மக்களைக் கும்பிடலாம்! வாருங்கள்!

by **rameshnaga** Sun May 29, 2011 6:33 pm

First topic message reminder :

மனிதர்களைக் கும்பிடுங்கள்!
பதினெட்டு வயதிற்கு மேற்பட்ட யாரானாலும்;
பஞ்சையானாலும், பரந்தாமன் ஆனாலும்;
வாக்காளர் அட்டவணையில் பெயர் இருந்தால் போதும்;
விழுந்து கும்பிடுங்கள்!
உங்கள் மீசையில் மண் அல்ல-
மாநிலமே ஒட்டிக்கொள்ளும்.
வெற்றியை வேள்விகள் தரும் என்று
வெட்டியாய் நீங்கள் தீ வளர்த்தால்-
உங்கள் வயிறுதான் எரியும்-
அணைக்க முடியாமல்;
அதனால்தான் சொல்கிறேன்-
மனிதர்களைக் கும்பிடுங்கள்!
கோட்டை மாதிரிக் கோபுரத்தில்-
ஒற்றையாளாய் இருக்கும் கடவுளை நீங்கள்-
கால் கடுக்கக் கும்பிட்டால்-
உங்கள் கால் குறைந்து கணுக்காலாகும்-
வீட்டுச் செலவில் அயோடேக்ஸ் தான் அதிகமாகும்.
உங்கள் பாலாலும், தேனாலும்,
குளித்தெழும் கடவுளரோ-
நம் பாவத்தின் சம்பளத்தைக் கணக்கெழுதி வைப்பார்கள்;
அதனால்தான் சொல்கிறேன்-
மனிதர்களைக் கும்பிடுங்கள்.
அவர்கள் உங்களை -
"மாண்பு மிகு"-ஆக்குவார்கள்.
"மாண்பு மிகு"-ஆனவுடன் -
மக்களை மறந்து விடுங்கள்.
ஏனெனில்-
மக்கள் மன்னிக்கத் தெரிந்தவர்கள்!
மறக்கவும் தெரிந்தவர்கள்-
உங்கள் வாக்குறுதிகளையும்.