இலவச அரிசிக்கு ரூ. 0 "பில்' :அரசு கறார் உத்தரவு

திண்டுக்கல் : அ.தி.மு.க., தேர்தல் அறிக்கையில் கூறப்பட்ட, 20 கிலோ இலவச அரிசி திட்டத்தை, ஜூன் 1 முதல் செயல்படுத்த, அரசு முடிவு செய்துள்ளது. தற்போது அதற்கான ஆயத்த பணிகள் நடக்கின்றன.

தகுதிகள்: பொது வினியோக திட்டத்தில் அரிசி பெற தகுதியுள்ள அனைவருக்கும் இலவசமாக வழங்கப்படும். குடும்ப உறுப்பினர்களின் எண்ணிக்கை அடிப்படையில், தற்போது வழங்கப்படும் அளவுகளில் அரிசி கிடைக்கும். புகார் செய்யலாம்: இத்திட்டத்திற்காக, ரேஷன் கடைகளின் முன் விளம்பர பலகை வைக்க உத்தரவிடப்பட்டுள்ளது. இதில், "முதலமைச்சரின் ஆணைப்படி 1.6.2011 முதல், தொடர்ந்து தகுதியுள்ள அனைத்து ரேஷன் கார்டுதாரர்களுக்கும் அரிசி இலவசமாக வழங்கப்படும். புகார்/யோசனை தெரிவிக்க வேண்டிய எண்: 044-285 928 28 (மாநில நுகர்வோர் சேவை மையம்)' என்ற வாசகம் இடம் பெறவேண்டும். சென்ற ஆட்சியில் ஒரு ரூபாய் அரிசி விளம்பர பலகையில், கருணாநிதி உருவப்படம் இடம்பெற்றதை போல், தற்போதைய முதல்வர் படம் இடம்பெற அறிவுறுத்தப்படவில்லை.

ரூ.0 "பில்': இலவச அரிசி வினியோகம் செய்யும் போது, நுகர்வோருக்கு 0 ரூபாய் என, "பில்' வழங்கி, பதிவேட்டில் குறிக்க வேண்டும். தினமும் விற்பனை முடிவுற்ற பின், ஏற்கனவே உள்ள நடைமுறைப்படி இறுதி இருப்பு விபரத்தை, எஸ்.எம்.எஸ்., மூலம் அனுப்ப வேண்டும். ஜூன் 1 முதல் இலவச அரிசி வழங்குவதால் அனைத்து ரேஷன் கடைகளும் திறந்து வைத்திருக்க வேண்டும். இத்திட்டத்தை குளறுபடி, நுகர்வோருக்கு ஏமாற்றமின்றி செயல்படுத்த வழங்கல், கூட்டுறவுத்துறை அதிகாரிகளுக்கு உத்தரவிடப்பட்டுள்ளது.
தினமலர்