சமச்சீர் கல்விக்கு தடை விதித்தால் எதிர்காலத்தில் பாதிப்பு ஏற்படும் : கருணாநிதி

சென்னை : சென்னையில் அறிவாலயத்தில் தி.மு.க., எம்.எல்.ஏ.,க்கள் கூட்டம் நடைபெற்றது. கூட்டத்தில் சட்டசபை தி.மு.க., தலைவராக ஸ்டாலின் தேர்வு செய்யப்பட்டார். துணை தலைவராக துரைமுருகன், கொறடாவாக சக்கரபாணி ஆகியோர் ஏகமனதாக தேர்வு செய்யப்பட்டனர். பின்னர் பத்திரிகையாளர்கள் சந்திப்பில் பேசிய கருணாநிதி : சமச்சீர் கல்விக்கு தடை விதித்துள்ளது அ.தி.மு.க., அரசு. சமச்சீர் கல்வித் திட்டம் மாணவர்கள், பெற்றோர்கள் என எல்லா தரப்பினரிடமும் ஆராய்ந்து, பல்வேறு குழுவினரிடம் கருத்து கேட்கப்பட்டு சமச்சீர் கல்வி அமல் படுத்தப்பட்டது. இந்த திட்டத்தை ரத்து செய்வதால் மாணவர்கள் எதிர்காலம் பாதிக்கப்படும். சட்டமேல்சபை அமையாது என தமிழக அரசு அறிவித்துள்ளது குறித்த கேள்விக்கு : இது எதிர்பார்க்கப்பட்டது தான் என்றார். பள்ளிக்கட்டணம் விவகாரத்தில் அரசு நேரடியாக தலையிடாது என்று ஜெயலலிதா கூறியுள்ளது குறித்த கேள்விக்கு பத்திரிகையாளர்கள் நீங்கள் தலையிடுங்கள் என்றார். தி.மு.க., ஆட்சியின் போது சொத்துக்கள் அபகரிக்கப்பட்டதாகவும், அவற்றை மீட்க நடவடிக்கை எடுக்கப்படும் என்றும் முதல்வர் கூறியுள்ளாரே : அப்படி சொத்து அபகரிக்கப்பட்டிருந்தால், அதை உரியவர்களிடம் ஒப்படைப்பதில் எந்த ஒரு தவறும் இல்லை என்றார். தி.மு.க., ஆட்சியில் நிறைவேற்றப்பட்ட பல்வேறு நலத்திட்டங்களை அ.தி.மு.க., ஆட்சி ரத்து செய்துள்ளது. தேர்தலில் அ.தி.மு.க., வுக்கு வாக்களித்து வெற்றி பெறச் செய்தவர்கள் இதற்காக வருத்தப்பட வேண்டும் என்றார். தலைமைச் செயலகத்தை அதிமுக அரசு மீண்டும் புனித ஜார்ஜ் கோட்டைக்கு மாற்றியது, சட்ட மேலவையை ரத்து செய்தது உள்ளிட்ட நடவடிக்கைகள் ஏற்கனவே எதிர்பார்த்ததுதான்.


துணிவோடு எதிர்கொள்வார் கனிமொழி : டில்லி பயணம் குறித்து கருணாநிதி கூறுகையில் : டில்லி திகார் சிறையில் இருக்கும் எனது மகள் கனிமொழியையும், ராஜாவையும் பார்ப்பதற்காக சென்றேன். கனிமொழி 2ஜி வழக்கை துணிவோடும், உறுதியோடும் எதிர்கொள்வார். இப்பிரச்னையை சட்டரீதியாக அணுகலாம் என நம்புகிறோம் என்றார். கனிமொழி சிறையில் உள்ள நிலையில், சோனியாவை சந்திப்பது சரியாக இருக்காது. அ‌தனால் தான் சோனியாவை சந்திக்கவில்லை என்றார்.

அரசுக்கு ஒத்துழைப்பு : அரசின் நல்ல திட்டங்களுக்கு தி.மு.க., நிச்சயம் ஒத்துழைப்பு நல்கும் என தி.மு.க., தலைவர் கருணாநிதி கூறினார். சட்டசபை சபாநாயகர் என்றைக்கு அழைப்பு விடுக்கிறாரோ அன்று எம்.எல்.ஏ., வாக பதவி ஏற்றுக் கொள்வேன். புதிதாக பதவியேற்ற அமைச்சர் மரியம் பிச்‌சை விபத்தில் இறந்தததற்கு தி.மு.க., தனது ஆழ்ந்த இரங்கலை தெரிவித்துக் கொள்கிறது. இவ்வாறு அவர் கூறினார்.
தினமலர்