ராஜீவ் காந்தி கொலை விவகாரத்தை மீண்டும் அரசியலாக்காதீர்கள் : காங்கிரஸ்

by தாமு Wed May 25, 2011 4:06 pm

இந்திய முன்னாள் பிரதமர் ராஜீவ் காந்தியின் படுகொலையை யாரும், அரசியலாக்க முயற்சிக்காதீர்கள் என காங்கிரஸ் கட்சி கடும் கண்டனம் விடுத்துள்ளதாக தெரிவிக்கப்படுகிறது.

இது தொடர்பில் காங்கிரஸ் செய்தி தொடர்பாளர் மனிஷ் திவாரி தெரிவிக்கையில், ராஜீவ் காந்தி கொலை ஓர் கொந்தளிப்பை ஏற்படுத்தகூடிய நிகழ்வு. இந்த சம்பவம் நாடு முழுவதும் ஏற்கனவே கடும் பாதிப்பை ஏற்படுத்தியிருந்தது.

இந்நிலையில், இதை யாரும் அரசியலாக்க முயற்சிக்க வேண்டாம். அதற்கு காங்கிரஸ் கட்சியும் அனுமதிக்காது. இவ்வளவு பெரிய துயர சம்பவத்தை அரசியலாக்கி பரபரப்பை ஏற்படுத்த வேண்டாம். இச்சம்பவத்தை அரசியலாக்க முயற்சி நடப்பதால், பொதுமக்கள் கவனமாக இருக்க வேண்டுமென அவர் தெரிவிதுள்ளார்.

வி.புலிகளின் சர்வதேச விவகாரங்களுக்கு பொறுப்பான தலைவர் என கூறப்பட்ட கே.பி.பத்மநாதன், ராஜீவ் காந்தி கொலை தொடர்பில், இந்திய தொலைக்காட்சி சி.என்.என் ஐ.பி.என் சேவைக்கு நேர்காணல் ஒன்றை நேற்று வழங்கினார்.

இதன் போது 'பிரபாகரனின் தவறுக்கான நான் மன்னிப்பு கோருகிறேன். நாங்கள் மன்றாடுகிறோம். எமது மக்கள் துன்பப்பட்டு கொண்டிருக்கிறார்கள். எமது மக்களை மனிதர்களாக வாழ்வதற்கு உதவுங்கள். ராஜீவ் காந்தியை கொல்வதற்கு பிரபாகரன் தான் திட்டமிட்டார் என்பது மறுக்க முடியாத உண்மை. அது எல்லோருக்குமே தெரியும். பிரபாகரனின் தவறுக்காக நான் மன்னிப்பு கோருகிறேன்' என தெரிவித்தார்.

மேலும் திராவிட கொள்கைகளின் மீது கொண்டிருந்த விருப்பும், பிராமண சமூகத்தினரின் மீது கொண்டிருந்த வெறுப்பும், இக்கொலைக்கு ஒரு காரணமாக அமைந்துவிட்டதாகவும் அவர் தெரிவித்தார்.

அத்துடன் தமிழக முதல்வர் ஜெயலலிதா மீதும் புலிகள் ஆத்திரமடைந்திருந்ததாகவும், அவருக்கு 'இசட்' ரக பாதுகாப்பு மத்திய அரசால் வழங்கப்பட்டதன் காரணம் இதுவெனவும் அவர் தெரிவித்தார்.

எனினும் கே.பியின் கூற்றுக்கள் திட்டமிட்டு சொல்லவைக்கப்பட்டன எனவும், இந்திய புலனாய்வு பிரிவினரான 'றோ' வின் செயற்பாடுகளால், இது நடைபெற்றுள்ளது எனவும் இந்திய செய்தி சேவைகள் சில தெரிவித்திருந்தன.

இதேவேளை நேற்று ஊடகவியலாளர்களை, தமிழக முதல்வர் ஜெயலலிதா சந்தித்த போது, திராவிட கொள்கைகளின் ஈர்ப்பினால் தான், ராஜீவ் காந்தி கொலை செய்யப்பட்டிருப்பதாக கே.பி கூறுகிறாரே என கேள்வி எழுப்பினர். அதற்கு பதில் அளித்த ஜெயலலிதா ராஜீவ் காந்தி கொலையில் திமுகவுக்கு மறைமுகமாக பங்கு உண்டு என்பதுதான் பொதுவான குற்றச்சாட்டு என தெரிவித்திருந்தார்.

இந்நிலையிலேயே காங்கிரஸ் கட்சி இவ்வாறானதொரு கண்டனத்தை விடுத்துள்ளது.

4tm