஜெயக்குமாரின் அறையில் புதிய எம்.எல்.ஏ.,க்களாக பதவி ஏற்கவுள்ளனர். உறுதிமொழியை வாசித்து, பதவி ஏற்கின்றனர். திருவாரூர் தொகுதியிலிருந்து கருணாநிதியும், காட்பாடி தொகுதியிலிருந்து துரைமுருகனும் தேர்ந்தெடுக்கப்பட்டது குறிப்பிடத்தக்கது. தமிழக சட்டசபையில் 12வது முறை எம்.எல்.ஏ.,வாக கருணாநிதி பதவி ஏற்கிறார்.

12வது முறை எம்.எல்.ஏ.,வாககருணாநிதி இன்று பதவி ஏற்பு 1772578765