மனஅழுத்தத்தைப் போக்கும் `ஸ்பிரே’!

by தாமு Thu May 26, 2011 5:51 am

மனஅழுத்தம், படபடப்பைப் போக்கும் ஒரு `ஸ்பிரே’யை அமெரிக்க ஆராய்ச்சியாளர்கள் கண்டுபிடித்திருக்கிறார்கள். இந்த `ஸ்பிரே’யை இலேசாக மூக்கருகே பீய்ச்சி, வாசத்தை நுகர்ந்தால் போதும், இரண்டு மணி நேரத்தில் மனம் அமைதியாகிவிடும் என்கிறார்கள்.

இந்த `ஸ்பிரே’யில் உள்ள இயற்கையான வேதிப்பொருள், மன நிலையைக் கட்டுப்படுத்தும் மூளைப் பகுதிக்கு ஊடுருவி, `மாயம்’ புரியும் என்று கூறுகிறார்கள்.

மனஅழுத்தத்தைப் போக்க ஏற்கனவே சில மருந்துகள் இருக்கின்றன. ஆனால் அவை பலன் தர சில நாட்கள் ஆகும். அவற்றுடன் ஒப்பிடும்போது தங்களின் `ஸ்பிரே’ உடனடியானது என்கிறார்கள் இதை உருவாக்கியிருக்கும் ஆராய்ச்சியாளர்கள்.

இந்த `ஸ்பிரே’யில் உள்ள வேதிப்பொருளான `நியூரோபெப்டைடு ஒய்’, மூளையில் ஏற்கனவே காணப்படுவது என்பது குறிப்பிடத்தக்கது. மூளையில் உள்ள நரம்புச் செல்கள் ஒன்றுடன் ஒன்று தொடர்புகொள்ள இந்த வேதிப்பொருளைப் பயன்படுத்துகின்றன.

நியூயார்க்கில் உள்ள மவுண்ட் சினாய் மருத்துவக் கல்வி நிலையத்தில் தற்போது சோதனை முறையில் இந்த வேதிப்பொருள் பயன்படுத்தப்பட்டு வருகிறது.

நடத்தை, மனநிலையைக் கட்டுப்படுத்துவதில் மூளையில் காணப்படும் `நியூரோபெப்டைடு ஒய்’ உள்ளிட்ட வேதிப்பொருட்கள் முக்கியப் பங்கு வகிக்கின்றன என்கிறார்கள், விஞ்ஞானிகள். புதிய `ஸ்பிரே’யை 25 வயது முதல் 45 வயதுக்கு உட்பட்ட 15 பேரிடம் பரிசோதித்துத் திருப்தி அடைந்திருக்கும் ஆய்வாளர்கள், அடுத்தகட்ட ஆராய்ச்சியில் ஈடுபட்டு வருகிறார்கள்.

டெயிலிதந்தி