என்னுடைய ரியல் ஹீரோ மஹாத்மா காந்தி தான் : பராக் ஒபாமா

வாஷிங்டன் : மஹாத்மா காந்தி தான் தனது ரியல் ஹீரோ எனவும், அவருடன் தான் இரவு உணவு விருந்து உண்ண தாம் விரும்புவதாகவும் அமெரிக்க அதிபர் பராக் ஒபாமா கூறினார்.

ஆர்லிங்டன் வெஜினாவிலுள்ள பள்ளியில் சிறார்களுடன் கலந்துரையாடல் நிகழ்ச்சியில் பங்கேற்று, மாணவர்களின் கேள்விகளுக்கு நிதானமாக பதிலளித்தார் ஒபாமா.

அப்போது, லில்லி என்ற 9 வது பயிலும் மாணவி எழுந்து, "ஹாய், என் பெயர் லில்லி. யாருடனாவது நீங்கள் டின்னர் அருந்த விரும்பினால், அவர்கள் இப்போது இருப்பவர்களாகவோ அல்லது மறைந்தவர்களாகவோ இருக்கலாம்... யாருடன் டின்னர் அருந்த விரும்புவீர்கள்?" என்று கேட்டது.

அதற்கு வியப்புடன் பதிலளிக்கத் தொடங்கிய ஒபாமா, "குட். அப்படி ஒரு வாய்ப்பு கிடைத்தால் பலருடன் டின்னர் அருந்த விரும்புகிறேன்," என்றார்.

அடுத்த கணமே சற்றும் யோசிக்காமல் கூறத் தொடங்கிய ஒபாமா, "உனக்கு காந்தியைத் தெரியுமா? அவருடன் தான் டின்னர் அருந்த விரும்புகிறேன். அவர் தான் என்னுடைய ரியல் ஹீரோ.

காந்தியை எனக்கு மட்டுமல்ல; மார்ட்டின் லூதர் கிங் போன்ற பலருக்கும் பிடிக்கும். அமெரிக்காவில் தற்போது அகிம்சை வழியில் இயக்கங்களைப் பார்க்கிறாய் அல்லவா... அதற்கெல்லாம் முன்னோட்டமான இந்தியாவின் அகிம்சை போராட்டவாதிதான் காந்தி.

பணம், செல்வாக்கு போன்றவற்றாலும், வன்முறையாலும் அல்லாமல், அகிம்சை வழியில் மாற்றத்தை ஏற்படுத்துபவர்களை எனக்கு மிகவும் பிடிக்கும். அப்படி ஒரு மனிதரான காந்தியுடன் உட்கார்ந்து பேசவே விரும்புகிறேன்," என்றார் பராக் ஒபாமா.

மகாத்மா காந்தி தனக்கு தாக்கத்தை ஏற்படுத்தியவர் என்பதே கடந்த ஆண்டு செய்தித் தாள் ஒன்றில் ஒபாமா எழுதியது இங்கே குறிப்பிடத்தக்கது.

அதில், "என்னுடைய வாழ்க்கையில் பல இடங்களில் காந்தி தாக்கத்தை ஏற்படுத்தியிருக்கிறார். சாதாரண மக்களிடையே அசாதாரண மாற்றத்தை ஏற்படுத்தும் வல்லமையை அவர் கொண்டிருந்ததே காரணம்," என்று ஒபாமா குறிப்பிட்டிருந்தது நினைவுகூரத்தக்கது