தம்பிகள் மூலம் நல்ல செய்தி

by **சிவா** Thu May 26, 2011 9:11 am

முதல்-அமைச்சர் ஜெயலலிதா, நேற்று முன்தினம் நடத்திய வாராந்திர நிருபர்கள் கூட்டத்தில், பத்திரிகை நிருபர்களை, ``தம்பிகளே!'' என்று அன்புடன் அழைத்து தனக்கும், பத்திரிகையாளர்களுக்கும் உள்ள நல்ல உறவை வலுப்படுத்திவிட்டார். வாரம் ஒரு முறை தலைமை செயலகத்தில் உங்களை சந்திப்பேன் என்று வாக்குறுதி கொடுத்த ஜெயலலிதா, முதல் வாராந்திர பத்திரிகையாளர்கள் கூட்டத்தின் மூலம் தமிழக மக்களுக்கு ஒரு நல்ல செய்தியை தெரிவித்துவிட்டார். ``மின் பற்றாக்குறையைத் தீர்க்க துரித நடவடிக்கைகளை எங்கள் அரசு எடுத்து வருகிறது. அதனால் விரைவிலேயே ஒரு நல்ல மாற்றம் தெரியும் என்பதை மக்களுக்கு தெரிவித்துக் கொள்கிறேன்'' என்று தமிழக மக்களுக்கு ஒரு இருண்ட நிலையில் இருந்து வெளிச்சத்தை காட்டிவிட்டார். ஆக, இப்போது இருளில் இருந்தாலும் ஒரு வெளிச்சம் பக்கத்தில் தெரிகிறது.

தேர்தல் பிரசார கூட்டங்களிலும் மின்சார வெட்டைப் போக்க நடவடிக்கை எடுப்பேன் என்று உறுதி கூறியிருந்தார் ஜெயலலிதா. தமிழ்நாட்டில் ஏறத்தாழ ஒரு கோடியே 40 லட்சம் வீடுகளுக்கு மின் இணைப்பு கொடுக்கப்பட்டு உள்ளது. சென்னை நகரில் ஒரு சில மணி நேரங்கள் மின்வெட்டால் பாதிக்கப்படும் வீட்டு இணைப்புகள், கிராமப்பகுதிகளில் பல மணி நேரம் மின்சாரம் இல்லாமல் மக்கள் வாடிக் கொண்டிருக்கிறார்கள். தமிழ்நாட்டில் மின் உற்பத்தித்திறன் 10,122 மெகாவாட் ஆகும். ஆனால், தற்போது உற்பத்தியாவதோ 7,300 மெகாவாட் தான். நமக்கு தேவை 12 ஆயிரம் மெகாவாட் மின்சாரம். ஏறத்தாழ 5 ஆயிரம் மெகாவாட் மின்சாரம் துண்டு விழுகிறதே, இதை ஈடுசெய்ய என்ன செய்யப் போகிறோமோ? என்பதுதான் தற்போது மக்களின் கவலை ஆகும்.

நம்மிடம் கிடைக்கும் மின்சார உற்பத்தியை கருத்தில் கொண்டு தொழிற்சாலைகளுக்கு என்றாலும் சரி, பம்புசெட்டுகளுக்கு என்றாலும் சரி, வீடுகளுக்கு என்றாலும் சரி, வணிக நிறுவனங்களுக்கு என்றாலும் சரி இணைப்புகளை கொடுத்திருக்க வேண்டும். கையிருப்பை கருத்தில் கொள்ளாது, புதிய புதிய இணைப்புகளுக்கு தாராளமாக அனுமதி வழங்கிவிட்டதால், எல்லோருக்கும் சீராக மின்விநியோகம் செய்ய திணறுகிறோம். வீட்டில் இருக்கும் சாப்பாட்டின் அளவை கணக்கில் கொண்டுதான் விருந்தாளிகளை அழைக்க வேண்டும். விருந்தாளிகளை நிறைய அழைத்துவிட்டால் அவர்களுக்கு போதுமான சாப்பாடு போட வேண்டும். விருந்தாளிகளை நிறைய அழைத்துவிட்டு, பசியோடு இருக்கும் அவர்களுக்கு வெறும் அரை கரண்டி சாதம் மட்டும் போட்டால் என்ன நிலைமையோ?, அதுபோலத்தான் நிறைய இணைப்புகளை கொடுத்துவிட்டு, சரியாக மின்சாரம் வழங்க முடியாமல் திணறுகிறோம்.

எனவே, மற்ற வளர்ச்சியை எல்லாம்விட, முதலில் மின்சாரத்தை அதிகமாக உற்பத்தி செய்துவிட்டு, அதன்பிறகு புதிய புதிய தொழிற்சாலைகள், புதிய புதிய இணைப்புகளுக்கு அனுமதி வழங்கலாம். நம்மிடத்தில் மின்சாரம் இல்லாமல் வெளியே தனியாரிடமும், மற்ற மாநில மின்சார வாரியங்களிடமும் அதிக விலை கொடுத்து மின்சாரம் வாங்கியது நாமாக தேடிக்கொண்ட ஒன்றாகும். கடந்த 5 ஆண்டுகளில் மட்டும் வெளியில் இருந்து மின்சாரம் வாங்குவதற்காக ரூ.19,500 கோடி செலவழிக்கப்பட்டு உள்ளது. கடந்த ஆண்டு மட்டும் ரூ.5,900 கோடிக்கு மின்சாரம் வாங்கப்பட்டு இருக்கிறது. இந்த ஆண்டு எவ்வளவு தொகைக்கு வாங்கிக் கொண்டிருக்கிறோமோ தெரியவில்லை.

இந்தப் பணத்தை எல்லாம் வைத்து 6 ஆயிரம் மெகாவாட் மின் உற்பத்தி செய்யும் புதிய நிலையங்களைத் தொடங்கியிருக்கலாம். நிலுவையில் உள்ள மின்சார திட்டங்களை வேகமாக நிறைவேற்ற நடவடிக்கை எடுக்க வேண்டும். தமிழகத்தில் நியமிக்கப்பட்டு உள்ள மின்சாரத்துறை அமைச்சர் நத்தம் விசுவநாதனும், தமிழ்நாடு மின்சார வாரிய தலைவர் சுவரன்சிங்கும் துடிப்பு மிக்கவர்கள். ஒரு அணியில் விளையாடும் இருவருமே வேகமாக இருந்தால்தான், அந்த அணி வெற்றிபெற முடியும். அந்த வேகம் இந்த அணியில் தெரிகிறது. முதல்-அமைச்சர் ஜெயலலிதா அறிவித்தது போல, அடுத்த சில நாட்களில் மின்சார வெட்டைப் போக்க நடவடிக்கை வரும், நமது கஷ்டங்களுக்கு ஒரு விடிவுகாலம் நிச்சயமாக வரும் என்று தமிழக மக்கள் ஆவலோடு எதிர்பார்த்துக் கொண்டிருக்கிறார்கள்.

தினதந்தி - தலையங்கம்