50 மணி நேரத்தில் ஆயிரம் டிசைன் வடிவமைப்பு : "லிம்கா' சாதனைக்கு முயற்சி

by **ந.கார்த்தி** Fri May 27, 2011 2:27 pm

திருப்பூர் : "லிம்கா' சாதனை புத்தகத்தில் இடம் பெறும் வகையில், முந்தைய சாதனையை விட குறைவான நேரத்தில் ஆயிரம் பிரின்டிங் டிசைன்கள், திருப்பூரில் உருவாக்கப்பட்டுள்ளது. திருப்பூர் பனியன் உற்பத்திக்கு ஏதுவாக, கம்ப்யூட்டர் டிசைனர்களை உருவாக்கும் வகையில், மத்திய ஜவுளித் துறையின் அங்கமான டெக்ஸ்டைல்ஸ் கமிட்டியின் வழிகாட்டுதலின் கீழ், "டிப் (திருப்பூர் இண்டஸ்ட்ரியல் பெடரேஷன்)' சார்பில், பயிற்சி பள்ளி உள்ளது. கடந்த மூன்று ஆண்டுகளில், 48 மாணவர்கள் பயிற்சி பெற்றனர்.

"லிம்கா' சாதனை புத்தகத்தில் இடம் பெற, தொடர்ந்து ஆயிரம் பிரின்டிங் டிசைன்களை <உருவாக்கும் முயற்சி, கடந்த 24ம் தேதி இம்மையத்தில் துவங்கியது. கடந்த 24ம் தேதி காலை 10.30 மணிக்கு, முதன்மை செயல் அலுவலர் விக்ரம் குமார், சாதனை முயற்சியை துவக்கி, நேற்று மதியம் 12.30 மணியளவில் முடித்தார்; 50 மணி நேரத்தில், ஆயிரம் டிசைன்களை கம்ப்யூட்டரில் உருவாக்கினார்.

இதுகுறித்து, விக்ரம் குமார் கூறியதாவது: கம்ப்யூட்டரில் டிசைன்கள் உருவாக்குவதில் சாதனை படைக்க வேண்டும் என்ற எண்ணம், நீண்ட நாட்களாக இருந்தது. இதுகுறித்து, "லிம்கா' சாதனை புத்தகம் அமைப்புடன் தொடர்பு கொண்டேன். தொடர்ந்து 24 மணி நேரம் கம்ப்யூட்டர் டிசைன்கள் <உருவாக்கி, சாதனை படைக்க விருப்பம் தெரிவித்தேன். அந்த அமைப்பினர், "இதற்கு முன், தொடர்ந்து 61 மணி நேரம் 900 டிசைன்கள் உருவாக்கிய சாதனை உள்ளது; எனவே, அதே நேர அளவுக்குள் மேலும் அதிகளவிலான டிசைன்கள் உருவாக்கும் முயற்சி மேற்கொள்ளலாம்' எனத் தெரிவித்தனர். இதனடிப்படையில், சாதனை முயற்சிக்கான ஒப்புதலை, "லிம்கா' நிறுவனத்திடம் பெற்று, செய்து முடித்துள்ளேன். விவரங்கள் அனைத்தும் சமர்ப்பிக்கப்பட்ட பின், சாதனை புத்தகத்தின் அடுத்த பதிப்பில் வெளியிடப்படும் எனத் தெரிவித்துள்ளனர். இவ்வாறு விக்ரம் குமார் கூறினார்.
தினமலர்