பாகிஸ்தான் 2-வது கடற்படை தளம் அமைப்பதற்கு உதவ சீனா மறுப்பு

பாகிஸ்தானில் 2-வது கடற்படை தளம் அமைப்பதற்கு சீனா உதவ வேண்டும் என்று பாகிஸ்தான் ராணுவ மந்திரிஅகமது முக்தார் கேட்டுக்கொண்டார். இந்த கோரிக்கையை ஏற்க சீனா மறுத்து விட்டது. பாகிஸ்தான் கடற்படை தளத்துக்குள் தலீபான்கள் புகுந்து தாக்குதல் நடத்தியதன் எதிரொலியாக தான் இவ்வாறு மறுப்பு கூறப்பட்டு இருக்கலாம் என்று தெரிகிறது.

பாகிஸ்தானில் கராச்சி நகரில் ஒரு கடற்படை தளம் உள்ளது. இதுதவிர கவ்தார் என்ற துறைமுகத்தில் இன்னொரு கடற்படை தளம் அமைக்க வேண்டும் என்று பாகிஸ்தான் சீனாவை வலியுறுத்தி வருகிறது.

2007-ம் ஆண்டு கவ்தார் என்ற இடத்தில் ஆயிரம் கோடி ரூபாய் செலவில் சீனாவின் உதவியுடன் துறைமுகம் கட்டப்பட்டது. அது முதல் அந்த நகரில் கடற்படை தளம் அமைக்க வேண்டும் என்று பாகிஸ்தான் சீனாவை வற்புறுத்தி வருகிறது.

இதுகுறித்து சீன வெளிநாட்டு அமைச்சரக அதிகாரி ஜியாங் நிருபர்களிடம் கூறுகையில், பாகிஸ்தானில் 2-வது கடற்படை தளம் அமைப்பதற்கு சீனாவிடம் திட்டம் ஏதும் இல்லை என்று குறிப்பிட்டார்.

ராணுவ கேந்திரங்களை சுற்றிலும் கூடுதல் பாதுகாப்பு வளையங்கள், பாகிஸ்தான் அரசு திட்டம்

பாகிஸ்தானில் உள்ள கராச்சி நகரில் கடற்படை தளத்துக்குள் தலீபான் தீவிரவாதிகள் புகுந்து தாக்குதல் நடத்தியதில் 10 ராணுவ வீரர்கள் பலியானார்கள். இதைத்தொடர்ந்து ராணுவ ஒருங்கிணைப்புக்கான மத்திய மந்திரிகள் குழு கூட்டம் நடந்தது. இதற்கு பிரதமர் கிலானி தலைமை தாங்கினார்.

இந்த கூட்டத்தில் நாடு முழுவதும் உள்ள ராணுவ கேந்திரங்களுக்கு கூடுதல் பாதுகாப்பு வழங்கும் வகையில் பாதுகாப்பு வளையங்கள் அமைக்க தீர்மானிக்கப்பட்டது.

பாகிஸ்தானில் தற்கொலை தாக்குதலில் 9 போலீஸ்காரர்கள் பலி; 38 பேர் காயம், 300 கிலோ வெடிபொருள்களுடன் கார் போலீஸ்நிலையம் மீது மோதியது

பாகிஸ்தானில் பெஷாவர் நகரில் உள்ள போலீஸ் நிலையத்தின் மீது 300 கிலோ வெடிபொருள்களை ஏற்றிக்கொண்ட காரை தற்கொலை தீவிரவாதி ஒருவர் மோத செய்தார். இதில் வெடிபொருள்கள் வெடித்ததில் அந்த கட்டிடம் இடிந்து விழுந்தது. கட்டிடத்துக்குள் இருந்த 9 போலீஸ்காரர்கள் பலியானார்கள். ஒரு சிறுவன் உள்பட 38 பேர் காயம் அடைந்தனர்

அதிகாலையில் தாக்குதல்

பாகிஸ்தானில் வடமேற்கு எல்லைப்புற மாநிலத்தின் தலைநகரான பெஷாவரில் அமெரிக்க தூதரகத்துக்கு அருகில் 3 மாடி போலீஸ் கட்டிடம் உள்ளது. இந்த கட்டிடத்தில் குற்றப்புலனாய்வு துறை அலுவலகம் செயல்பட்டு வந்தது. நேற்று அதிகாலை 4.45மணி அளவில் தற்கொலை தீவிரவாதி ஒருவன் 300 கிலோ வெடிபொருள்களை ஒரு காரில் ஏற்றிக்கொண்டு இந்த கட்டிடத்துக்கு வந்தான். அவன் காரை இந்த கட்டிடத்துக்குள் காரை ஓட்டிக்கொண்டு சென்று மோதினான்.

இதில் காரில் ஏற்றப்பட்ட வெடிகுண்டுகள் வெடித்தன. குண்டு வெடித்த சத்தம் 10 கிலோமீட்டருக்கு அப்பால் கூட கேட்டது. அருகில் உள்ள கட்டிடங்களும் சேதம் அடைந்தன.

9 பேர் பலி

இந்த தாக்குதலில் காரின் என்ஜின் 350 அடிக்கு அப்பால் விழுந்தது. கார் துண்டு, துண்டாக வெடித்து சிதறியது. காரில் இருந்த தீவிரவாதியின் உடலும் துண்டு, துண்டாக சிதறியது. அவனது ஒரு விரல் மட்டுமே முழுமையாக கிடைத்தது.

இந்த தாக்குதலில் போலீஸ் நிலையத்தில் இருந்த 9 போலீஸ்காரர்கள் பலியானார்கள். ஒரு சிறுவன் உள்பட 38 பேர் காயம் அடைந்தனர். காயம் அடைந்தவர்கள் அனைவரும் அருகில் உள்ள 2 ஆஸ்பத்திரிகளில் சேர்க்கப்பட்டனர்.

தரைமட்டமானது

இந்த தாக்குதலில் போலீஸ் கட்டிடம் முழுவதும் இடிந்து விழுந்து தரைமட்டமாகி விட்டது. பல போலீஸ்காரர்கள் இடிபாடுகளுக்குள் உயிருடன் புதையுண்டு போய் இருக்கலாம் என்று மீட்பு குழுவினர் தெரிவித்தனர். இதனால் சாவு எண்ணிக்கை உயரும் என்று நம்பப்படுகிறது.

இந்த தாக்குதலுக்கு தலீபான்கள் பொறுப்பு ஏற்று உள்ளனர். கடந்த 2-ந்தேதி பின்லேடன் சுட்டுக்கொல்லப்பட்டது முதல் தாக்குதல்கள் அதிக அளவில் நடந்து வருகின்றன. இது 4-வது பெரிய தாக்குதல் ஆகும்.

3 நாட்களுக்கு முன்பு தான் தலீபான் தீவிரவாதிகள் கராச்சி நகரில் உள்ள கடற்படை தளத்துக்குள் புகுந்து அங்கு உள்ள விமானப்படை தளத்தில் புகுந்து கொண்டு தாக்குதல் நடத்தினார்கள். இதில் 10 ராணுவ வீரர்கள் பலியானார்கள். 2 போர் விமானங்கள் சேதப்படுத்தப்பட்டன.

தினதந்தி