திருத்தணி ரெயிலை கவிழ்க்க முயற்சி

kitcha · kitcha Sun 29 May 2011 - 15:46

திருத்தணி ரெயிலை கவிழ்க்க முயற்சி நடந்தது. இதனை டிரைவர் கவனித்து, அவசரமாக ரெயிலை நிறுத்தியதால் பெரும் விபத்து தவிர்க்கப்பட்டது.

சென்னை சென்டிரலில் இருந்து திருத்தணியை நோக்கி ஒரு ரெயில் சென்று கொண்டிருந்தது. அந்த ரெயில் அம்பத்தூர், ஆவடி, திருநின்றவூர், திருவள்ளூர் ஆகிய இடங்களுக்கு சென்று விட்டு பின்னர் கடம்பத்தூர் ரெயில் நிலையத்துக்கு மாலை 4 மணிக்கு வந்தது.

கடம்பத்தூரில் இருந்து அந்த ரெயில் திருத்தணி நோக்கி புறப்பட்டது. அப்போது அங்கிருந்து 1/2 கிலோ மீட்டர் தூரத்தில் ரெயில் சென்று கொண்டிருந்த போது, தண்டவாளத்தின் குறுக்கே பிஷ்பிளேட் எனப்படும் இரும்பு பிளேட் வைக்கப்பட்டிருப்பதை ரெயில் டிரைவர் கவனித்தார்.

உடனே டிரைவர் ரெயிலை அவசரமாக நிறுத்தினார். இதுபற்றி உடனடியாக அவர் கடம்பத்தூர் ரெயில் நிலையத்துக்கு தகவல் கொடுத்தார். பின்னர் இரும்பு பிளேட் அகற்றப்பட்டு ரெயில் புறப்பட்டு சென்றது. இதன்பின்னர் எந்தவித பாதிப்பும் இல்லாமல் வழக்கம் போல் ரெயில் போக்குவரத்து நடந்தது.

சம்பவ இடத்துக்கு ரெயில்வே போலீசார் மற்றும் ரெயில்வே பாதுகாப்பு படையினர் விரைந்து வந்தனர். தண்டவாளத்தில் இரும்பு பிளேட்டை குறுக்கே வைத்து ரெயிலை கவிழ்க்க முயற்சி செய்தவர்கள் யார்? என்பது பற்றி விசாரணை நடத்தி வருகிறார்கள்.

நக்கீரன்