ஏவுகணை தாக்குதலை நிறுத்தாவிட்டால், பதிலடி கொடுப்போம் - பாகிஸ்தான் கண்டிப்பு

அமெரிக்க ராணுவம் எங்கள் நாட்டின் மீதான ஏவுகணை தாக்குதலை நிறுத்தாவிட்டால் நாங்கள் தக்க பதிலடி கொடுப்போம் என்று அமெரிக்க உளவுத்துறை அதிகாரிகளிடம் பாகிஸ்தான் உளவுத்துறை தலைவர் பாஷா கண்டிப்புடன் கூறி இருக்கிறார்.

ஏவுகணை தாக்குதலுக்கு எதிர்ப்பு

பாகிஸ்தானின் வடமேற்கு எல்லைப்புற மாநிலத்தில் வசீரிஸ்தான் பகுதியில் பதுங்கி இருக்கும் தீவிரவாதிகளை ஒடுக்கும்படி அமெரிக்கா பாகிஸ்தானை கேட்டுக்கொண்டு வந்தது. ஆனால் பாகிஸ்தான் அவர்கள் மீது எந்த நடவடிக்கையும் எடுக்கவில்லை. இதனால் தீவிரவாதிகளில் ஒரு சில தலைவர்கள் பதுங்கி இருக்கும் இடங்களில் ஏவுகணைகளை வீசி அமெரிக்கா தாக்குதல் நடத்தி வருகிறது. இந்த தாக்குதலில் பல முறை தீவிரவாதிகளுடன் சேர்த்து அப்பாவி மக்களும் பலியாகி விடுகிறார்கள். இதனால் உள்ளூர் மக்களிடம் ஏவுகணை தாக்குதலுக்கு எதிர்ப்பு எழுந்து உள்ளது.

இதனால் ஒரு பக்கம் ஏவுகணை தாக்குதலுக்கு எதிர்ப்பு தெரிவித்தாலும் இன்னொரு பக்கம் அதற்கு எதிர்ப்பு தெரிவிப்பது போல நாடகமாடுவது பாகிஸ்தான் அரசின் வழக்கம். அமெரிக்காவின் நிதி உதவி மீது கண் இருப்பதால் அமெரிக்காவை எதிர்ப்பதற்கு அதற்கு வலு கிடையாது.

பாகிஸ்தான் சென்ற அமெரிக்க அதிகாரி

கடந்த 2-ந் தேதி பாகிஸ்தானில் அபோதாபாத் நகருக்குள் அமெரிக்க ராணுவம் புகுந்து தாக்குதல் நடத்தி பின்லேடனை கொன்றது. இதற்கு அந்த நாட்டு மக்கள் மத்தியில் கடும் எதிர்ப்பு எழுந்தது. இதனால் மக்கள் கோபத்தை திசை திருப்பவும், அமெரிக்காவிடம் கடுமையாக நடந்து கொள்வது போல் தன் நாட்டு மக்களிடம் காட்டி கொள்ளவும் ஏவுகணை தாக்குதலுக்கு பாகிஸ்தான் அரசு எதிர்ப்பு காட்டி வருகிறது.

அமெரிக்க சி.ஐ.ஏ. துணை டைரக்டர் மைக்கேல் மோரெல் பாகிஸ்தான் சென்று இருக்கிறார். அவர் அங்கு பாகிஸ்தான் உளவுத்துறை தலைவரான லெப்டினன்ட் ஜெனரல் அகமது சுஜா பாஷா மற்றும் உளவுத்துறை மூத்த தலைவர்களை சந்தித்து பேசினார். அப்போது தான் பாஷா ஏவுகணை தாக்குதலுக்கு கடும் எதிர்ப்பு தெரிவித்தார்.

ஏவுகணை தாக்குதலை அமெரிக்கா உடனடியாக நிறுத்த வேண்டும். அப்படி நிறுத்தாவிட்டால், அதற்கு பதிலடி கொடுக்க வேண்டிய கட்டாயம் தங்களுக்கு ஏற்படும் என்று எச்சரித்தார்.

சமீபத்தில் நேட்டோ ராணுவ ஹெலிகாப்டர்கள் எங்கள் எல்லைக்குள் ஊடுருவியது அதிர்ச்சி அளித்ததாகவும் அவர் தெரிவித்தார்.

தவிர்ப்பதற்கு என்ன வழி

இருதரப்பும் ஏவுகணை தாக்குதலை தவிர்ப்பதற்கு என்ன வழிவகை காணலாம் என்பது குறித்து ஆலோசனை நடத்தின. அதோடு தீவிரவாதிகளுக்கு எதிரான கூட்டு நடவடிக்கைகளை விரிவுபடுத்துவது குறித்தும் ஆலோசனை நடத்தினார்கள்.

பாகிஸ்தானில் தங்கி இருக்கும் அமெரிக்க உளவு நிறுவன அதிகாரிகள் பெயர் பட்டியலை தங்களிடம் தருமாறு அமெரிக்காவை பாகிஸ்தான் கேட்டுக்கொண்டது.

சேதம் அடைந்த ஹெலிகாப்டர்

பின்லேடன் மீதான தாக்குதலுக்கு பயன்படுத்தப்பட்ட ஹெலிகாப்டர் சேதம் அடைந்தது. அதை அமெரிக்கர்கள் அபோதாபாத்திலேயே விட்டு விட்டு பின்லேடனின் உடலை தூக்கிக்கொண்டு ஆப்கானிஸ்தானுக்கு இன்னொரு ஹெலிகாப்டரில் சென்று விட்டனர். அப்போது அங்கே விடப்பட்ட ஹெலிகாப்டரை தங்களிடம் ஒப்படைக்கும்படி அமெரிக்கா கேட்டது. அதை தருவதற்கு பாகிஸ்தான் ஒப்புக்கொண்டது.

பின்லேடன் தங்கி இருந்த வீட்டில் கைப்பற்றப்பட்ட ஆவணங்கள், போட்டோக்கள், வீடியோக்கள் ஆகியவற்றில் அடங்கிய விவரங்களை தங்களிடம் கொடுக்க வேண்டும் என்று பாகிஸ்தான் கேட்டது.

முன்னேற்றம்

பின்லேடனை பாகிஸ்தானில் ஆதரித்தது யார், அவருக்கு பாதுகாப்பு கொடுத்தது யார் என்பதை கண்டறிவதில் என்ன முன்னேற்றம் ஏற்பட்டு உள்ளது என்று மோரல் கேட்டார்.

இருநாடுகளுக்கும் இடையே கருத்து வேறுபாடுகளும், சந்தேகமும் இருந்தாலும் பேச்சுவார்த்தையில் முன்னேற்றம் ஏற்பட்டது என்று கூறப்படுகிறது.