சின்ன பழக்கம்

அன்புள்ள ஈகரை நட்புள்ளங்களுக்கு,

நான் புத்தகம் படிப்பதில் அதிக ஆர்வமற்று இருந்தேன், ஒரு செய்தியை, அறிவை, தேடலை, புத்தகம் வாயிலாக முழுமையாக படித்து புரிந்து கொள்ள சோம்பேறித்தனம், கற்க ஆசை ஆனால் படிக்க அலுப்பு, என்னை போன்றோர் ஏராளம், பள்ளி மற்றும் கல்லூரிகளிலும் இதேகதைதான். யாராவது இந்த பாடத்தை சொல்லிக்கொடுக்க மாட்டார்களா என்று தோன்றும்.



அப்போதுதான் நானும் என்னை போன்றே புத்தகம் படிக்க அலுப்பு கொள்ளும் என் நண்பனும் ஒரு புதிய பழக்கத்தை ஏற்படித்திக்கொள்ள துவங்கினோம், அது என்னவென்றால் தினமும் ஒரு புதிய செய்தி அது பொருளாதாரம், அரசியல், வரலாறு, கண்டுபிடிப்புகள், சிந்தனைகள், அறிவியல் போன்ற ஏதோ ஒன்று, அவ்வாறு ஒரு செய்தியை தினமும் நான் அவனுக்கு சொல்ல வேண்டும் அதே போல் அவனும் எனக்கு ஒரு செய்தியை சொல்லவேண்டும், இவ்வாறாக எங்கள் அறிவை வளர்க்கும் பழக்கம் துவங்கியது, ஒரே ஒரு செய்தி என்றாலும் அதை பற்றி மிக விரிவாக கூற வேண்டும், எனவே நான் ஒவ்வொரு நாளும் நான் பகிர போகும் செய்திக்கான தேடலை துவங்கினேன், அது புத்தகம், இணையம், செய்திதாள், செவிவழிசெய்திகள் என்று நீண்டு கொண்டே சென்றது, எங்கள் இந்த தேடல் எங்கள் வாழ்வில் ஒரு ஸ்வாரஸ்யத்தையும், அறிவு வளர்ச்சியையும் தூண்டியது, இந்த பழக்கத்தை மேலும் செம்மை படுத்த தினமும் ஒரே ஒரு செய்தியை பற்றி விரிவாக பகிர்ந்து கொண்டிருந்த நாங்கள் தினமும் பத்து செய்திகளையாவது பகிரத் துவங்கினோம். எங்களது இந்த பழக்கம் எங்களோடு மட்டும் நின்று விடாமல் எங்கள் நண்பர்களிடமும் தொடர்ந்தது, இதை ஒரு வழக்கமாக செய்ய துவங்கியதால் காலை எழுந்தவுடனேயே இன்றைக்கு நம் நண்பர்களிடம் என்ன அறிவை பகிர்ந்து கொள்ளலாம், எந்த செய்தியை அவர்களுக்கு விளக்கி சொல்லலாம் என்றே தோன்றலாயிற்று.



பிறருக்கு கற்பிக்கவும், பிறரிடமிருந்து எளிமையாய் ஒரு அறிவை கற்கவும் இந்த வழிமுறை எங்களுக்கு மிகவும் சிறந்ததாய் இருந்தது, இப்போதும் கூட செய்திதாள், இணையம், வலைப்பூ, புத்தகம் போன்றவற்றில் நாங்கள் கற்பதை உடனே எங்கள் நண்பர்களிடம் பகிர்ந்து கொள்வதால் எங்கள் அறிவு விசாலமாய் விரிவடைகிறது. அறிவை பெருக்க ஆயிரம் வழிமுறைகள் இருந்தாலும் கேட்டல் வழி அறிவுப் பெருக்கமே மிகவும் எளிமையானது, பண்டைய காலங்களிலும் படிப்பறிவில்லா மக்களிடம் சுதந்திரத்தையும், பகுத்தறிவையும், புரட்சியையும் மலரச் செய்தது இக்கேட்டல் வழிமுறை கருத்துப் பரிமாற்றமே. ஆகவே நண்பர்களே எங்களை போன்று நீங்களும் பயன் பெற தினமும் ஒரு புதிய செய்தியை அறிந்து கொள்ளுங்கள் நீங்கள் அறிந்ததை உங்கள் நண்பர்களிடம் பகிர்ந்து கொள்ளுங்கள், அதே போல் உங்கள் நண்பர்களிடமிருந்தும் தினமும் ஒரு புதிய தகவலினை அறிந்து கொள்ளுங்கள். நம் நாட்டின் வளர்ச்சியும், பெருமையும், முன்னேற்றமும் இளைஞர்கள் கையில் இல்லை... இளைஞர்கள் சிந்தனையிலும், அறிவிலும்தான் உள்ளது.. அதனை வளர்க்க இதுபோன்ற ஒரு சின்ன பழக்கத்தை நீங்களும் தினசரி தொடரலாமே....

நல்ல விசயம்தான்