சர்க்கரையை விரட்ட சபாஷ் ஐடியாக்கள்

சர்க்கரை வியாதி... அலுவலகமே கதியெனக் கிடக்கும் ஆட்களை சுலபத்தில் நெருங்கி விடுகிறது. அதுவும் பிஸினஸ் தொடர்பான பணிகளில் இருப்பவர்களுக்குச் சொல்லவே வேண்டாம். அலுவலக அறையே கதியெனக் கிடப்பதாலோ என்னவோ... சர்க்கரை ஆபத்தில் இருந்து தப்ப முடியாமல் போய் விடுகிறது. 'கிராமவாசிகளைக் காட்டிலும் நகரவாசிகளுக்கு சர்க்கரை ஆபத்து அதிகம்’ என்கிறது ஒரு புள்ளி விவரம்.

இதுகுறித்து சென்னையைச் சேர்ந்த நீரிழிவு சிறப்பு நிபுணர் டாக்டர் ஜி.சண்முகசுந்தர் பேசுகிறார்...

''நகரவாசிகள் குக்கர் சாதத்தை சாப்பிடுவதால்தான் சர்க்கரை ஆபத்துக்கு ஆளாகிறார்கள் என சிலர் சொல்வது தவறு. கிராமப்புறங்களில் பெரும்பாலோர் சாதத்தை வடித்து சாப்பிடுகிறார்கள். அந்த வடி தண்ணீரில் விட்டமின்கள், மினரல்கள், கார்போஹைட்ரேட் போன்றவை இருக்கிறது. கஞ்சித் தண்ணீரை வடிப்பதன் மூலம் இந்தச் சத்துகள் ஓரளவுக்கு சாதத்திலிருந்து வெளியேறுகிறது. குக்கர் சாதத்தில் தண்ணீர் வடிக்கப்படுவதில்லை என்பதால் அவற்றில் அந்தச் சத்துகள் அப்படியே இருக்கின்றன. கிராமப்புற மக்கள் அரிசி சாதம் சாப்பிட்டுவிட்டு ஒரே இடத்தில் இருப்பதில்லை. விவசாயம் உள்ளிட்ட பல்வேறு வேலைகளை அலைந்து திரிந்து செய்கிறார்கள். அதனால் சாதத்தில் இருக்கும் கார்போஹைட்ரேட் செலவாகிவிடுகிறது. மேலும், அவர்கள் பெரும்பாலான இடங்களுக்கு நடந்துதான் செல்கிறார்கள் என்பதால் கார்போஹைட்ரேட் கலோரியாக செலவாகி விடுகிறது. இதனால், ரத்தத்தில் சர்க்கரை அளவு அதிகரிக்க வாய்ப்பு இல்லை. நகர்புற மக்கள் அப்படி அல்ல: அவர்களுக்கு உடல் உழைப்பு என்பது சுத்தமாக இல்லாத நிலைதான்! நகர மக்கள் சாப்பிடும் அரிசி சாதத்துக்கு ஏற்ப கலோரியை செலவிடுவதில்லை. இதனால், நம் உடலில் சேரும் அதிக சத்து கொழுப்பாக மாறி நீரிழிவு, இதயக் கோளாறு, ரத்த அழுத்தம், பக்கவாதம் போன்ற பல பிரச்னைகள் உருவாகின்றன. இதற்கு செலவழிக்கப்படாத கார்போஹைட்ரேட்தான் காரணம்.

உடல் உழைப்பு இல்லாத நகரவாசிகள் ரத்தத்தில் சர்க்கரை அளவைக் கட்டுக்குள் வைத்திருக்க வேண்டும் என்றால், சாப்பிடும் சாதத்தின் அளவை குறைக்க வேண்டும். மேலும், மலச்சிக்கல் ஏற்படவிடக் கூடாது. இதற்கு நார்ச் சத்து நிறைந்த காய்கறிகளை உணவில் சேர்த்துக்கொள்ள வேண்டும். அடுக்குமாடி குடியிருப்பில் வசிப்பர்கள், அலுவலகத்தில் பணிபுரிபவர்கள் லிஃப்ட் வசதியை பயன்படுத்துவதைத் தவிர்த்து படிக்கட்டுகளை உபயோகப்படுத்திப் பாருங்கள். அருகில் உள்ள இடங்களுக்கு செல்ல வாகனங்களைத் தவிர்த்து விட்டு நடந்தோ சைக்கிளிலோ செல்லுங்கள். வீட்டில், அலுவலகத்தில் சின்ன சின்னச் வேலைகளை உடலை வளைத்து நீங்களே செய்யப் பழகுங்கள். தோட்டத்தில் செடிகளுக்கு தண்ணீர் ஊற்றுவது போன்றவற்றை மேற்கொள்ளுங்கள். அண்மையில் பன்னாட்டு நிறுவனம் ஒன்றுக்கு சென்றிருந்தேன். அதன் பொது மேலாளர், அவரே பீரோவிலிருந்த ஃபைல்களை தேடி எடுத்து தந்தார். 'ஏன், சார் இத்தனை உதவியாளர்களை வைத்துக் கொண்டு, கஷ்டப்படுகிறீர்கள்? என்றேன். 'வேலையையே உடற்பயிற்சியாக வைத்திருக்கிறேன். அதனால்தான் இந்த 55 வயதிலும் 40 வயது சுறுசுறுப்போடு இயங்கிக் கொண்டிருக்கிறேன்’ என்ற அவரின் வார்த்தைகள் அர்த்தம் பொதிந்ததாக இருந்தது!

தினசரி குறைந்தபட்சம் 20-25 நிமிடங்கள் உடற்பயிற்சி, நடைபயிற்சி மேற்கொண்டால் நீரிழிவு நம்மை நெருங்காது. பலவீடுகளில் அதிகமாக சாப்பிட்டால்தான், அதிக சத்து என்று நினைத்து சாதத்தை வயிறுமுட்ட சாப்பிடுகிறார்கள். இடையில் ஏதாவது டிபன் சாப்பிட்டுவிட்டால் இரவு சாப்பாடு அளவை குறைத்துக் கொள்ள வேண்டும். அப்படி இல்லாமல் இரவு சாதத்தின் அளவை குறைக்காமல் சாப்பிடுவதால்தான் பலருக்கு நீரிழிவு பாதிப்பு வருகிறது. குக்கர் சாதம் என்றாலும் அளவோடு சாப்பிடும்போது சர்க்கரை நோய் வர வாய்ப்பு இல்லை. ஒருவரின் உடல் எடை, உயரம், உடல் உழைப்பு போன்றவற்றின் அடிப்படையில்தான் சாப்பிட வேண்டும்!'' என்றார் முத்தாய்ப்பாக!
நன்றி: விகடன்