கனிமொழி சிறையில் இருப்பது பற்றி சோனியா கவலை

டெல்லியில், கருணாநிதியை குலாம்நபி ஆசாத் சந்தித்தார். கனிமொழி, ஜெயிலில் இருப்பது பற்றி சோனியா காந்தி கவலை அடைந்துள்ளதாகவும் அவர் கூறினார்.

ஓட்டலில் சந்திப்பு

தி.மு.க. தலைவர் கருணாநிதி நேற்று முன்தினம் டெல்லி சென்றார். ஸ்பெக்ட்ரம் வழக்கில் கைதாகி திகார் ஜெயிலில் உள்ள தன்னுடைய மகள் கனிமொழி எம்.பி., முன்னாள் மத்திய மந்திரி ஆ.ராசா ஆகியோரை ஜெயிலில் சந்தித்து பேசினார்.

பிறகு கருணாநிதியை மத்திய உள்துறை மந்திரி ப.சிதம்பரம், மத்திய மந்திரி வி.நாராயணசாமி ஆகியோர் சந்தித்து பேசினர்.

பாதிப்பு இல்லை

இந்நிலையில், நேற்று கருணாநிதியை அவர் தங்கி இருக்கும் ஓட்டலுக்கு சென்று மத்திய மந்திரியும், தமிழ்நாடு காங்கிரஸ் விவகார பொறுப்பாளருமான குலாம்நபி ஆசாத் சந்தித்து பேசினார்.

பிறகு, குலாம்நபி ஆசாத் நிருபர்களிடம் கூறியதாவது:-

இப்போது நடந்து வரும் சம்பவங்கள், தி.மு.க-காங்கிரஸ் கூட்டணிக்கு எந்த பாதிப்பையும் ஏற்படுத்தாது. வருங்காலத்திலும் எந்த பாதிப்பும் ஏற்படாது.

எங்கள் தலைவர் சோனியா காந்தி, ஒரு பெண்ணான கனிமொழி ஜெயிலில் இருப்பது குறித்து கவலை அடைந்துள்ளார். இதுதொடர்பாக தி.மு.க.விடம் எங்கள் அனுதாபத்தை தெரிவித்துக்கொண்டேன். இது கவலைக்குரிய விஷயம். ஆனால் எங்களால் எதுவும் செய்ய முடியாது.

அரசு தலையிடாது

இந்த வழக்கில் மத்திய அரசு தலையிடாது. இதில் காங்கிரஸ் செய்வதற்கு எதுவும் இல்லை. கருணாநிதி, அரசியலை நன்றாக புரிந்து கொண்டிருப்பவர். அவர், இந்த வழக்கு சுப்ரீம் கோர்ட்டின் நேரடி கண்காணிப்பில் நடப்பதையும், தனி கோர்ட்டு வழக்கு விசாரணையை நடத்துவதையும் நன்றாக அறிவார். இந்திய அரசின் கருத்தும் அவருக்கு தெரியும்.

சுரேஷ் கல்மாடி வழக்கு உள்பட எந்த வழக்குகளிலும் மத்திய அரசு தலையிடவில்லை என்பது அவருக்கு தெரியும். சந்தர்ப்ப சூழ்நிலைகளையும், புலன் விசாரணை அமைப்புகளின் பங்கு பற்றியும் அவருக்கு தெரியும். அவர் எல்லாவற்றையும் புரிந்து கொண்டிருப்பது, எனக்கு மகிழ்ச்சி அளிக்கிறது.

இவ்வாறு குலாம்நபி ஆசாத் கூறினார்.

ஜெயந்தி நடராஜன்

பின்னர், காங்கிரஸ் செய்தித்தொடர்பாளர் ஜெயந்தி நடராஜன், கருணாநிதியை சந்தித்து பேசினார். பிறகு அவர் நிருபர்களிடம் கூறியதாவது:-

இது மரியாதை நிமித்தமான சந்திப்பு. தி.மு.க-காங்கிரஸ் கூட்டணி, வழக்கம்போல உள்ளது. ஸ்பெக்ட்ரம் வழக்கை சட்டரீதியாக சந்திக்க போவதாக தி.மு.க. ஏற்கனவே அறிவித்துள்ளது. ஜெயிலில் கனிமொழி நன்றாக இருப்பதாகவும், வழக்கை சட்டரீதியாக சந்திக்க தயாராகி வருவதாகவும் கருணாநிதி தெரிவித்தார்.

இவ்வாறு அவர் கூறினார்.

தினதந்தி

ஓ அப்படியா, கற்பனை கதை நல்லா சுவராசியமா இருக்கே.

ஆடு நளையுதேன்னு ஓநாய்க்கு வருத்தமாம்..
இவர்களை பார்த்தால் இது ---> தான் வருது..

ம்‌ம் ...... அப்புறம்...