டெல்லி ஐகோர்ட்டு வளாகத்தில் குண்டு வெடித்தது

டெல்லி ஐகோர்ட்டு வளாகத்தில் கார்கள் நிறுத்தும் பகுதியில் நேற்று மதியம் குண்டு வெடித்தது. இதில் அங்கு நிறுத்தி வைக்கப்பட்டிருந்த வக்கீல் ஒருவருடைய கார் சேதம் அடைந்தது.

குண்டு வெடித்தது

டெல்லி ஐகோர்ட்டு வளாகத்தில் 7-வது கேட் அருகே வாகனங்கள் நிறுத்தும் பகுதியில், ரஜாத் ஜெயின் என்ற வக்கீல் தனது காரை நிறுத்தி விட்டு கோர்ட்டு வளாகத்தில் உள்ள கேண்டீனுக்கு சென்று விட்டார்.

மதியம் 1.25 மணி அளவில் கார்கள் நிறுத்தி வைத்திருந்த பகுதியில் குண்டு வெடிக்கும் சத்தம் கேட்டது. அந்த பகுதிக்கு கோர்ட்டுக்கு வந்திருந்த வக்கீல்கள் மற்றும் பொதுமக்கள் ஏராளமானோர் திரண்டு வந்தனர்.

அப்போது, கார் பார்க்கிங் பகுதியில் நிறுத்தி வைக்கப்பட்டிருந்த வக்கீல் ரஜாத் ஜெயினுடைய காரின் அருகே பிளாஸ்டிக் பை ஒன்றில் கிடந்த வெடிபொருள் வெடித்து சிதறியது கண்டுபிடிக்கப்பட்டது. இதில் அவருடைய காரின் வலது பக்கம் சேதம் அடைந்தது. நல்ல வேளையாக அந்த கார் அருகே யாரும் இல்லாததால், எந்தவித உயிர்ச் சேதமும் ஏற்படவில்லை.

போலீசார் சோதனை

தகவல் அறிந்ததும், டெல்லி சிறப்பு போலீசார் மற்றும் வெடிகுண்டு நிபுணர்கள் விரைந்து வந்து சம்பவ இடத்தை பார்வையிட்டனர். வேறு ஏதேனும் வெடிபொருட்கள் அந்த பகுதியில் கிடக்கிறதா என்று தீவிரமாக சோதனை நடத்தினார்கள். தீயணைப்பு படையினரும் 8 வாகனங்களில் அந்த பகுதிக்கு விரைந்து வந்தனர்.

தடய ஆய்வினரும் தேசிய பாதுகாப்பு குழுவினரும் வந்து அந்த பகுதியில் கிடந்த வெள்ளை நிற பவுடர் மற்றும் பேட்டரி போன்ற பொருட்களை ஆய்வுக்கு எடுத்துச் சென்றனர். ஆனால் டைமர் போன்ற எந்தவிதமான பொருட்களும் அந்த பகுதியில் கிடைக்கவில்லை என்று தெரிகிறது.

கோர்ட்டு வளாகத்தில் நடைபெற்ற இந்த குண்டு வெடிப்பு காரணமாக டெல்லி முழுவதும் பாதுகாப்பு பலப்படுத்தப்பட்டுள்ளது. மாநிலம் முழுவதும் வாகன சோதனையை போலீசார் தீவிரப்படுத்தி உள்ளனர். மக்கள் அதிகமாக கூடும் இடங்களில், குறிப்பாக மார்க்கெட் போன்ற பகுதிகளில் பாதுகாப்புக்காக ஏராளமான போலீசார் குவிக்கப்பட்டுள்ளனர்.

தீவிரவாதிகள் நாசவேலை?

இந்த சம்பவம் குறித்து உயர் போலீஸ் அதிகாரி ஒருவர் கூறுகையில், ``இது ஒரு சிறிய குண்டு வெடிப்பு சம்பவம். காரின் வலது பக்கத்தில் கிடந்த பிளாஸ்டிக் பையில் இருந்த வெடிபொருள் வெடித்துள்ளது. இதனால் அந்த காருக்கு லேசான சேதம் ஏற்பட்டுள்ளது. இதில் உயிர்ச்சேதம் எதுவும் ஏற்படவில்லை'' என்று தெரிவித்தார்.

இந்த சம்பவத்திற்கு தீவிரவாதிகளின் நாசவேலை காரணமா என்று போலீசார் தீவிரமாக விசாரணை நடத்தி வருகின்றனர். டெல்லியில் கடந்த 8 மாதங்களுக்கு முன்பு, டெல்லி ஜமா மசூதி அருகே குண்டு வெடிப்பு சம்பவம் நடைபெற்றது. இதற்கு இந்தியன் முஜாகிதீன் தீவிரவாதிகள் பொறுப்பேற்றனர். அதன்பிறகு தற்போதுதான் அதேபோன்ற சம்பவம் நடந்துள்ளது.

சர்வதேச பயங்கரவாதி ஒசாமா பின்லேடன் கொல்லப்பட்ட பிறகு தாக்குதலை தீவிரப்படுத்தப் போவதாக அல்கொய்தா தீவிரவாதிகள் கூறி வருகின்றனர். இந்த நிலையில், டெல்லி ஐகோர்ட்டு வளாகத்தில் நடைபெற்றுள்ள குண்டு வெடிப்பு சம்பவம் அந்த பகுதி மக்களை பெரும் பீதியில் ஆழ்த்தி உள்ளது.

தினதந்தி