கனிமொழி: புதிய அனுபவம், முதலாவது நாள் சிறைவாசம்!

by sabesan37 Mon May 23, 2011 10:53 am

கனிமொழி: புதிய அனுபவம், முதலாவது நாள் சிறைவாசம்!
-------------------------------------------------------------------------------------------
viruvirupu.com
--------------------------------------------------------------------------------------------
டில்லி, இந்தியா: கடந்த காலத்தில், தமிழகத்திலிருந்து வேறு பல அரசியல்வாதிகளும் ஊழல் வழக்குகளைச் சந்தித்திருக்கின்றார்கள். சிறையிலும் அடைக்கப்பட்டிருக்கிறார்கள். அவை பற்றிய தகவல்கள் ஊடகங்களிலும் வெளியாகியிருக்கின்றன.

ஆனால், கனிமொழி கைதானதும், சிறையில் அடைக்கப்பட்டதும், ஊடகங்களில் பிளாஷ் செய்யப்பட்ட அளவுக்கு வேறெந்தக் கைதும் பிளாஷ் செய்யப்பட்டிருக்கவில்லை. கனிமொழியின் கைது தமிழகத்துக்குள் மாத்திரம் மாநில அளவில் பேசப்படவில்லை, அகில இந்திய அளவில் பிரபலமாகவுள்ளது. ஒரு தமிழக அரசியல்வாதிக்கு இது ஒரு புதிய அனுபவம்தான்!

அதேநேரத்தில் சிறைவாசம் கனிமொழிக்கும் ஒரு புதிய அனுபவமே.

நேற்று மாலை கோர்ட்டிலிருந்தே நேரடியாக சிறைக்குள் அனுப்பப்பட்ட கனிமொழியின் முதல் 24 மணிநேர சிறைவாசம் எப்படிக் கழிந்தது?

சிறைக்குள் அவரது ‘தற்காலிக அயலவர்கள்’ இருவரும், இவர்மீதுள்ள குற்றச்சாட்டுக்கு தலைகீழான குற்றச்சாட்டுகளில் சிறைக்கு வந்தவர்கள். இடப்பக்கத்து அயலவர், உளவுக் குற்றச்சாட்டில் அடைபட்டுள்ள மாதுரி குப்தா. வலப்பக்கத்து அயலவர், விபச்சாரக் குற்றச்சாட்டில் அடைபட்டுள்ள சோனு பஞ்சாபன். நடுவே பலகோடி ஊழல் குற்றச்சாட்டில் இவர்.

இரு அயலவர்களுக்கும், தமிழக அரசியலோ, தமிழ் இலக்கியமோ, தமிழ் கவிதையோ தெரிந்திருக்க வாய்ப்பில்லை.

‘லட்சக்கணக்கில் கோடி ரூபா’ என்ற பிரமிக்க வைக்கும் தொகை ஊழல் குற்றச்சாட்டுடன் கனிமொழி சிறைக்கு வந்திருக்கிறார். ஆனால், சிறைக்குள், ஆயிரமோ, லட்சமோ, கோடியோ, எந்தத் தொகைக்கும் ஒரே வசதிதான்!

மற்றயவர்களுக்குக் கிடைத்திருப்பதுபோல கனிமொழிக்குக் கிடைத்திருப்பதும் அதே பத்தடிக்கு பதினைந்து அடி செல்தான்.அதற்கு உள்ளேயுள்ள கழிவறைக்கு கதவு கிடையாது. பயன்படுத்த வேண்டுமானால் காவலர்கள் வந்து திரை போட்டு விடுவார்கள்.

தென்னிந்திய உணவு வழங்கப்படும். ஆனால், வட இந்திய பாணியிலான, ஜெயில் தயாரிப்பு, தென்னிந்திய உணவு. முதல்நாள் தட்டில் கிடைத்தது, சப்பாத்தி, சிறிது அளவு சாதம், சப்ஜி, பருப்பு கூட்டு.

செல்லுக்குள் மின்விசிறி இருக்கிறது. ஆனால் திகாரில் கொசுத்தொல்லை அதிகம். டி.வி. வழங்கப்பட்டிருப்பதாக சிறை அதிகாரிகள் சொல்கிறார்கள். அதில் கலைஞர் டி.வி. நிகழ்ச்சிகள் ஒளிபரப்பாகுமா தெரியவில்லை.

கனிமொழியின் தந்தை முன்னாள் முதல்வர் கலைஞர், தனது அரசியல் வாழ்வின் ஆரம்ப நாட்களில், அரசியல் கைதியாக சிறையில் அடைபட்டிருக்கிறார். அதுபற்றி தி.மு.க. பிரசார ஊடகங்களில் பெருமையாகக் கூறிக்கொள்வார்கள். அவரும் அதுபற்றி அவ்வப்போது கவிதைத் தமிழில் கடிதம் எழுதுவார்.

“பாளையங்கோட்டை சிறையினிலே… பாம்புகள் பல்லிகள் நடுவினிலே..” என்று அவரது சிறைவாசம் பற்றி ஒரு தி.மு.க. பிரசாரப் பாடலே உள்ளது.

கனிமொழியின் சகோதரர் முன்னாள் துணை முதல்வர் ஸ்டாலின், எமர்ஜென்சி காலத்தில் அரசியல் கைதியாகச் சிறையில் அடைக்கப்பட்டது பற்றியும் சிலாகித்துப் பேசாத தி.மு.க. மேடைப் பேச்சாளர்களே இல்லை.

ஆனால், கனிமொழியின் சிறைவாசம், ஊழல் குற்றச்சாட்டுக்காக!

திகார் சிறையில் முதல்நாள் இரவு, “பாம்புகள் பல்லிகள் நடுவினிலே..” கனிமொழி படுத்திருந்தாரா தெரியாது. ஆனால் தெரிந்ததெல்லாம், இவரது சிறைவாசம் பற்றி தி.மு.க. பிரசாரப் பாடல்கள் வெளியாகாது. மேடைப்பேச்சாளர்கள் தி.மு.க. மேடைகளில் சிலாகித்து முழங்க மாட்டார்கள்.

சங்க இலக்கியத்தில் உவமானம் காட்டி, கவிதைத் தமிழில் கடிதம் எழுதக்கூடிய விஷயமா இது?

நன்றி - விறுவிறுப்பு.காம்

http://viruvirupu.com/2011/05/21/2293/