பிரிவுக்குப் பின் - 1, 2, 3, 4, 5, 6, 7, 8, 9 மற்றும் 10-வது வாரம்

by வித்யாசாகர் Wed Sep 09, 2009 10:06 pm

First topic message reminder :

சகலமானவர்களுக்கும் அறிவிப்பது என்னவென்றால்..,

தாய் திருநாட்டில் தன் மனைவியை விட்டுவிட்டு (தொழில் புருஷ லட்ச்சனமென) வெளிநாடுகளில் விதியென்று நினைத்து தன் மனைவி, குழந்தைகளை.. குடும்பத்தை பிரிந்து வந்து வாழும் ஒரு கணவனின்.., நம்மை போன்ற சக மனிதனின் வலி என்னவாயிருக்குமென்பதை "நீதியின் குரல் என்ற" தமிழிதழில் தொடர் கவிதையாக 10 மாதம் எழுதி வந்திருந்தேன். அக்கவிதைகளை நம் ஈகரையிலும் பதிவு செய்ய இருக்கிறேன்.

வாரம் ஒரு கவிதையென பத்து வாரங்கள் வரை வெளிவரும். இடை இடையே கொசுறுக் கவிதைகளோடு வெளிவரும். தங்கள் ஆதரவும் விமர்சனமும் தொடர்ந்து இருக்குமென நம்புகிறேன்.

தலைப்பு : "பிரிவுக்குப் பின்"

இக்கவிதைக்கான காரணம், நம்மோடு இருக்கும் உறவுகளின் அருமை இருக்கும் போதே புரிவதின் பேரில் குடும்பம் நலம்பெறும் என்பதால்.

வெறும், மனைவி.. கொஞ்சம் குழந்தைகள்.. கொஞ்சம் தேசமென, தன் அன்பை பிரிந்ததின் வலியது.

என் மனைவி செல்லம்மா பிரசவத்திற்கென தாயகம் சென்றிருக்கையில் வலித்து வலித்து எழுதியது..

வரும் வெள்ளியிலிருந்து ஈகரையில் காணுங்கள்.

உங்களின் ஆஹா தான் என் எழுத்துக்களை கவிதையாக்கும், தவறிருப்பின் தெரிவிப்பதும், நன்றாக இருப்பின் உற்சாகப் படுத்துவதுமான விமர்சனம் தான் என்னைப் போன்றோரை நல்ல கவிஞர்களாக வைத்திருக்குமென்பதை தாழ்மையுடன் தெரிவிக்கிறேன்.

அதற்கும் முன் என் சிரந்தாழ்ந்த நன்றிகளும் வணக்கமும் ஈகரைக்கு உரித்தாகட்டும்!

மனமின்றி.. விடைபெறுகிறேன்!

by வித்யாசாகர் Sat Oct 24, 2009 2:34 pm

பிரிவுக்குப் பின் - (7)

நான் -
வெளிநாடு வந்து
சில வருடங்கள் ஆகிறது

இம்முறை -
திருமணக் கனவோடு
ஊர் செல்கிறேன்..

ஊரில் எனக்கென்று
முன்னதாகனவே
பெண் பார்த்து வைக்கப் பட்டுள்ளது.

முதன் முதலாய்..
நானும் அவளும் சந்திக்கிறோம்
இன்றெனக்கு நிச்சயதார்த்தம்.

அடுத்த சில தினங்களில்
திருமணமும் முடிய..
காதல் பறவைகளை போல்
வாழ்வைத் துவங்கினோம்.

வாழ்க்கை சில தினங்கள்
சில்லறை பட்டாசுகளாய்
சந்தோசத்தில் வெடித்து ஓய்ந்துவிட...

காலம் -
கைகடிக்க ஆரம்பிக்கிறது!

பணத் தட்டுப் பாடு நிலவுகிறது..

கடன்கள் ஆங்காங்கே
முளைவிட்டிருப்பது தெரிகிறது..

மீண்டும் அனைத்து அனுபவ -
நற்-சான்றிதழ்களையும்
கையில் சுமந்துக் கொண்டு
மன அழுத்தத்தோடு -
வெளிநாட்டிற்கனுப்பும் படிகளில்
ஏறி இறங்குகிறேன்..

திடீரென ஒருநாள் -

'விசா வந்துவிட்டதாம்..'
காலண்டரை கிழித்து விட்டுப்
பார்கிறேன் - மனம் வலிக்கிறது..

இத்தனை வருடம்
மனதில் சுமந்த கனவுகளெல்லாம்
ஏக்கங்களாய் என் முன்
பல்லிளித்துக் காட்டியது..

வெறும் -
நாட்கள் அளவில் தானா
நம் வாழ்க்கையென -
கவலை கொள்கிறது மனம்..

மனைவி கலங்கிய கண்களோடு
நிற்கிறாள்,

திருமண வாசமெல்லாம்
அவளுடைய கண்ணீரில் கரைந்து போக..
கையசைத்து விட்டு -
விமானமேருகிறேன்!

நாட்களை விழுங்கிவிட்டு
தொலைபேசியில் வருகிறது செய்தி
மனைவி அம்மாவாகிறாளாம்!

நான் அப்பாவாகிவிட்ட
சந்தோசத்தை -
தொலைபேசியில் என் மனைவியிடம்
எப்படி காட்ட???

'இறந்து பிழைத்தேன் என்கிறாள்' அவளாக.

என்னால் 'எப்படி இருக்கிறாய்' என்று கூட
கேட்கமுடிய வில்லை-
சற்று தாமதித்து..
மவுனத்தில் மாத சம்பளம்
வேகமாய் கரைகிறதே என்ற அச்சத்துடன்

'உடம்பை பார்த்துக் கொள்ளலம்மா' என்கிறேன்..

அவள் 'எப்பொழுது வருவீங்க'
என்கிறாள்..

இப்போ தானே வந்தேனென்று என்னால்
சொல்லமுடியாவில்லை..

'உடம்பை பார்த்துக் கொள்ளம்மா' என்கிறேன்

'குழந்தையை பற்றி கேட்கவே இல்லையே' என்றாள்

'சொல் சொல்
எப்படி இருக்கிறது நம் குழந்தை' என்கிறேன்..

நம்மை போலவே இருக்கிறதென்கிறாள்.

நான் தொலைபேசியில் -
எச்சரிக்கை செய்ய வரும் - 'பணம்
தீந்து விட்டதன்' சிற்ரொளியின் சப்தம் கேட்டு

'அச்சச்சோ போன்கார்டு முடிந்துவிடும்
நான் பிறகு பேசுகிறேன்' என்றேன்

அவள் 'கார்டு போகட்டும்..
பணம் போகட்டும்...
தயவுசெய்து வீட்டுக்கு வந்துவிடுங்கள்' என்கிறாள்

'எனக்கும் வரத் தான் ஆசை
வந்துவிடட்டுமா' என்கிறேன் நான்

அவள் 'என்னால் முடியலீங்க' என்று
சொல்லிவிட்டு விசும்புகிறாள்..

'எது அவளால் முடியவில்லை' என்றெழும்
கேள்விகளின் பாரத்தை -
என்னால் தாங்க இயலாமல்

'எத்தனை மணிக்கு
குழந்தை பிறந்தது என்கிறேன்..

அவள் -
'இத்தனை மணிக்கு' என்கிறாள்..

என்ன குழந்தை என்று கூட
கேட்கத் தோன்றாமல் -
அந்த கணம் மட்டும் எனக்குள் வலித்தது..

கண்களை துடைத்துக் கொண்டு
'சரி உடம்பை பார்த்துக் கொள்' என்கிறேன்

'அழுகிறீர்களா' என்றாள்

'இல்லை தனியாக கஷ்டப்
பட்டிருப்பாயே' என்றேன்

'அதான் சொன்னேனே -
செத்துப் பிழைத்தேனென்று' என்கிறாள்

என்னால் அடக்கமுடியவில்லை
விரைவில் வந்துவிடுவேனென்று சொல்வதற்குள்.....

என் வார்த்தை தடுமாறும்
உதறலை புரிந்துக் கொண்டு -
ஓ..வென கத்தி அழுகிறாள் என் மனைவி!

என்னால் -
ஆறுதல் சொல்ல முடியாமலேயே
தொலைபேசியில் பணம் தீர்ந்து போய்
இணைப்பு துண்டிக்கப் பட்டுவிட்டது.

இங்கு நானும் - அங்கு அவளும்
அழுகிறோம்..

இடையே.. யுள்ள -
பல்லாயிரக் கணக்கான மயில்களும்
எங்களை கேள்வி கேட்டது -
ஏனிந்த வாழ்க்கை என்று!!
--------------------------------------------
வித்யாசாகர்

by kirupairajah Sat Oct 24, 2009 2:43 pm

வித்யாசாகர் wrote:பிரிவுக்குப் பின் - (7)

இங்கு நானும் - அங்கு அவளும்
அழுகிறோம்..

இடையே.. யுள்ள -
பல்லாயிரக் கணக்கான மயில்களும்
எங்களை கேள்வி கேட்டது -
ஏனிந்த வாழ்க்கை என்று!!

பிரிவுத்துயருடன் மட்டுமில்லாது, பணம், தொழில், குடும்பம், ஆசைகள், எதிர்பார்ப்புக்கள் என்று அனைத்தையும் அற்புதமாக கவிதையாக வடித்துள்ளீர்கள். நன்றி வித்யாசாகர்!

by வித்யாசாகர் Sat Oct 31, 2009 7:47 pm

நீயில்லாத
வருத்தத்தில்
வாழ்க்கை நகர-

உன் பிரிவின் துயரம்
வானமும்
பூமியுமாய் -
நீண்டு விரிகிறது!
----------------------
பிரிவுக்குப் பின்

by வித்யாசாகர் Sat Oct 31, 2009 7:48 pm

நினைவின்
பயணங்கள் தான்
எங்கெங்கோ..

அதில் நீளும் பயணமாய்
நீயும் உன் பிரிவுகளும்;

வெறும் -
பயணமாக மட்டுமின்றி

உயிரின் இயக்கியை..
சிரிப்பின் அர்த்தங்களாய்..
வாழ்வின் அவசியமாய்..

வாழும் அர்த்தங்களுக்கு -
அவ்வப்போது சுகமும்

பிரிவின் வலியையும்
கற்பிப்பவளாய்
நீ.. நீ.. நீ மட்டுமே!!
----------------------------
பிரிவுக்குப் பின்

by வித்யாசாகர் Sat Oct 31, 2009 7:49 pm

உறங்குவதற்கு
விளக்கை அணைக்கும்
ஒவ்வொரு இரவிலும் -

விழித்துக் கொண்டு அலறுகின்ற
உன் -
அத்தனை நினைவுகளால்

உறங்காமலே பூக்கின்றன
கனவு பூக்கள் -

படுக்கையை நனைத்த
கண்ணீரின் ஈரத்தில்!
----------------------------
பிரிவுக்குப் பின்

by வித்யாசாகர் Sat Oct 31, 2009 7:50 pm

ஒரு சில
பொய்களில் ஜெயிக்கிறது
சிலரின் -
உண்மையற்ற வாழ்க்கை;

நானென் உண்மையை
உன் பொய்யற்ற அன்பில்
வெல்ல நினைக்கையில் -

உனக்கும் எனக்குமிடையே
குவைத்தும்
இந்தியாவுமாய்
எத்தனை பெரிய தூரம்!!
----------------------------
பிரிவுக்குப் பின்

by வித்யாசாகர் Sat Oct 31, 2009 7:57 pm

ஐயோ கடிதம்
அனுப்பக் கூட கையில்
பணமில்லையே - என நீ
அழுத அழையில்,

கடிதமில்லாமலே
புரிந்துவிட்டது - நீ

எழுதித் தீர்த்திடாத உன்
அத்தனை பாரங்களும்!
------------------------
பிரிவுக்குப் பின்

by வித்யாசாகர் Sat Oct 31, 2009 7:59 pm

இங்கு நான்
கடக்கும் -
ஒவ்வொரு கணமும்

நீயில்லாத சொர்கத்தை
இழக்கும் -
ஒவ்வொரு -
துளிகள் என்பதை
யாரறிவார்!!
-----------------------
பிரிவுக்குப் பின்

by வித்யாசாகர் Sat Oct 31, 2009 8:02 pm

நானிங்கு
சம்பாதிக்கும்
பணம் -

இரக்கமின்றி தின்கிறது
நம் -
சந்தோசங்களையும்
சிரிப்பையும்;

இருந்தும் -
உலகிற்கு நாம்
நலமென்றே தெரிகிறது!!
-------------------------
பிரிவுக்குப் பின்

by வித்யாசாகர் Sat Oct 31, 2009 8:09 pm

கனவில் நீ -
வருகிறாய்,

கனவிலிருந்து தொடரும்
உன்னையுமென்னையும்
பிரித்த சோகம்-
கனவுக்கு பின்னும் நீள்கிறது;

காலத்தின் கைகளில்
நீயும் நானும்
எப்பொழுதும் -
பிரிந்தே பிரிந்தே
கணவனும் மனைவியுமாக!!
-----------------------------
பிரிவுக்குப் பின்