"பதினாறு பேறுகள் எவை?"

by அப்துல்லாஹ் Mon May 23, 2011 12:33 pm

பதினாறும் பெற்று பெருவாழ்வு வாழ்க என்கிறார்களே, பதினாறு என்றால் என்ன?

அவரவருக்குத் தோன்றும் வகையில் பதினாறு பேறுகள் சொல்லப்படுகின்றன.

புகழ், கல்வி, ஆற்றல், வெற்றி, நன்மைகள், பொன், தானியம், அழகு, இளமை, நல்வாழ்வு, அறிவு, பெருமை, துணிவு, நீண்ட வாழ்வு, நோயின்மை, நுகர்ச்சி எனப் பதினாறைச் சிலர் சொல்கின்றனர்.

வேறு சிலர் அபிராமி பட்டரின் பாடலான,

"கலையாத கல்வியும் குறையாத வயதும் ஓர் கபடு வாராத நட்பும்

கன்றாத வளமையும் குன்றாத இளமையும் கழுபிணியிலாத உடலும்

சலியாத மனமும் அன்பகலாத மனைவியும் தவறாத சந்தானமும்

தாழாத கீர்த்தியும் மாறாத வார்த்தையும் தடைகள் வாராத கொடையும்

தொலையாத நிதியமும் கோணாத கோலுமொரு துன்பமில்லாத வாழ்வும்

துய்யநின் பாதத்தில் அன்பும்" என்பதைக் காட்டுவர்.

இன்னும் சிலர் காளமேகப் புலவரின்,

"துதிவாணி வீரம் விசயம் சந்தானம் துணிவு தனம்

மதி தானியம் சௌபாக்கியம் போகம் - அறிவு அழகு

புதிதாம் பெருமை அறம் குலம் நோவகல் பூண்வயது

பதினாறு பேறும் ..........." என்பதைக் காட்டுவர்.

மேற்சொன்னவை ஆண்களை மனதில் வைத்துச் சொல்லப்பட்டவையாகத் தோன்றுகின்றன. ஆணுக்கு அன்பகலாத மனைவி வேண்டுமாம். எனில் பெண்ணுக்கு..?

நாம் இன்று வாழும் உலகில்

கல்வி, உளநிறைவு தரும் வேலை, பை நிறைய வரும் ஊதியம், புரிந்து கொண்ட வாழ்க்கைத் துணை, பண்பான மக்கள், வசதியான வீடு, அழுக்காறில்லா அண்டை வீட்டார், நிலைத்த உடல்நலம், நீண்ட வாழ்நாள், நல்ல ஆட்சியாளர், தடையில்லா மின்சாரமும் நீரும், தூய்மையான காற்று, கலப்படமில்லா உணவுப் பொருள், கையூட்டுப்பெறா அரசு ஊழியர், ஊழல் செய்யா அரசியல் வாதிகள், நன்கொடை கோராக் கல்விச் சாலைகள் எனப் பதினாறைச் சொல்லலாம்.